Dear Tawngno,
Man kongkhakte en in ka omna leh ka omdante noptuak na cih hangin a taktak in hong gen leng, a nop nading munteng leh a hoihna, a nopcina munteng ah man kila-in kong khakzel ahih manin a nop ding tawh a kibang hi. Gam thupi, gam minthang ah om cih hangin pilna sangpi tawh nasep a kilut hi lo ahih manin khat veivei ciang i na sepna ah i lungsim a bei hun zong om thei zel veve hi.
Lametna khat in hong keem hi kei leh koikoi ah i om zong haksatna cih a bei ding hi kei!
African te paunak khat ah, “Na manlang nop leh nang guak pai in. Saupi na tun nop leh mi tawh pai khawm in,” cih khat om hi. Anlim meel lo nangawn zong ne khawm ngeingai leng lim suah se a, sem khawm in pang khawm ngeingai leng zong na khat peuhpeuh kizo baih diak se hi.
Kipawl khawm in ma i pan khopna in gualzawhna lianpi hong tun hi.
Khatvei, kum dang tawh a kibang lo, phalbi khuadam mahmah hun khat hong tung hi. Ganging tampi tak in tua khuadam do zo lo-in si zihziah uh hi. Tua leh Sakuhte in tua thu hong thei ahih manin kipawl khawm in mun khat ah a lom in a om khop ding uh hong khensat in hong om khawm uh hi. Tua bangin hong omkhop uh ciang khuadam thuakzo tuam hina pi, a kinehna hang un khat leh khat a ling uh tawh hong kisun liam kha ngeingai uh hi. Tawl khat tua bang danin a om khit uh ciang kikhen kik ding hong vaihawm uh a, a tuam tek in amau guak hong om kik uh hi.
Khuavot lua mahmah ahih manin khuadam thuak lah in aom na tek vuah gawnggaw in, si dingin hong kithawi ngeingai uh hi. Tua bang laitak in teel ding leh khensat ding thukhat hong nei uh hi.
‘A ling uh tawh khat leh khat kisun liam kha ta leh khuadam thuak zawh nadingin kineh in om khawm kik zaw ding maw?
Ahih kei leh khat guak ta-in tang om in ganghing dangte mah bangin si gai zaw ding?’ cih thu hi.
Omkhop kik ding hong teelzaw uh hi.
Khat leh khat a ling uh tawh kisun liam mah ta leh kineh in omkhawm leh a ci lum teng uh tawh khuadam a do zawh ding lam uh hong thei-in, liam ma tawh kidim tek mah ta leh hong omkhawm kik uh hi.
Tua bang teng tawh a vot mahmah phalbi khuadam hun pen hong do zo uh hi.
Tawngno aw, mi tawh kipawl theihna i cih ciangin i duh i deih leh i tup kibang gai in, khat vei mahmah zong kam kinial in, ki phunsan ngei lo, cih hi peuh mah lo hi. Kiphun sansan in, kam kinialnial in hoih i sak dan kibang kei ta leh i kibatna teng gawmkhawm in ma i pang khopna in i kipawltheihna hi-a, tua in gualzawhna hong tun hi.
Gen kizom lo, tu sung teng ka lung a leng lua hi lo napi-in zan ka mang in na nu bekbek mangmat thapai ing!
Hong phawk,
Na Pa
June 26, 2017
Comment piaknop aomleh...