Naupang khat aneulai in lampi maan tawnsak lecin, ateek dongin lampial nawnloding hi (Pau 22:6)
Hih Lai Siangtho mun pen tate’n theih leh zong hoih mahmah a, tate lohngah sak ziau ding hilo in nu leh pate’n i theih/nuntak pih ding Lai Siangtho mun na hizaw hi cih kigen masa nuam hang.
Nu leh pa te in a tate uh Pasian’ deihna bang in kisin sak ding leh khal dingin a mau leh amau ki-ap ding uh hi(Pau13:24,19:18,23:13-14,29:17,22:15).
Naupang te pen a sia, apha a khen theih ma, a lungsim uh a sian’tho mahmah hun laitak in lampi maan i tot sak theihna dingin Pasian thu tawh pantah ding ahi hi.
Hebru pau in”lampi man tawnsak” cih kammal in”ap”a cihna ahi hi. Tua bangin Khristian nuntakna sunga ngimna in, i tate Pasian leh ama deihna tungah ap ding hi a, leitung gitlohna tawh kikhen in Pasian deihna tawh kituak in lampi maan totsak ding ahi hi.
Kammal dang khat in gen le’ng, “ciamsak, sinsak” cihna ahi hi. ciamsak, sinsak cih ciangin Pasian deihna in bang hiam cih te pawl leh Gupkhiatna thu tawh ki pawl, itna thu te sinsak ding hi-a, leitung thu tuamtuam leh kamhoih lo, muhdahna, hazatna cihte leh siatna tuamtuamte pawl sinsak, theihsak khak hetloh ding ahi hi.
Tate in ama thu tawh Pasian zong tawm in Khathu lamah a ki mangngilh theilo, lungkimna leh nopsakna angah theih nading un, nu te pate in a hanthot ding uh kisam hi. Nu leh pate in, a tate nipi sang(Sunday School) kahsak hamtang ding thupi hi. Tua in lampi maan totsak nading kal masa ahi hi.
“Ateek dongin lampial nawnlo ding hi” cih kammal in a cih nopna ah, limtak in a ki pantah naupang in nu leh pate’ hilh Pasian deihna lampi pan in pial nawnlo ding cihna ahi hi. Ahi zongin Pasian a zahtak nu leh pate’ tate khempeuh in Pasian leh a kammal tungah thuman suak ding hi cih theih hi tuanlo hi. Banghang hiam cih leh Pasian a zahtak nu leh pate in amau Pasian zahtak mah bangin, tate in Pasian a zahtak theih nading un, ahilh, a pantah kei uh leh amau hoihman in tate hoih kici thei tuanlo ding cihna ahi hi.
Nu leh pate pawl khat in, amau mahmah Pasian thu lamah na ki pia zolo uh ahihman in, tate’n bangbang hih taleh awlmawh lo in, a ut bangbang un omsak thei uh hi. Pasian thu tawh pantah se lo, nipi ni hong tung leh Sunday school kah dingin a sawl malak in, kimawl ding ahih kei leh na dangdang khatpeuh hih dingin sawl zawlai thei mawk uh hi.
Tate sunday school pai ding, kikhawm ding kimlai kimawlna khawngah paipih, nadangdang khat hihpih, amau utna-ah paisak lel, paipih lel cihte pawl pen nu leh pate’n izat khak leh mailamah ei nu leh pate mah i lungkham in i khitui hong luangkik ding hi. Tua bang teng tawh hong khangkhia tate pen nu leh pa te mah lungkham nading, maizum nading hong hisuak kha thei ding ahih manin a hun om lai, i pattah theih lai-in, i tate lampi maan totpih ni.
Tate pawlkhat in, nu leh pate a it ding zahun it zolo thei hi. Banghang hiam cih leh nu leh pate’n tate tungah thuhilh ngeilo, pantah ngeilo, thu hilh sunsun leh ahoih lamlam hilh in tuate pen nidangin hong simmawh ngeite hi, hong tua ci baalte uh hi, cih bang peuhin ahoih lo lamlam kihilh kha thei hi. I tate pen thuhoih lo peuhmah hilh khak hetloh ding, theihsak khak hetloh ding ahi hi.
Tua ahihman in, nu leh pate in tate a pattah kei leh Pasian deihna banga, nungta zo ding tahoih haksa mahmah hi. Na tate in lampi maan tawnin Pasian mizat a suah theih nading leh Pasian deihna lampi panin a pial hetloh nading in pantah in la, thungetsak den in, a ihmut kaal un thupha pia zelzel in. Tua bang hi leh a teek dongin, lam apial ngeilo ding ta muanhuai na nei ding hi.
“Hanciam leeng hizo dinga, hanciam kei leeng hithei lo ding hi.”
Topa’n hong telsiamsak ta hen. Amen 🙏
Khazih sungah, David Tuang
Comment piaknop aomleh...