Tuni Tonzang ah thu khentat pawlkhat ~ Pu Thangboi

Tuni Tonzang ah thu khentat pawlkhat ~ Pu Thangboi

Tuni (March 25, 2020) Tonzang TTBA zum ah biakna makaite, khuanu khuapate, leh CSO tuamtuamte thu kikup khopna zingsang nai 11:00 pan nitak nai 2:00 dong kinei hi.( Kikupna teng apat pan atawp dong Sia Kimpu in a Facebook pan in Live in khah hi. ) Thu ki khentat pawlkhat ka phawk vat teng:

• 1. Pawlpi kim in kikhopna himhim neihloh phot ding
• 2. Mi si a om zenzen leh nai 24 sung in vui ding

3. Nopna dahna ah khat leh khat pi 6 kihal a om hamtang ding. Apai peuhmah khutsil theihna ding in inntek te’n vaihawm ding

3. Gamdang pan hong ciah dingte’ min sazian kan ding. Hong ciah peuhpeuh zatote’ kiang hilh ding. Ni 14 sung apuapial lohna ding in hilh ding

4. Nek ding antang leiding a om kei leh ZYA te’ tungah ko ding. ZYA leh ZKK kipawl in antang lei theihding a omna ding in ong vaihawm ding uh

5. Tonzang ah Covid-19 ading kigin kholhna ding in zato lam vanzatte kha 1 ai leina ding Ks. 1,800,000/ val bang kisam ahih man in tua akisam vat sumte pawlpi tuamtuam hawmsak in ngen ding.

6. Van kisamte apia nuam peuhpeuh’ kiang ah huhna ngen kawikawi ding. Tu tadih PPE apiakhia:

• (1) ZYA-Tonzang – Silh 10
• (2) Sia Pau Khan Sing (Yangon) – Silh 10
• (3) Hanghil president – Silh 1

Cih teng phawk pak ing. Sia Kimpu’ Facebook ah avek in ki enthei kik inteh.

Siavuanpa’ honggente lak ah thupi kasak pawlkhat:

– Covid-19 pen satpiang tawh ki sukha leh thanem gawp in kuamah lawhzo nawnlo hi. Tua ahih man in satpiang tawh khut sildet ding hi.

-. Hih Covid-19 pen natgual namkhat hilel a thahat laite si peuhmah lo hi. Naupang kum 5 nuai natna ngah tawm mahmah hi. Hih natna ngah khat thahatlai (gtn. kum 50 nuai) ahih leh ni 14 khit teh damkik ziau ding hi. Tua hang a ni 14 sung akituam koih hi.

– Khanghamsa leh natna dang aneisate’n ngah leh bel thuak zolo hi. cihteng khawng hi

Tuni thukhentatna teng pen mipi khempeuh in ih sepkhop ding ahi hi. Asem ding atuam om hi tuanlo hi. Lungdam, Mung Laan Thang (Tonzang, Zogam)

Buhtang Vai

Zan ni ki patau gawp in buhtang ki honlei mang ahih man in Tonzang ah buhtang beiphot hi.

Buhtang vai thunei lam te’n vaihawmna hong nei sam ding uh hi. Azenzen in vaihawmna aneih kei zenzen uh leh ZYA in “Amet Lalo Kiallap Sai” kihong in buhtang kizuak ziau ding hi.

Ih Sanggampa’ vai

Tedim a ih sanggampa’ vai pen kawlgam cidamna lam zumpi te’ Lab Result (ဓါတ္ခြဲခန္းအေျဖ) ah Covid-19 lungno om cih hiphot hi. Leitungbup Cidamna Lam Kipawlna (WHO) ah March 24 ni in puak lai uh hi. WHO te’ lab result kithei nailo hi.

Cina hita leh thongkia hita leh case thupi ahih nak leb acidamna tawh kisai nisim tunglam ah report akipia den ahi hi. Tua pen zum paidan hi. “Acidam hi” cih pen a Covid-19 lungno om nawnlo hi cihna hilo hi.

Gam thupite bang ah mawhna hang tawh akikhailum ding thongkiate nangawn acidamna kisit tanghtangh hi. Nisim in BP akiteh ngiatngiat ahi hi. Zum paidan hi.

Ih sanggampa’ lungno ngah vai tawh kisai Lab Result thak a om masiah lungno anei hiphot hi.

Ih tungah lungno (virus) a om ciang in aom lam akithei hi zenzen lo hi. Ling bang a hong do hi zenzen lo hi.

Covid-19 pen leitungbup tawh kisai hi in kawl kumpi ciang maimai in nainganzi kimawlna in zangh ngam hetlo ding hi. Kawl kumpi tuazah a pimuh ding hisamlo hi. Covid-19 tawh tehna in neu mahmah hi. Genkhialh a om leh ngaidam, Mung Laan Thang (Tonzang, Zogam)