Why them: Banghang Mi hi sese?

Why them: Banghang Mi hi sese?

Pianna gamlei nusia-in, matlehhen, sihna ciangdong tuak-in, simmawh-bawlsiatna ih thuakphialzong, Mi gamlehlei kizuan sese. Pianna nulehpa leh itlehngaihteng nusia-in, theiloh Mi-te kizuan sese

Ih gamlei ah omsun leeng zong enneu in, Mi-gamlehlei enpizaw sese. Sanggam laizom ommah leh zong, Mi-dang phuncingzawsa sese

Khat leh nih omkhawm leengzong a sawtlo-in kikhendingbek ngaihsun in, Mi kipom nuamzaw sese

Phattuamna ding khat omleh ei leh ei sang’ Mi dang kipianuamzaw sese. Zaa kikim veve zong eisang’ Mi zahtaakzaw sese

Sepzawh leh septheih kibang taleh, Mi muangnuamzaw sese. Sep kibang veve zong, Mi-sep enpizaw sese

A pil-asiam khat omleeng zong, Mi-dang khat hileh a phatphatding kimlai, thaneemna kizong in, kiko nuam sese

Taangh-theipian, citheipian ding’ kithawileeng sanggam behlehphung, ulehnau teng kobawl masa in, Mi-te hong peipuang’ na-ngawn kipaakzaw laideep sese.

Gamlehminam aa ding kipia khianuamlo napi’ a kipia khia sunsun te panpih lo-in, Mi-dang pawlkhat panpih sese

Ei leh ei, Mi-dangte tung kikhiatloh-kiheekloh-in, ankam limlo bang sese. Sepkhopding khat omleh, Mi tawh semnuamzaw sese

Ei leh ei kikhual-ki hehpihding sang’, Mi khualzaw leh Mi-hong hehpihding ki-utzaw sese. Kihuaiding khat omleh, Mi-huainuamzaw sese

Kikep kidalna ding khat omleh, Mi-dalnuamzaw sese. Paikhopna ding khat omleh, Mi-tawh tonnuamzaw sese

Nekkhopding khat omleh, Mi-tawh nenuamzaw sese. Hong kigengen taleh, Mi-genkhat umnuamzaw sese. Ki hilhhilh ta leeng, Mi-zuaupi khat sang’nuamzaw sese

Keingahloh veve kalawm kagual in ngahhohleh cilo-in’ Mi-dangkhat ngahding utzaw sese

Lawmlehgual in hong samsam taleh, Mi-dang khatpeuh tawh hun mawkbeisak nuamzaw sese

Lawmlehgual in hong kaaikaai taleh, Mi-dang khatpeuh vadelh hoihoi nuamzaw sese. Itlehngaih in anlimci hong piapia taleh, Mi-dangte cilphihphih khat duhhuaisazaw sese

Hong-it, hong kideihsak in mailam khantohna ding’ hong kikuppih taleh, Mi-dangte hong suksiatna ding’ lam vazuannuamzaw sese

Ih khantohna ding, mikhutnuai pan suahtaakna ding’ mainawtkhawm ding-in hong kizawnzawn taleh, Mi hong khenkhapna ah lungtaizaw sese.

Kipawlkhopding a vaihawmhawm om taleh, unau sanggamkhat gige kigensia, kiko in, Mi-dang khatpeuh pahtawinuamzaw sese

Taangpi tutkhop khawlkhopna khat omleh, Mi-dang te samsam napi hang’ eilehei ki toto sese

Ei leh ei kikoko kitoto napi hang’, Mi-dang kuathusim meelloh khatzong vamai-et duldul sese

Ih theihkim paulehlai mah thupisak dingsang kicici taleh, thupikei hong kicihsaklo na pi-in, ka khua katui- ka-awkaih mah kici masa hamtangnuam sese. Sanggam unau, piilehpu, behlehphung kibang citciat, kampau awkaih leh tenna munlehmual siksan in kidangbawl in, Mi-namdang khatpeuh vaihawmna, kiphungvuh nuamzaw sese

Eipau eilai sang’ Mi-nam dang te aa, nuamsazaw sese. Ciikhat sakhat veve, Mi-namdangdankhat ki-ut kitangnuam sese

Mikhutsung kidenna in, pulehpa gam na-ngawn neithei nawnlo, utbang in zeekthei nawnlo-in hong koihuh hang, tua Mi-te lo-in cihkullaisak sese

Neksa zahtaak leh ankuang kitap ding lau-in, Pute’ miphuahloh pi’, Mi minpiak peuh tawh kipaaknuam sese. Zosuan Zota cihding ki-ut tek napii’ Mi ki cinuamlo citciatlai sese.

“Mibawl in ih sia kei aa, ei leh ei kibawl in ih kisia hi” cih kampau ih nei hi. Temsiamte’ temtawh si aa, tuisiamte tui-in si hi” zong kici hi. Ei leh ei kikal Lungkimlohna te kimaai saklo in, Mi-namdang te thupisazaw in, ih phungvuh laiteng, sihlehman-lam manawh ih hi pelmawh ding hi.

Khutkuaktkhat zong dimlo, vakhutui a bangding, vaphual-nupa abangding kimlai, a beisa hun aa- khasiatna te’ suutsuut in, sindam-tawldam zolo-in natnagilvei bang-in, kitoto nilohleeng, kua-in ih maban nazom ding hiam? Kua-in ih suanlehkhak te mapii-lamlak mawk ding hiam? Dongtuak unau sanggamte kua-in en-in phaamding hiam?

Eimahteek tho-in ih kalsuanloh in ki mainawtzo taktaklo ding hi. Mikhuttawh gul kimanthei khamah ding hi. A hizong cinlehkep-dan ihsiam kei-leh hongtu-in, cimawh-haksatna hongtunthei kha ding hi.

Bangbang hileh, hunkinei tek-aa, eihunzong khatvei teeiteei hong tungsam ding hi. Ih thahat laitak a hihlehzong zatsiam in, “Ko beh, kohaam, amau tua beh-tua haam ” cilo-in, khual leh tual-leitung muntuamtuam ah gentheih haksatna a tuak sanggam khuapih-tuipihte’ thungetkhopna aa kipan, ih hihtheih-bangtek in ki panpihhuai-mun ah ih om hi.

Gamlehleitang , sanggam, minam neilo hilo napiing hang, Mi-gamlehlei ah gulsih-thaamsih pawlkhat ki-om sese.

Pu Zo aw, hong tho dih-inla, nasuan-nakhakte hong kaaikhawm dih ve. Unau takpi kapau, kahaam ciangbek-uh suang in mittawbang-in kaomta uh hi.

Israelte’ Pasian, Ka Pasian uh aw, tuuciingsiampa bang in, nata-te lumbang hong hung inla, Zogam, Zolei , hong paallun sakta in. Hong kikhenthaang sak thuvaihawmna, seplehbawl, thulehla te’ kadalzawh nading-un, thakhauhna hong guan in.

Nang hong um leh hong zahtaak gam-uk, gam-makaai, minam-makaai hong pia in. Banghang pampaih-nusiatbang in, omsese ka hi uh hiam? Nantal’suan (Malaysiagam sung aa kipan lamkaal muntuamtuam ah a mangthangh-pawlkhat te’ phawkna lianpi tawh)