Tukumsung Yangon ah meikang 179 vei omkhin, Ks300 Million supna piang

Tukumsung Yangon ah meikang 179 vei omkhin, Ks300 Million supna piang

Myanmar, Yangon Region bup sungah tukum January kha panin September khadong meikatna 179 veibang piangkhin cihi. Tua meikatna te hangin supna asum in akituat ciangin Ks300 Million Kyats bang phading hi ci’n Yangon Region Fire Services Department te’n genkhia uhhi.

Yangon Region sungah tua meikatna te atamzaw pen Electric Wiring khau panin meikang akipan tamzaw ci uhhi.

Yangon Region sungah meikang aom ciangin ahunlap in Phone tawh ki zasakpah himahleh Yangon khuasung ah mawtaw tamlua mahmah in, Traffic Jam tawh meiphelh mawtaw te awkcip ahih manin, meikatna aphual te ah ahunlap in kitung theilo hi ci’n Fire Services Department Official te’n Eleven News te tungahzong genkhia hi.

Yangon khuapi sungah mawtaw awkcip “Traffic Congestion” hiden ahih manin, meikang akizaksak cianginzong meiphelh mawtaw tepen khuasung pelhtheih bangbang in pelhkawikawi in kitai ahih manin, ziakaituam mahmah hi.

Khuasung ah lampi a uk Traffic Police te’n meiphelh mawtaw “Fire Engines” te apaitheih nadingin lampi vaihawmsak himahleh Yangon khuapi sungah Fire Engines te ataingiat nadingin lamzik atuamin akikoih “Reserved Lane” kineilo ahih manin ahunlap in kitaithei tuanlo hi. Yangon khuapisung mahmah ah Traffic Systems hoihtak aomkeileh Fire Engine tepen meiphelh dingin meikatna phualte ah tungtheiloding cih himawk hi.

Yangon Region Fire Services Department te’n khuasung meikat aom khakleh ci’n etcikna Monitor nei uhhi. Khuapisung aom innsang mahmah High-rise Building mun 6 ah CCTV kithuah in, tuate tungtawn in Live Footage ki enthei a, khuasung ah patau meikang aomhiam cih ki Monitor den hi ci’n thunei te’n genkhia hi.

Sunlam nitan laitak “Daytime” hunin khuasung ah meikhu aomhiam cih ki encikden a, zanlam nitumkhit ciangin meikuang aomhiam cih ki encikden hi ci’n Fire Services Department te’n genkhia hi.

Related: Yangon aom Kandawgyi Palace Hotel meikanggawp

Yangon Region sung meikatna hangin supna asumin akituatpen September khadongbek hiphot a, nungdiak in akanggawp ahi Kandawgyi Palace Hotel kihel nailo hi. Kandawgyi Palace Hotel meikatna hanginzong supna tammahmah khading hi. Sawltak #zomidaily