Ngalbual leh Thalmual lampi hilhcianna ~ Lianno Milun

Ngalbual leh Thalmual lampi hilhcianna ~ Lianno Milun

Ngalbual leh Thalmual lampi tawh ki sai in, ka muh cil in a thu tel lo ka hih man in, comment zong ka pia kei hi. Hih thu ah Ngalbual leh Tungzang cih pen Khua khat tuikhat bang a, ki it ki ngai, kipi kila te i hih man in, ki theih khialh, ki tel khialh na a, lakloh ding kong thum nuam masa hi. A pai zia a tom in a nuai a dan a hihi:

Ngalbual leh Thalmual ki kawm na ding lampi pen kumpi pan huhna a ki pia pen tai 2.2 (2 miles 2 farlongs) khop ding bek a hihi. Ngalbual leh Thalmual ki kawm na lam lui te lah lolam, ganzawi peuh hi in, tua te zui sak leng, haksatna nampi nih (2) om hi.

• 1. Lam sau lua
• 2. Phil lui ah lei (bridge) neih ki sam beh lai ding a hihi.

Tua hi in, Tungzang gamhuam tawn ding hi leh nai zaw tham pek a;

• 1. Sum save
• 2. Hun save
• 3. Mihing thatang (Human Resource) save hi.

Ahih hang Tungzang khua sung tektek tawn leh, nakpi tak in gamla zaw a hih man in, Tungzang hausapa kiang ah, a gamhuam uh tawt theih na ding ki ngen mah hi. Hausapa in a khua uh tawnding hi leh phal na pin, a khua sung uh tawn loding a hih leh a gam huam uh a tawt ding phal lo cih dan hi.

Midang namdang hileng a hiding mah hi e ki ci thei na pin, ei khuakhat tuikhat bang a ki zom te ih hih teh, ki hi cih leng, i khua pua kua pial khia thei ding hiam ka ci nuam phial hi.

A tung a (3 saves) teng en leng, i hak sat, i zawn i ngau tinten tawh, i ki khak tan sang, tha ki piak huai zaw lo hiam ka ci nuam hi. Theihding: Hihthu tawh kisai aki cian zawdeuh ding in a telnuam ten Thupuak pa FB (Lianno Milun) tungah ki dong thei lai hi. Thupuak – Lianno Milun

Ngalbual leh Thalmual kikal lampi vai gencianna

MP Pu Thang Deih Khup in May 14, 2020 ni Kumpi tungah Ngalbual leh Thalmual Khua kikawm nading lampi angetsakna tungtawn in 2020-2021 Kumpi Budget tawh lampi pi 4′ azai in Tai 2 le Falong 2 lampizon nading phalna Lai tu-ni June 2, 2020 Tuesday 12:15pm hun in lampizongte tungpan kimu hi.

Ngalbual Khua pan Thalmual Khua kikawm nading lampi angah uh hi a, Lampizongte in Ngalbual Khua pan Tuithang Khua kikawm nading lampi hong zong mawk uh ahih manin a kisailo Tungzang gam hong lehnawktoh sak mawk hi. Ih theihsa mah bangin Ngalbual pan Thalmual kikawm nading lampi in Tungzang gamsung va nawk in Tuithang Khuataw ah letto ding cihpen ahaivaipi khat ahihi.

Hih lampi tawh kisai ah, phalna Budget pen Ngalbual leh Thalmual kikawm nading lampi ahih manin Thalmual Khua a manawh ding ahihi. Tungzang, Tuithang, Tedim cihte tawh bangmah kisaina omlo hi. Mipawlkhat in, Tedim pai ciang manla’ng tuam nading peuh ci zanzan hi. A ngetna uh tungtawn in Kumpi phalna pen Ngalbual leh Thalmual kikal kikawmna lampi bek hi a, Tungzang gam anawk lohding lam kitellua ahih manin zum lampa’n Tungzang Hausa tungah theihsakna Lai bangmah tunglo pah hi.

Tungzang in Khuavengte pen innkuan khat bangin ki-it bawl mahmah hi. Tungzang pan Ngalbual kikal Mawtaw lampi a masapen zong Tungzangte panpihna thatang ngiat mah tawh a kisem hi, cih Tungzang Khua laibupi sungah om hi. Hih lampi vai ah, Tungzangte kilungkimlo hi masalo hi. Kumpi phalna Lai sunga bangteek in thuman thutak in hong sem peuhleh kipanpih nuamzaw hilai hi. Thumanlo in hong sep tak ciangin a kisailo Tungzang gam sunga logamte leh singkung tampi in sihlawh hi.

Tu-ni in lampizo’n kipan uh ahih manin Tungzang pan Hausa upa makaite leh Khuasung khangno mi 30 val in thumanlo a nasemte thuman in agamtat nading leh Kumpi phalna Lai om bangin a sep ding uh thapiakna va kinei hi. Lampizongte mahmah in Kumpi phalna Lai sunga leh a lampi zonzia uh a kituakloh lam theilo uh a, Kumpi phalna Lai tawh kituak in gencianna a va kineih ciangin tel pan uh ahih manin innlam zuan in ciah kik uhhi. “Ngalbual pan Tuithang kawm nading Tungzang lam om khin gige napi’n hih lamthak hong kizongsak mawk mah veh aw” ci-in lamzongte atamzaw in gen uhhi.

More: Tungzang Global Association in MTI & TID te huhna pia

Hih lampi tawh kisai makaite tungah anuai a dotna teng kidong ding hi.

• Bang hangin Kumpi phalna Lai sung a bangin semlo?
• Tungzang gamsung nawk dingin gam uk Hausa’ phalna omlo in bang ha’ng sem (Hausa khat le khat kizahtak lohna tawh kibang)?
• Ngalbual leh Thalmual kikal kikawmna a omsa lampilui bang ha’ng puahlo?
• Ngalbual leh Thalmual kikal lampi ci napi’n bang ha’ng Tuithang manawh in lampizong ahiam?
• Hih lampi in Thalmual Khua manawh lo-in Tuithang a manawh pen Thalmualte lungkim hiam? Tungzang Times