Kua’n sawt puapen? @ Buan tawh kidim lampi
Guah a nak zuk mahmah ni khat siampi (monk – phungzi) nih khual hong zin uh hi. Guah tam mahmah ahih manin buan zong nawi mahmah hi. Mun khat buan nawi phadiakna kiang a tun uh ciangin nungakno khat lam pai theilo nawnlo (buannawi luatna mun kan theilo) in a om a mu uh hi.
Tua ciangin khatpa in, tua numeino nu a nungzang ah pua-in buannawi phadiakna mun galkhat ah a koih hi.
Tua bangteng tawh a khualzin uh hong zom uh a, nitak hong tun ciangin khua khat a, zintunna giahbuuk ah hong giak uh hi.
A zingsang ciangin a lawmpa’n a lawmpa kiangah, “Zanni a nungakno na puak mawkpen kilawm hetlo hi. Adiakin ei siampi (monk-phungzi) te pen numei tawh kisawh kha hetlo dingte hihang,” ci-in a genpih hi.
A lawmpa in, “Ken hua mun ah nusia khin veng e, nang puapua lai maw,” ci-in a dawng hi.
(The Muddy Road cih taangthu tom pan i thalak theih ding lunggulhna tawh deihkaih kawmin kong teisawn ahi hi).
Lungngaih ding
1). Khatveivei ei dinmun bek i ngaihsut luatna tawh midangte panpih ding le huh ding hamsa i sa kha thei hi. A lianpen ihi phial zongin pahpih ding, huh ding kisam a neupen mite zong panpih ding, huh ding hong phawksak hi.
2). I nuntakna sungah ei hong gimsak taktak pen i pumpi taksa tawh sep le bawl hang hi masa lo zaw a, i lungsim sunga i puak tawntung thu le late hizaw thei hi.
3). E’n na hoih i sep zawh kei a, midangte i huh zawh kei phial leh zong, a sem zo, a huh zote nawngkaisak kha kei ni..
Kuan sawt pua pen hiam? Nang bang sawt na pua pen hiam? Lungdam, Dong Mung
Comment piaknop aomleh...