Zogam pilna saang sinna ah suahtakna

Zogam pilna saang sinna ah suahtakna ~ Za Peng Lian

Pilna lam suahtakna acih ciangin University sang khat peuhpeuh ah lai hilh sia/mah te, thu a kankhia kipawlna khat peuhpeuh sungah a om thukan khia te (researchers) leh pilna saang asin sang naupang te ading aneih loh uh aphamawh suahtakna khat ahi hi. Tua banah pilna lam suahtakna cih pen sia/mahte, thukan khiate leh sang naupangte suahtakna ding bek hilo in amau pilna tawh nasem (academic career) akuamah peuh ading suahtakna ahi hi. Tua ahih manin pilna lam suah takna pen lai hilhna ah suahtakna, suakta takin thu kankhiatna leh suakta takin sintheihna cih akipan nasem in akilawm ciang khat siamna nei in ama siamna bulpi in anei akua ma peuh in aneih suahtakna ahi hi.

Pilna lam suahtakna pen leitung gam tuamtuam ah ateng akuamah ciatin a neih mihing thuneihna (human rights) khat zong ahi hi. Mihing thuneihna khat ahih manin pilna lam suahtakna pen pilna asin azong, gualzawhna angah khempeuh in aneih suahtakna ahi hi. Hih pilna lam suahtakna in a huamkhak nate in suakta takin sintheihna, suakta takin kankhiat (research) theihna, suakta takin thu sittel theihna (inquiry), suakta takin lai at theihna leh hawmkhiat theihna, pilna sinna sang (institution) thu neite’ sepkhiatnate ah a thanemna uh suakta takin zongin pulak theihna te kihel hi. (M-J Johnstone 2012:4)

A omsa siamna, theihna tawh a kisem khinsa nate a dinmun uh suakta takin sittel theihna, thu kankhiatna (research) sep theihna, suakta takin dik leh diklo etna theihna, ei muhna tek suakta takin at khiat lahkhiat theihna cih te pawl pen pilna lam suahtakna in thapia,dal in hu hi.

Ih kawlgam sungah laihilh sia/mah te, kankhiat (research) nasep asemte, sangkah lai sang naupang te leh pilna lam tawh kisai nasep asem ten sepkhuan aana neite’ khaktanna, vauna cih bang omlo in suakta takin ngaihsut theihna (freedom of thought), ei muhnate suakta takin genkhiat theihna (freedom of speech) leh gamvai ah suakta takin kihel in mapan theihna (socio-political engagement and activities ) te sepkhuan ih ngah leh kawlgam in pilna lamah suahtakna om hi kici thei hi. (Cheryl Hudson 2016: 19)

Zogam sungah pilna saang sinna ah suahtakna

Zogam sungah pilna saang sinna tawh kisai suahtakna bangtan ciang om cih pen kawlgam sungah pilna lam suahtakna bangtan suahtakna om cih tungah kinga hi. Tom gen leng, 1962 kum in galkap kumpi ki-ukna hoihlohna hangin akisia cip pilna lam suahtakna pen tuni dongin abucing puahphat zawhna ki mu nailo hi. 1962 kum, U Nyi Win uk hun akipan tulaitak aana anei NLD kumpi hun dong gamvai ah suakta takin agen asem sangsia akipan sang naupang dongin a tul tampi mat leh hen in om uh a hihna ki mu thei hi.

Bawlsiatna athuak sangnaupang leh sia/mah tawm nawnlo hi. (Censorship News No.18,1992) Thuneihna (aana) tawh ki-ukna leh thu neite’ nasep a khialhnate uh a pulakte pen mawhna lian (crime) bawl khat in kiciamteh hi. 2019 kum, kum kipat pan June kha dongah suakta takin genkhiat gelhkhiatna thukhun tawh kizui in thukhun palsat ci-in amat uh mi 250 pha a, sum liauna leh thong khiatna dong om ahihna kimu thei lai hi.

Tu tadih pilna saang sinna a khantoh nading zah in akhantoh lohna pen sang (univerisity) ten amau sang tek suaktak in vaihawm khuan leh uk khuan (autonomy) aneih loh hang uh ahi hi. (Ei Shwe Phyu 2018: The Myanmar times). 2015 kum in a kikipsak kawlgam pilna lam tawh kisai thukhun (National Education Law) in University sang naupang te suahtakna tawmkha apiak hangin sia/mah te leh sang naupang kipawlna atam zaw ten tua thukhun deihlo (nial) uh hi. Sia/mah te leh sang naupang kipawlna te’n tua thukhun anialna hang uh pen tua thukhun sungah pilna saang sinna leh ki-uk kimakaih dan akan uh ciangin tungsiah lam pan ukna (centralization) a tamna hang ahi hi. (Ei Shwe Phyu 2018: The Myanmar Times).

Tungsiah lam pan ki-ukna atam luatna hangin sang ten asin uh subject te puah leh behlap khuan omlo hi. Sia/mah athak ahi zong nasem athak ahi zong abehlap nop uh ciangin sang ten suakta takin behlap leh paih khuan nei lo uh hi. Sang naupang ten amau sinnop subject leh adeih uh sang suakta takin telkhuan neilo uh hi. Asin uh lai (major) leh asangkahna uh pen atan 10 mat atawm atam tungah kingah mawk hi. Tua ahih manin tu tadih tan 10 ong khempeuh in suakta takin pilna sinkhuan, amau deih subject sinkhuan leh sang teelkhuan nei nawnlo uh hi.

Tua bek thamloh in University sang naupang ten sang huang sungah mipi tawh thugen khuan (public speaking on campus), a diakdiak in apua lam pan mipil te gamvai tawh kisai thugen khuan, kimukhawm in thu kikup khuan (political lectures, discussions and panels) omlo hi. Sang naupang kipawlnate in sang huang sungah mipi tawh thugen khuan, kimukhawm in thu kikupna aneih nop uh ciangin a kikup ding uh thulu, athu ala acing, asap ding te uh min, a tangthu tom leh asap uh mipha zah te sazian tawh siapipa tungah ngen uh hi.

Tua pen Ministry of Education nuai-a om Department of Higher Education ten 2018 kum may kha ni 21 ni in zuih dingin a khensat uh ahi hi. Hih bang dinmun teng tawh ih et ciangin University sang naupang ten suakta takin amau deih thulu tawh sang huang sungah kimukhawm in thu kikupna bawlkhuan omlo ahihna kimu thei hi. Hih bang dinmun teng ih gen mah bangin tu laitak a, University sang khempeuh pen gambup kumpi ukna leh thupiakna nuai ah a om sang ahih manun pilna lam suahtakna ahih kei leh suakta takin pilna sinkhuan omlo ahi hi.

University sang khempeuh tungah kumpi in (a diak in Department of Higher Education) tunglam pan ki-ukna khiam in University sang te amau leh amau ki-ukkhuan aneih uh ciang bekin ih gam sungah pilna lam suahtakna leh suakta takin pilna sinkhuan bit takin kingah pan ding ahi hi. Written by Za Peng Lian, and translated by Langh Sian Khai