Sia Job Thawngno DD ngah lungdampihna ~ Samuel Nas

Sia Job Thawngno DD ngah lungdampihna ~ Samuel Nas

Tuni Feb 22, 2020 nitak lamin ka Facebook tawlet pan ka khuadak leh, Sia Job Thawngno in Doctor of Divinity pahtawina sang ding cih thu ka mu hi. Ka lungdampihna lian mahmah a, pahtawina zong a sang ding takin sang ta hi ci-in ka lenna India gam kiukhat pan na lungkim mahmah ing.

Sia Job Thawngno pen Zomite adingin go manpha ahihzia pen tam gen kullo in I theihtek sa hi. Thugen veve ama ong gen penin ong sukha deuh zel a, laigelh veve zong ama gelh penin ong bun zaw deuh zel hi. Khua khawng ong dam deuh ciang, a thei vive mah “tuni khua dam tak ei maw” cih dan khawngin I kiim I kianga te kiang kigengen thei zel hi. Tua mah bangin ken zong I theih teksa hi mah leh hih hun lemtang ah la in Siapa thupi ka sakna leh ama tung ka lungdamna tamlo ong gelhkhia nuam ing.

1) Lai lam nasepna ah a hanciamna

I Zomi bup sungah laibu sawm khat (10) a gelh genloh a sim zong a sim nailo a tamzaw kihi mai ding hi. Tua kawmkal ah Siapa in pen a sim bek hilo a bawl ngiat leh a hawmkhiat ngiat pen bu za leh sawm thum (130) bang cing ta mawk hi. Lai lam nasepna pen I minam sungah a met lametna tawh hi leh septak het lo ding cih pen Greek philosopher minthang Socrates te pawl I ban zo kei zongin kingaihsun thei lel hi.

A met ding lam sangin veina tak tawh Zomite lai lamah I khantohna ding ahih theih tawpa pan hong lak pen Siapa tung zaktakna lianpi i pia hi. Zomi khangthakte hong khualna hi ci-in ka ngaihsun a, ka lungdamna lian hi. A lungkiat ni leh thanem ni bang om tham ding cih khawng ka ngaihsun a, tua pipi mahin a hanciam veve Siapa pen “thupi sa ing” cih bekin ka lungsim sunga om zah genkhia zolo hi.

“Laigelh mite leh vok pen a sih khit uh ciang a manphatna uh kithei pan” ci-in ciamnuihin kigen thei zel hi. English literature adingin mi manpha William Shakespeare, Mark Twain, Leo Tolstoy cihte pawl zong tua dan vive mah hi. Kamsang ka hih loh hang, I Siapa zong pen tuhun bekah hilo, mailam ah zong a manphatna kitel semsem ding hi ci-in genkhol ngam ing. Kei ka angtanna bel Siapa in ong dampih lai ngei in lai lamah a mapannate a thei bek hilo, a manphatna a muban khat ka hihna pen hi. Hih danin lungdampihna lai gelh thei a ka om zong hampha kisa mahmah ing.

I Siapa hangin Zomi Literature tampi in khang a, ama hanciamna tawh Zomite in laibu hoih tampi kineih lawh hi. A laibu bawl khenkhat, “Lungsim Limlang” “Kha Ann 100” cihte pawl pen mimal takin ka na metpih diakte hi. I Siapite Sia Go Khen akipan Sia JM Paupu, Sia Enno te pawl sermon leh thuluite kaikhawmin a bu a ong bawl zong I minam adingin go manpha hi den ta ding hi.

Laigelh veve pen i simnop deuh om a, Siapa gelhte pen ken simnop ka sa diak hi. A laigelh ka muhkhak bangbang pen simlohin khahsuah ngei hetlo hing. Tangval ka hih hang Nupa kal thu leh Innkuan nopna thusim a gelh te pawl zong na sim den ing. Kisap hun tak ciang zontawm kul nawnlo dingin lungsim ah na khol khol ding cih danin na ngaihsun ing.

Paunak khat in, “Khangkhat nuntakna sungah, a kimang tawntung ding laibu khat beek bawl in. Tua ahih kei leh zong a ciapteh taak ding na lian khat beek sepkhiat sawm in” na ci hi. Siapa in pen laibu bawl leh na hoih sepkhiat anihin zo takin semkhia a, i minam leh midang tampite adingin thupha lianpi suak hi.

2) Tuucing muanhuai ahihna

Pasian nasem tampi tak pen meigit tawh kibang uh hi. Tomvei sung kuang hethat uh a, a sawtlo in mitkik pah uh hi. Siapa bel Topa lenggah huanah a mapan zawh kum 34 bang pha to ta a, a meikuang lah mit lam sangin kuang deuhdeuh zawlai hi.

Mimal in holimna kinei hen la, “Sia aw, Topa nasepna bangci na sa hiam?” ci-in kidong leh, hong dawnna pen, “Topa nasepna ah nuamsa semsem ing” cih la hi pelmawh dingin ngaihsun ing. Bang hangin? Ama’n amah a sam pa theician a, um bek hi lo-in zong muang ngiat hi. A thugenna leh a laigelhte ah hih thute kimu thei hi.

Pawlpi kem sia ahihna pen thu khat hi ta leh, vakkawn siate (evangelist) mah bangin Zogam dung leh vai ah, damlo pi mahin kha mangthangte veina tawh a kalsuannate khawng zong suutsuut tham cing hi. Amah a khe a hoihloh hang, khe hoihte phak batloh dongah paipai lel hi. Damlo ahih hang mi cidam sinsente sep zawh ngeiloh ding na lian tampi semkhia zo hi. Hih pen khangthak Pasian nasemte adingin tona(challenge) lianpi hi pah hi.

A thupi penah, Siapa in pen a hihna khat peuhpeuh ah citak takin sem a, Zomite adingin a thu bek tawh hilo in a nuntakna mahmah tawh zong a ciinhuai leh ettehhuai nuntakna hong luikhia hi. “Na nuntakna in thu gen den ahihmanin a thangahhuai hi sak in” cih thu pen Siapa nuntakna in gencian hi.

Gen gen ni ci leng, gen ding tampi om lai hi – BTh sin ding a kithawi laitak ama lamet loh zawk “Back To Hospital” buaih a lak dan khawng, Pasian nasem tampi a pattahna thu khawng leh, amah bangin damlote a huhna leh a laptohna khawng zong suut tham cing hi. Ken ka en mahmah a thugen siamna leh a ciamnuih siamna khawng zong e. Pasal hoih ahihna, mi kiniamkhiat ahihna leh piakkkhiatna a hatzia khawng zong hun dangah sut dingin limsit phot ni.

Ka thukhupna lamah Siapa kammal (quotes) hoih ka sak diak ka lotngah pawlkhat hong gelhkhia ing:-

• 1) A thu na deihloh manin a mi mudah ken la, a mi na deihloh manin a thu mawk nial kei in.
• 2) Mawhna pen mawhna hi ci-in na kih masiah na siangtho kei ding hi.
• 3) Thu na lang zak leh, a lang bekmah um pah in.
• 4) I kitehna a niam luat leh, kiliatsakna piang baih mahmah hi.
• 5) Mite pahtak ding I ut luat leh, mite nasem kisuak lel hi.
• 6) I kipil sak kei leh [pilna I hanciam kei leh] a haisa in a suak I hi hi.
• 7) I mel I kipuah zahin I lungsim puah leng, kuamah mi sia ki-omlo ding hi.
• 8) Thupha ciapteh theihna pen gualzawhna hi a, thusia ciapteh theihna pen guallelhna hi.
• 9) Melhoih na kisak hang, hong mudah om veve a; melsia na kisak hang hoih hong ong sa om veve hi.
• 10) Koppih zonna vai ah, “It masa ken la, teel masa in. Na teel khit teh it inla, na it khit teh teel nawn kei in.

“Sia aw, Zomite in nang bang mi manpha ettehtaak kong neih uh pen kihampha mahmah hi. Tutung Doctor of Divinity pahtawina na san zong lungsim khempeuh tawh hong lungdampih ing. Lei ah sang vanah na thaman ding tam zawlai ding cih khawng ka ngaihsut ciang, hong haza sim phial mai ing. Lah kihazat theih hi lo.

Hici’n khangthakte suutsuut ding tangthu zaknop leh thangahhuai na nuntakna tawh a gelhgelh na suak hi. Topa in na nupa un cidam khansauna hong pia hen la, Ama nasem muanhuai ahi zel dingin a thupha namkim tawh hong phungvuh den ta hen. Amen.” Laigelh, Tg Samuel Nas