Naupang thu mangngilhmawh ~ Lian Tuang

Naupang thu mangngilhmawh ~ Lian Tuang

Ka neulai in sakollamveng suang khuanuai lamah lo khat ka nei uh hi. Ka nu tawh sangkhak sim in ka unauteng un ka kuan zel uh hi. Lo ah ahun zui in vaimin, bepum, kawlkai cih bang ka ciing uh hi.

Kawlkai pen ka lim ciin mahmah uh hi. Nek ding bek hi loin a gui zong kel an dingin kazang uh hi. Kawlkaigui ippi tawh pua in pawlkhat kel pia in pawlkhat ka keu sak uh hi. Tua kawlkai guikeu pen khuakhal ciangin kel an in kizang leuleu in lem mahmah hi.

Lolai ah lampi

Ka kawlkai lei uh pen lolampi gei hi in, lampi in kimkot hi. Lokuan vaikuante in khat veivei lampi tawn loin ka lo lai pan ka kantan thei zel uh hi. Tua bangin a sawtsawt ciangin kawlkai lei laizangah lampi khat a pai tawh ong kibang hi.

Ka nu pen heh cihtakin heh hi. Mi lo laizang paipaite kua hi peuhmah hiam, kawlkai guiteng kisiktan in, a lei mahmah zong kheng keii liang hi lo maw ci in amah le amah paupau thei zel hi.

Thuak ta hen

Ni khat lokhuan in kawllaigui ka zialzial hi. Ka nu’n kawlkai toto hi. Ip dim ka ngah ciangin lo lai ah lam kipai pen ka nu’n zadah mahmah aih teh ci in a pai peuhpeuh a awk lianlian dingin Thang ka bawl kawikawi hi.

Ka Thang bawl pen hih dan hi. Lo lai a mi paipaina zawi ngilsa munah lei khuktantanin ka to suk hi. Tua leinuai ah aling akhauh mahmah lingvomkungte ka phah hi. Atungah a kitheilo dingin ciangtawh dal in lei tawh ka vuk kik hi.

Bilbel aw

Ka zawh ciangin kipak mahmah kawm in ka nu ka sam hi. Ka thang bawlte ka lak hi. Ama kiangah “lo lai ah mi apai nawnlohna dingin thang bawl ing. Apaisukte in sikkhaleh muktu in kipai lian ding hi. Apaitote in sik khaleh lingvom in sun gawp ding hi” cih ka gen hi.

Ka nu nuam ding ka sak leh ong heh mahmah zawsop hi.” ken lolai a mipai ding a deihlo bek hi ing. Mi liam mi bai na ding deih zenzen keng. Tuate lakhia kik oo. Mi pailoh nadingin lo nawl ah dai bawl pah lecin hi pah lel lo maw” ong cih san hiau hi. Ama cih bangin ka thang phelkik in dai ka bawl hi.

Nuapang thu mangngilhmawh

Tua pen ka tan 6 kum hi a, naupangvai takin ka nu lungsim lamdang ka sa mahmah hi. Ama hehna ding a piangsakte tuahsiak ding pen deih het loin heh ngap zawsop ahih manin tel hak ka sa mahmah hi. Ka lungsim tawngah ka nu lungsim hoih kasa mahmah hi.

Hih thu in tuni dong ka gamtatna khempeuh ah ka lungsim ong phawng laklak thei den thu khat ong suak hi.

Lian Tuang
(14Oct2017)
Photo: Ever Zomi