Malaysia palik te’n Sabah ah migilo kipawlna makaikhat kaplum

Malaysia palik te’n Sabah ah migilo kipawlna makaikhat kaplum

Malaysia, Sabah State sungah Curfew Hours hunsung in Security Force te’n mikhat kaplum uh cih NTS pan kiza hi. Tuni Monday (Dec 04) zingsangtunglam in aki kaplum ci a, tua aki kaplumpa pen miman in sumtawh akitansak Abu Sayyaf Groups kici migilo kipawlna tetawh akizom khat kici hi.

Police te genkhiatna ah tuapa pen kum 31 aphakhin khat hi a, aminpen Abu Paliyak ci’n pulakkhia uhhi. Komander Paliyak @ Yusof ci’nzong amin atuamin nei kici hi.

Hihpa pen abeisa hunsung inzong tuipi tungah guktak gamtatna, buluhna Robbery leh Kidnapping vai tuamtuam agamtatna tawh matding in akizongzong, Wanted List sungah akikoih khat ahihi. Abeisa kum 3 hunlaipawl inzong Sabah East Coast ah ngakhawina Fish Farm Breeders te mancip in sumngetna vaitawhzong matding in akizongzong khat ahihi.

Tuni zingsanglam 3am hunpawl in Pulau Kantung Kalungan kuamsung ah Security Forces te avakkawikawi laitak in amuhkhiat uh cihi.

Sabah police commissioner Datuk Ramli Din in agenkhiatna ah hihpa pen Philippines tawh gamgi kuamsungteng ah gitloh gamtatna Crime tuamtuam abawlden khat hi ci’n genkhia hi.

Tuzingsang inzong Eastern Sabah Safety Zone sungteng ah bangci bangin mi mantheihding omhiam, Security Forces te banghunteng ah vakzel uhhiam cih a encik, Monitor in aomlaitak in aki mukhia cihi.

Tuzingsang in Security Forces te’n tuipi tungah Boat khat leh mikhat atuang mukha uh ahih manin, muanmawhhuai sapah uhhi. Tuaciang in Security Forces te’n nehphei uh a, kopen Police hi ung ci’n ki pulak uhhi.

Tuaciangin tuapa pen Boat tawh thakhatthu in taikhiapah a, Security Forces tezong thautawh kapkawm cihi. Tuaciang in Police te’nzong thautawh lehkap kikpah uhhi.

Tawlkhatsung akikapkhit uhciangin tuapa pen Boat tungah asisa in Police te’n mukhia uhhi. Boat sungah Pump Gun kici thau pawlkhat leh thautang pawlkhatzong Police te’n mukhia uhhi.

Apumpi hoihtak avelcian uhciangin hihpa ii pumpi tungah thautawh akikapna liamma mun 9 bangah kimu a, abeisa in thautawh akikap khakna hiding kici hi.

More: Philippines ah IS migilo tetawh akizom te’n Germany gammi khat a ngawng tansak

Nungkumsung December khasung inzong General Operations Force panin Police tetawh Kidnap abawlsawm te Semporna Waters sungah kikapna piangngei a, migilo te 3 ki kaplum ngeihi. Abu Sayyaf Militant Group kici migilo te’n Philippines leh Malaysia gamgidung tengah mi manzelzel uh a, sum tampipi tawh kitansak uhhi. Tukum February khasung inzong Germany papi khat sumtawh akitanlo ahih manin, thatlum ziaumawk uhhi. Sawltak #zomidaily