Na lawmnu itdan siam in ~ Dalsen Buansing

Na lawmnu itdan siam in ~ Dalsen Buansing

Koppih lawm a neikhin tengleh nei laining a citeng in pello na simsak hamtang in ki siklo ding hiteh. Ama lawm ngaihnu pen a lawm ngaihpa mai et siamin zahtak siam hi.Ahih kei leh ama zi pen a pasal leh a tate puah zo in, ma kaih siam hi, cih bangin nalawm ngaihnu ahih kei leh na zi pen numei dangte tawh genteh in nei kei in.

Na ngaihna hong pomsakin nang aa hi dinga hong kipumpiakna pen thupi in, manpha mahmah hi. Numeite pen midangte phatna sangin a lawmpa phatna pen thupi ngaihsut zaw uh hi.

A hoihna leh a manphatnate a thei lo leh a thei siamlo bangin omsan kei in. Numeite pen lungkham baih,thanem baih leh akap baih numei ahih manin a lawmpa tawh kikal ah ahoih lam sangin a khasiatnate uh ngaihsut in nei zaw uh hi. Tua ahih manin na ngaihna leh nang adinga a hoihnate lungdam ko zel in.

Nuak in hehin phun thei mah ding hi.Numeite in,haksa a saknate uh pen a ngaih ahi, a lawmpa kianga gending ut pen uh hi. Tha pia inla hehnem in, lungduaina leh itna tawh pom in.

Na hehna maitang lakh kei in;

Pasal khatin a hehna maitang tawh numei a etna sanga melsiatna adang omlo hi kici hi. Tua ahih manin naheh mahmah zongin na lawmnu pen na melsiatna musak kei in, hong ngaihna kiamtuam in bei thei hi. Banghang hiam cih leh numeite pen lau baih in, lungkham baih mahmah uh hi.

Pasalte in,leitung khan tohna tawh kizui-in midangte neih bang neih ding ut in, i hanciam bangin numeite in zong a lawmpa adingin numei hoih hih ding ut in, hanciam uh hi. Tua ahih manin midangte kiangah pahtawi siam lecin nangma hoihna zong kilang ding hi.

Pasalte in numei hoih leh hoih lo, i theih mah bangin numeite in zong pasal hoih leh hoih lo thei uh hi. Ahi zongin i ngaihsutna kibang loin numeite in, pasalte hoih a sak uh ciangin limsuai siamte in, a limsuaih hoihsa in, a et bangin en uh a, pasalte bangin taksa deihna lam ngaihsutna tawh en lo uh hi.

Na ngaih ahi na lawmnu pen hoihna kicing neilo ding hi. A hoihna khat pen muhsak siam inla itna in nei in.

Numeite pen khutlum tawh thu hilhna neih loh ding hoih hi. Na nakguh ahih manin na vuak ciangin nang leh nang a kivua zong nahi pah hi. It nawn loin ngai nawnlo nahih leh zong navuak sangin suahtakna pia lel in, numeite tunga khutlum ngakna pen, zum huai mahmah hi.

Numeite pen pilna siamna nei in, amah leh amah aki muang mi khat ahi zongin a ngaih mahmah khat pasal i makaih ding ut pen hi. Tua bangin sem ni, tua ne-ni cih bangin kam khum tawh a makaih thei pasalte pen zahtak uh hi.

Na lawmnu na zi-i a duh, a deih a gen khempeuh mangin nangma thu hi, ci khin kha kei in, na khialkha ding hi. A kilawm lote nial kawmkawm in.

Numeite pen kamtam uh ahih manin nikhat in, pasalte sangin kammal tampi pau khia zaw uh a hihna thei siam inla, thu buai a neih leh zong tawngpah loin a tung a phei, a kiim a paam teng ngaihsutsak masa in. Tua khit ciangin ama mawhna ahih leh hoih takin thu hilh in, lem tuah in. Tua khit ciangin muanhuai na, cihtakna leh theih siamna nei inla, itna tawh maisak in. Dalsen Buansing