Theih huai thu pawlpawl ~ Evan. Suangh Dal

Theih huai thu pawlpawl

1. Mite in a pahtawi teh thupi a sa thei pan pawl om in (quantity),
thupi sa ahih manin a pahtawi thei pah pawl ki-om hi (quality).

2. Pil ahih manin ciaptehna a pia pawl omin, ciaptehna (degree) kipia
pongpong ahih manin pil hi, a ci pongpong pawl zong om hi.

3. Gam le lei adingin nasem (polititian) te pahtawina tawh amaute “Pu”
a kici hi a ci pawl om a, a neu tawh a lian tawh gamvai nasemte pu va
kicih pahpahna in Zopau “Pu” cih ii a thuthukna susia a ci pawl om hi.
Zomi te pen tawm khat na lian sem kisa pian lehang “Pu” a kici nuam
pian pah vive tawh kibang a, a taktak in “Pu” cih kammal sangin
“Taang” cih kammal zang lehang Nai-ngan-zi tawh a kilawm zaw lai ding
hi, a ci pawl zong om hi.

4. Ih kong khawng a singkung nim dihdiah khawng phuk in navaak suah
pah ei cih hun panin, puk het lo zawin tua a nim dihdiah singkung
hangin navaak zaw hi cih hun hong tung ta hi. Khal (summer) hun bek
ading ngaihsutna tawh hih cia hong phak nading kum (20) bang ih ngak
singkungpite phuk ding hi lo a, khua hun (cold season, summer season,
rainy season) nam thum tawh mu khawm a, singkung phuk het loh ding hun
hi ta hi. Ih phuk leh zong a kilawmna mun ah suan kik hamtang hun hi
ta hi. Tawmvei sung bek ading muhna tawh phuk ding hi lo a, hih khua
hun thum ah muhkhopnna tawh khua mu a, singkung it mahmah ding kisam
hi.

5. Gam makai ding mi khat huih lak pil bek loin, a lei pil mahmah ding
kisam hi. Leitang ii tunga sep ding puah ding a kisamte a mu masa pen
ahih ding kisam hi. Hausa, upa, ukpi, MP makai sem nuam khat in a kong
khawng ah hawklam (draining system) a kisapna, singkung mawk phuk loh
ding a thupi-na, lampi hoih ding a kisapnate a muh a theih kul a, tua
banga a kong lam pi hoih loin, hawk lam bawl nuam loin gam uk makai a
sem nuam mipa pen huih lak pil bek hi a, leizui pilna nei lo ahih
manin, muan huai lo ding hi.

6. Mihingte ih buaina pen ih theihna a kicin zawh loh man hi lo zawin
ih thupi sim nop loh man hi zaw hi.

Evan. Suangh Dal