Minam vai tawh kisai kuppihna
Guai,
Hih thu tawh kisai in ka telloh pawlkhat om veh aw. Ih gen ciang Zogam tulpaan kai, Zogam in ong lam-en, Zogam a itte, internet khawngpan a a singamte koi ah om… etc.. etc…
Ahih leh,
Kuakua gam 3na gam 4na i tung zong in Zogam ah a gilkial a dangtak khempeuh ki phakvak zo hetlo ding a, Zogam bup khuttung lumleh bang a a lumlet zo ding kuamah om hetlo ding mah ahi hi. Zogam ah mihau pen icihte zong mi’ gam a kuama’ phawk khakloh company neuneu te’ neihzah zah zong kinei zo lo lai hi. Gamdang tung a a nuamsa mahmah ding isakte zong mi’ nasem mah nahi lai veve hi. Mimal huhna leh panlakna tawh bel bangmah a piangzo lo mah ding ci ni.
Tuakhit ciang, kipawlna tuamtuamte e le? Bang dia Zogam ong enlo ong huhlo uh hiam?… i ci leuleu hi. Ahi ding bangkhat himah hi.
Tua ahih leh,
1) Zogam ading in ong huh kei uhteh, ong vaan kei uhteh aci te’n koimun ah ong huhlo, ong vaanlo asa ihiam? Bang thu ki vaihawm a ong kihuh lo ahi hiam?
2) Sep le bawl ding thu le la khat peuh aki vaihawm om ahiam? Huhding, panpih ding ahih leh zong, koimun ah bangvai om a, kua huhna kisam cih genkhiat tangko khiatna a om hiam? Aki tangko, huhna kingen gegu ong kihuh lo, ongki panpih lo mah ahiam? Ongki panpih nading in tua huhna i ngetnate bang kuppih a, bang vaihawm pih ihiam?
3) Kei’ theihna ciang ah ikhua itui ciat in sep le bawl ding khatpeuh a neih, a vaihawm leh gamdang tung khuapih tuipih ciatciat in amau hihzawh zah ciat in hanciam lingling sam in thei ing. I minam bup huam ding in bang vaihawmna i nei hiam? Kei bang in tu ciangciang Kawlgam sung a om kipawlna leh pawlpi tuamtuam pan minam bup huam ding a vaihawmna leh nasepna, tua vai ding a huhna ngetna tam a theikha phalo, a zakha phalo hi mai ing.
Ka theihkhak sunsunte ah gamdang pan hihtheih zah in kihanciam sa ing. Gentehna in, ZYA mawtaw, TYF mawtaw, 914 Zomi vai, Haleluijah pawipi, Cope kum 100 cin pawi, mincim huhna, Mautam huhna, tuahsia huhna… etc … etc… ( Note, ZNC/ ZCD nasepna pen party nasepna ahihman in mipi khempeuh tawh a kisai pawl a om hang na khempeuh ah kisai khin den taktak lo hi. )
A tung a igen huhnate Kawlgam pan in bangci bang in kizang, kizeek hiam cih i ngaihsun ngei hiam? Tu’n ee le?, kua kipawlna in bang vaihawm a tua ding in kua in ong huh zo kei nung ci ahi hiam?
Zogam it leh ngaih man in, Zogam/ Kawlgam a om Zomite’ vaihawmna ahi lo bang vaihawmna ki nei ahia le? FM station ki hanciam. (LZI ). Khangthak Zomite kimeltheih a, kipumkhatna leh ma pankhop theihna a khan’ nading lunggulhna tawh i gam a inntek khangnote tawh ma pangkhawm in Zosuan Tuailai Khawmpi ki vaihawm.
Mimal in bel na sanggam u le nau leh meltheih tanau ahih kei buang leh ong mal huh khollo kha thei mah ding hi.
Hihbang a vaihawmna te i gen hang in zong mi khat le khat i deihna, thupi isak, i lunggulh kibang khin zenzen lo ahih man in ei’ ngaihsut bang in zong ma kipang khawm thei khin den lo lai ding hi.
Bangbang ahi zong in Kawlgam lam pan i minam bup huam in bang vaihawm nei ihiam? Bang/Kua kipawlna pan in bang vai nei ihiam?
Ong gen pongpong dih vevua le guai… i theihloh pi zong bangci kihuh a ki panpih thei mawk ding ihia le?…
Pau Khat Suan
Comment piaknop aomleh...