Dimno’ Nu laikhak – 8

Dimno’ Nu laikhak – 8

Dimno’ nu, kong laikhak loh zawhbang hong sawt keei ei! Naute’n lai hoihtak phi thei sam nong cih in ka lung hongnuam sak in, ka tawldam tuam, Dim! Naute mahmah hoihtak in Khalsang ( Zolai Sang ) na kahsak hamtangh in maw! Zolai hong simtheih loh khak ding pen patau mahmah ingh!

Tu hun pen leitung sia mahmah mawk in, na vaksut na vaktohna ah limtak khuangai in maw! Mite nuntak zia leh ei nuntak zia zong na lungngai khawm zelzel in la, midangte’n TV, Cassettes khawng a lei phial zongin na lungleng, na lunghiang kha kei in! E’n zong i neih sunsun tawh lei ni ci le’ng mizat sa ngallangh khat beek lei zo sam mah ding hi ve hang, ahi zongin tu kum a kipan in sum zat pen ciil leng ut ingh. An neek tuidawn a kipan bangbang ah ciil leng lunggulh mahmah ingh!

Naupang te’n an anek uh ciangin ankuang ah a khamval uh, a khateh uh kia sak zeizai kei leh hoih in um ingh! Kia sak pekpak nucin, na khamval te uh pai zeizai nuteh hong ci nuam hi sam keng! Mipil misiam, mihau te gamtak dan ka etet ciangin nei mahmah, pil mahmah, hau mahmah napi un-in an ne uh leh a kham uh ciangin a ankuang sung ah antangh malkhat zong ciang sak lo-in, beisak keuhkieuh zen uh! Gilkial lua in a gai siang zong ki ci thei napi dingin ahi zongin tua sangin Siikan nei in, An it in, sum ciil mahmah cih leng khial kei in ki um ingh. Amau te gamtak dan pen et teh huai ka sa mahmah a, tua bangdan mite ka muh ciangin eng mahmah ingh.

Tua bek tham lo-in Dim aw, nau te teng tawh tui zat dan zong nasiam le uh cin ut ingh. Kawlte Laigelh Siam khat in, ” tui tampipi in zangh leng tui haksatna mun ah haksa beh tuam ding ahih manin, a mau kiang ah a noptuam khak leh ci-in tui kazat ciangin a val lua in bua zai-zai kei ing,” ci hi ven!

Hih laigual khat vei sim kik in limtak ngaihsun pha le cin lunggulh ingh. Tui pen a mawkna in a kingah hi mah, a diakdiak bangin i khua bang ci leng khua dangdang te sangin tui zatdan pen nuam pha deuh sa lai ingh.

I veng i paam, i khua i tui leh midang te in a mawkna in i ngah tui pen zang zuahzuah, bua zuahzuah thei kha mah in teh! Ahi zongin tua bang hun laitak in tui ngah lo, tui haksatna mun te ngaihsun in la, tui na zat ciangin tawm cilek na ciil zat deuh in maw! Tua ci bangin tawm cilik cil zat deuh le hang tui haksat na mun ah na tam tuam ding hi ven! Kei zong tui ka zat zuahzuah ciangin, ” ken hici bangin tui zangh zuahzuah mawk leng mun dng leidang aa, tui hatsakna mun te ah na haksa beh laiding hitah a, tawm cik beek a noptuam khak ding leh,” ci-in ka tuizat tawmtawm in zangh kik ingh!

Dim, tu kum peuhmah in ei Innkuan in na lamdang khat bawl dih ni ei! Nei tah hangh ci-in zang zuahzuah leng a haksat hun teh baih lo ding ahi maw! I neih laitak, i nopsak zawk deuh laitak mah in ciil in, a nei lo ahaksa mite ading tawh lungngai khawm leng ci ingh! I neih laitak ciil kei le hang nei nawn kei le’ng ki ciil thei nawn lo ahi maw!

Hongit den,
UTuang
Tuipi Gal Khat Pan

By,
Pau Khan Kap
April 4, 2011