Gen siang vet in ~ Tdkhen
1. Nang hong ngai mi khat, na mawlpihpihleh ama’ hong lamet na bat sawm’ keileh lametbei-in na koih kha ding hi; gen siang vet in.
2. Nang hong lamen mi khat, hong lamet na bat sawm’ keileh, a vai tampi kipelh kha ding hi; gen siang vet in.
3. Na vang hong tang mi khat, hong tan na bat kei dingleh, zawltholh kha ding hi; gen siang vet in.
4. Na kamnem’na hong hungaih mi khat, hong hungaih bangin na hih sawm keileh, a hun tam na mawk bei’sak kha ding hi; gen siang vet in.
5. Hong muang mi khat a muan bat na sawm keileh tavai kha ding hi; gen siang vet in.
6. Hong beel’ mi khat, belhtaak na suah sawm keileh, mangthang kha ding hi; gen siang vet in.
7. Telthei lel inteh ci a, thupoimawh khat na hemgen’leh, na ngaihsut lamin na ngaihsun lo thei hi; gen siang vet in.
8. Na deihsak mi khat, na deihsak lam hong tel lo thei hi; gen siang vet in.
9. Na pattahnop mi khat, a lungsim etna tawh na ze-etleh, hong dawng khial kha thei hi; gen siang vet in.
10. Mi na lamet gige khat, na lamet a banglo dingpi na hithei hi; gen siang vet in.
11. Lunghianna tawh minih na saikakleh, na deih hun ciangin a khat na val tading hi; gen siang vet in.
12. A pianma in kihang sakin, a hiding bangkeekin na kilatleh, hong pian ciangin mi tampi na cimawhsak kha ding hi; gen siang vet in.
13. Zankhat, zannih ngaihsutna in lawm hong kizonleh, na khangkhat bup na pia kha ding hi; gen siang vet in.
14. Ki-itna tawh hong kizomh maw, kingaihna tawh hong kizomh zaw maw, nang’ bangci ngaihsut, na khensatna gen siang vet in.
15. Na mel, na thaang tawh hong kideih maw, a hauh aliat manin nangmah’n deih zaw maw, na pilna sang pen tawh gen siang vet in.
16. Na nopsak sung bek a kimang ding na lawmte maw, na haksat lezong hong nusia loding na lawmte maw, na sungtawng’pilna tawh suutin gen siang vet in.
17. Na haksat hun cianga na kingakh nading mun mahah, na nopsak sungin zong kinga inla, laih kawikawi kei in. Na nopsakna tawh nang-le-nang a kikem na suak thei ding hi. Ama’ tungah zong gen siang vet in.
18. Khual na zin zongin, mi’zahtak ding mithupite’ kiangah tung in. Haksatna pawlkhat tawh kipelhna hi. Tua thu amau’ kiangah zong gen siang vet in.
19. Na daupai’ laitak-a na kampauna sate lungngai pha kik in. Na cit nawnloh ding hangin hong kilamen suak kha thei ding hi. Gen siang vet in.
20. (1) Hi zolo dingpi kamsiam masak kei in; hong ki um nawnlo ding hi.
(2) Hilo napi a hibangin om kei in; lamkhak na suak kha ding hi.
(3) Na lawp laitakin kamciamna pia kha kei in; na zahlak kha ding hi.
(4) Hong kipimuh ding sawm masa kei in; hong kineumuh kha ding hi.
(5) Hong kineumuh ding lau pah tuan kei in; hong kipimuh zaw kha ding hi.
(6) Na phak zawhzah tawh kizui-in, kampau in; na khial hak zaw ding hi.
(7) Ih itte’ aading bekin kikoihcing ni; lungsim pumpi cidam nading hi.
(8) Mite’ hong zulhsuah sa in om lo-in, mite i hoih suah zaw ding hi; makai dingin a kigingging ki hithei hi.
(9) Ei’ hangin mite na sumh kha thei a, a vai na kipelhin, na awk’lawh kha thei hi. Lametbei-in na om thei lai hi. Theihloh kalin hong ki mudah thei a, hong kihamsiat-in, hong ki phuisam’ thei hi. Tuate’ hang tawh i tuahtuahna om khin kha dinga, “Ei-le-ei kituisabuah” a cihte ahi ding hi.
(10) Mite in hong enn loh hangin phamawh sa sese lo-in, eizong mite eng sese lo-in, ihihna bang tawh lungkim leng, mi taktak i hi zaw ding hi. Talen khat sangpa in a lawmte eng kha a, a tungah a topa lung kimlo ziau hi.(Mt 25:14-30). Tdkhen
Comment piaknop aomleh...