2020 Election hunding Union Election Commission ah akihel khatin genkhia

2020 Election hunding Union Election Commission ah akihel khatin genkhia

2020 Kitel hunding November kha sungmah in kibawl ding hi cih thu Union Election Commission ah akihel U Myint Naing in June 4, 2020 ni-in Media te tungah gen hi. “A hun zui in Cidamna lam vaisai te tawh thukhun hoihtak bawlin November kha sung kitelna kibawl ding hi. A ni kigen cian theinai kei ven Party te Vote (Mee) zon hun hoih pen ding hun kigel ding hi’’ ci-in gen hi.

Kitel hun ding ani pen abeisa 2010 Kumin Kha 2 leh ni 24 ma in kitangko a, 2015 Kumin kha 4 ma in kitangko ahi hi.

Tulaitak Tedim Township ah Party 7 om in vote (mee) khia thei mimal 61000 val om a, Tonzang Township ah party 8 vote (mee) khia thei mimal 20000 kiim om hi cih Township Election Commission zum pan kiza hi.

Tedim Township a om Party 7

• 1. NUP (United National Party)
• 2. USDP (Union Solidarity and Development Party
• 3. NLD (National League For Democracy
• 4. UDP (United Democratic Party)
• 5. UBP (Union Betterment Party)
• 6. ZCD (Zomi Congress For Democracy)
• 7. CNLD (Chin National League For Democracy)

Tonzang Township a om Party 8

• 1. NUP (United National Party)
• 2. USDP (Union Solidarity and Development Party
• 3. NLD (National League For Democracy
• 4. UDP (United Democratic Party)
• 5. UBP (Union Betterment Party)
• 6. ZNRDP (Zo National Region Development Party)
• 7. ZCD (Zomi Congress For Democracy)
• 8. CNLD (Chin National League For Democracy)

Source : 7Day News/ The Tedim Post

Hornbill Nursing Home zato kihong kikta

Tedim Khuapi, Sakollam Veng a om Hornbil Nursing Home Zato Covid-19 nantna hang in aki khak phot hi a, June 2, 2020 ni akipan ki hong kikta hi, cih thu Hornbil Nursing Home page tungtawn in kiza hi. Zato kilakte kidop ding leh zuih ding thute in anuai a bang hi.

• Kiphu ngeingai lo ding
• Cisa tehna munah cisa teh ding
• Khutsawpna munah khutsawp hamtang ding
• Muktuam(Mask) bulh hamtang ding
• Tutna aki ciangtan na munte bekah tu hamtang ding
• Cina leh cina kem 1 lobuang Zato sungah midang lut theiloding cihte ahi hi.

Hornbil Zatopi pen Tedim Khuapi sung bek hilo khua kim/khuapam Khual gamla pan nat leh sat a om ciang kidelh zel a, mipi in ih phattuam pih mahmah damna phualpi khat ahi hi. The Tedim Post

Mizo gamah Covid-19 natna ngah mi 12 ki muhbeh

Mizo Gamah June 1, 2020 nitak lam hunin Covid-19 natna ngah 12 kimuh beh hi, cih thu kiza hi. Delhi pan aciah mi 10 leh Kolkata pan aciah mi 2 hi uh a, Numei 11 leh pasal 1 akigawm 12 ahi uh hi.

Natna ngah mi 12 te June 2, 2020 zingsang nai 5 hun pawlin Zoram Medical College ah kipuak pah hi cih thu zong DIPR-Mizoram tungtawn in kiza hi. Mizo gambup Lockdown hun June 30, 2020 ni dong kikhan to a, Curfew hun pen nitak nai 7:30PM pan zingsang nai 4:30AM dong hi cih kiza hi.

A beisa March 25, 2020 ni-in Mizo gamah natna ngah 1 kimu a, tu-in natna om nawnlo ahihmanin zato tuak khin hi. Manipur State ah zong Natna ngah 83 kimu a, 11 damsiang in zato tuak khin cih thu kiza hi. Source: DIPR-Mizoram/ The Tedim Post