Pu H.E Hau Khan Sum tawh tuni
ASEAN ေရးရာ ညြန္ၾကားေရးမႉးခ်ဳပ္ ( ASEAN Affairs Director General ) H.E Hau Khan Sum tawh Tuni ( June 8, 2018 ) sun annek hun a kipan nitak luphun dong hun manpha tampi zangkhawm theikha kahihman in hampha ka kisa hi.
Pu H.E Hau Khan Sum pen Asean gam 10 meeting ban ah China, India leh Bangladesh cihte tawh meeting nei a abeisa Monday June 4 ni Singapore ong pai hi a, tuni sun ciang a meeting vai khempeuh uh a manta ahi hi. Zingciang Kawlgam lam zuan in, mai nipi sung Japan tawh meeting ding in Japan pai leuleu ding ahi hi.
Tutung ka kikholh khak hunsung in…
– A masa nai khat leh alang sung a zintunna MBS hotel room mah ah Kawlgam sung thu, Asean leh Kawlgam, Kawlgam leh Gamveng ( China, India, Bangladesh ) kizopna thu tampi ka kikum thei uh hi. Kei ading in a manpha mahmah hun ong suak hi.
– Tua khit ciang in MBS Hotel dawn a Sky Park leh Infinity Pool ah ka vak uh hi.
– Tua khit ciang in Pu Rev. Maj. S Khup Cin Paute inn ah hawh in Nu Cing in Niangtui leh Moh lim mahmah tawh lengla ong do a, thu lim, anlim tawh hunnuam ka zangkhawm thei uh hi.
– Nitak lam ong hipianta a Siama Mang ( Zen Lam Mang ) kiang ah hawh in ka vakkhia khawm uh hi. Siama Mang in Restaurant nuam mahmah khat ah nitak an lim mahmah ong nekpih leuleu a, tua khit ciang ka innkuanpih zawn in Pa Pau Khan Thawnte inn ah kahawh uh hi.
Tuabang teng tawh theihlohkal in nitak 10:30pm ong satziau mawk a ciahhun ong hiziau mawk hi. Hun nuam mahmah hiding hiven nai 10 sung bang ka kithuah uh pen gending sutding bei thei nailo, nuam sa lai, hun iplah lai pipi in innlam ciat azuan kahi uh hi.
Paisuk paitohna khempeuh Singapore kumpi in ama’ zatding ngiat a apiak mawtaw nuam mahmah khat tawh a paikawikawi kahi uh hi.
Hihbang hunnuam kingah pakpak lo ahihman in mi hampha in ka kingaihsun hi. Kawlgam gamsung gampua leitungbup tawh kizopna dong a thu thupi tampi, mite’ gensawn ahi ciiciai lo in bulzak bultheih kha suak kahihman in zong tua mahmah hampha ka kisa deuh hi. Mite in ciantak a thu a theihna uh tawh kizui in gamtat luhek leh thugen kampau kilamdang hi.
Anungta Topa i Pasian in Pu H.E Hau Khan Sum ong mapisak in a sep abawl a masuan khempeuh ah mazan, gualzawh lawhcina thupha ong piaksak ta hen! Amen….
NB:
Ka thu kikuppihpa gambup tangmi himawk, gambup kumpi tang a kampau thugen himawk ahihman in zalian lua in, kagen uh thute kumpi thusuahna omlo in official bangkhat asuah khak ding hoihlo ahihman in bangmah ong atkhia lo zaw a, kei mimal thu theihna ciang ah kepding in ngaihsun ing. Pau Khat Suan
Comment piaknop aomleh...