Vondeih Kep Ding – 117 (Dimno’ Pa)

Dear Tawngno,
Dam in laikhak hong gelh kik ing. Kong genngei zel mah bangin kong gen thu khempeuh ciing in na zui gaizo kei zong, khatvei limlim a sim in hong sim sak peuh le cin lungkim khin ta ing. Tulai guahtui kiat nuai-ah nat leh sat tam ahih manin na vak suk, na vak tohna, na nek na dawnte uh na kidawm un!

Nung kal sun khat banghang hiam thei keng! Lungzing in lungkia ngeungau in inn ah kei guak ka om hi. Tua leh sabuai tunga laibu om khat phen in ka sim leh tangthu tomno khat sim kha in, tua in ka tha hong dim kik sak hi. Hong hawmsawn nuam ing!

‘Khatvei Saipi khat leh Uipi khat a naupaai hun uh hong kibang hi. Kha 3 khit ciangin Uipi hong suak a, ta 6 hong pha hi. Kha 6 hong cin ciangin Uipi-in nau hong paai leuleu a, kha 9 a cin ciangin a nih veina hong suak kik a, 12 hong pha hi. Tua bangmah in hong pai toto-a kha 18 acin ciangin a thum veina nau hong nei leuleu hi. Ahi zongin Saipi ahih leh suak nai lo-in, a nau hong paai kengkang lai hi.

Tua leh Uipi-in Saipi kiang ah, “ Hey! Saipi! Nang nau a paai takpi mah maw! Ke’n thumvei bang ta nei khin in, tu’n a suak masate bang golpi pha khin ta liang hiven! Nang tudong a paai paai lai mah maw!” hong ci hi.

Saipi-in, “ Nong cihnop thu tel mah ing. Ahi zongin ke’n ka gil ah Uino a paai hi lo hi’ng. Ka sunga om nau pen Sai hi. Ui hi lo hi. Khatvei nau ka paai pen kum 2 sung sawt a, hong suah tak ciangin zong leitung in hong theih pih hi. Lampi ah a pai ciangin mite in muhnop sa in, khawlphot liangin en uh hi. Tua zah in a vanglian, mite lunglut nau pen paai ka hih manin hih tan ta, a sawt hi ing,” ci-in hong dawng hi,’ ci hi.

Tangthu gelh pa in hih bangin gelh suk lai hi.

“Midangte lawhcing in a gualzawh laitak, na lawhcin nai loh hangin lung neu in om tuan kei in. Na lametna beisak kha kei in. Na tupna dang sak tuan kei in. Gualzawhna lianpi i ngah theih nadingin lungkia lo-a hanciamna leh hun tampi bei-in, ngak zawh ding kisam hi. Na ngah ding gualzawhna leh lawhcinna pen midangte abang hi lo-in, midangte a sangin a nasia zaw, a lian zaw ahih manin na hun a sawt hi.” ci hi.

Tua ni-in hih tangthu leh laigual in ka tha hong dim kik in, hong tha khuah sak kik hi.
A mit dekdek ka lametnate hong tawhkuang kik hi.

Tawngno, khat veivei ciangin innkuan tawh om lohna, mundang mi gam mi lei ah kei adingin ka lawm hoih penpen in laibu ahi tam, ci simsim ing.

Hong phawk,
Na Pa
June 20, 2017