Malaysia ah palik khatin innluh in van guksawm ahih manin kiman

Malaysia ah palik khatin innluh in van guksawm ahih manin kiman

Malaysia, Bangi vengsung ah avengte inn aluhsak guta khat kiman in, aki kancian ciangin tua gutapa pen palik khat nahi cimawk hi. Palik zong palik mawkmawk hilo in, Senior Police Officer khat cisawnsawn hi.

Bangi, Taman Bangi Avenue sungah zanhal Thursday ni in thupiang ahihi. District police chief Assistant Commissioner Ahmad Dzaffir Mohd Yusof in agenkhiatna ah nitaklam 5pm hunpawl in thupiang cihi.

Innsung ah guta om cih palik te aki zaksak ciangin Bangi Police Station panin palik honkhat in delhpah uhhi.

Guta om cih aki zaksakna atun uhciangin palik te’n a innkimteng velpah uh a, innnung kongkhak pen akibalsa in mu uhhi. Tuakhit ciangin innsung ah pasal khat temta tawisa in, inntung kahlei pan kumsuk hi. Tua gutapa pen avan agukteng tawh apaikhiatsawm hi a, avanguk tengpen ipsung khatah apuaklian laitak in kiman hi.

Palik te’n amatsawm cianginzong mantheipaklo, palik te na lehdokik ahih manin, tawmvei kilaiphot uhhi. Ahi zongin palik te’n manzo veve uh a, Kajang Police Headquarters ah thudotna neiding in paipih uhhi.

Tua gutapa pen hoihtak thu dongcian in asitsit uhciangin amahzong palik khat nahi cimawk hi. Palik mawkmawk zong hilo in, Bukit Aman ah asem Senior Police Officer khat cisawnsawn hi.

Tua palik gutapa pen kum 31 gualpawl kici hi. Avengpa kum 45 aphakhin khatpen Financial Advisor nasep asem hi a, nasem in akuanlaitak a innsung aluhsak ahihi.

Related: Thailand ah Myanmar pasal khatin azi mipi muhtang in temta tawh dawtlum

Avan gukte pen Computer leh Smartphone pawlkhat agu kici hi. Hih gutapa pen “Section 457 of the Penal Code for house breaking” thukhun tawh kizui in ni 4 sung kikemcip photding a, tuakhit ciangin thusitna Court ah ki neikikding cih kiza hi. Palik khempeuhzong mihoih, migina hilo cih hih thuthang in honglak hi. Sawltak #zomidaily