Zomi tung-ah Saanna Nam Namnih

Zomi tung-ah Saanna Nam Namnih

Zomi Sisanpih Ngaihteng,

Zomi minam muhlehsaanna nam-nih bekbek om-a, tua nihte bangci luankhawmding cihthu lunggulhna-in themcik suutsuk dihni: (“Saulua” ci kei-un, Laaizomte-aw, minam-vaai genloh thu nengno khat nangawn laaibu maai 300 nuai tam nawnlo-hi, lungduai-a laaisim kisin tapeuh ni-maw)

Muhna Nam Khatna:

“Zomi” cihciang-in,

Asho,

Chin,

Cho,

Dai

Dim,

Gangte,

Hmar,

Hualngo,

Khuangli,

Khuano,

Khumi,

Kuki,

Lai,

Laizo,

Lautu,

Lente,

Losau,

Lushai,

Mara,

Matu,

Mizo,

Ngawn,

Paite,

Saaizaang,

Sihzaang,

Simte,

Teizaang,

Thahdo,

Vaaiphei,

Yaw,

Zahau,

Zangiat,

Zo,

Zotung, (Laaibu en-a ka-teisuk hilo ahihman-in tampi kisam laai dinghi).

Tua baan-ah, Mizoram State buppi-a, Pangte, Tuikukte-a kipan minam khempeuh.

Naga Minam sung-a nampi giatte leh Chittagong Hill Track, Tripura leh Asam gam-a minam pawlkhat ahuam-in Dr. Vumson’ gelhna ziak-hiam, Zomite’ kizawhna mah-hiam naakpi-in Zomi-pen zaii mahmah-hi.

Leitang Sehna Masa:

Dr. Vumson’ patkhiat-mah ahidiam, tuama-in Pulehpate-in atuaci huam mah-hiam I-theihloh Zogam leitang bang-a akiseh ngeisa gamlei-pen, Chin Dwin River saksiah, Asam gam leh Chittagong Hill Tracts ciangciang, Manipur State leh Nagaland, Hongmaleen leh Kachin State tumlam, leh Minhla, Mimbu, Pakhoko Khuapiseh gamteng huam-hi. Zaii mahmah-hi.

Sepsuahtheih (Practical) etna-tawh:

Sepsuah ziading leh gawmtuah ziading lampi om hileh hih Zomi huamzah nasia mahmah-a, apiicing gam khat ading zoding dinmun himah-hi. Thupi-hi.

Chittagong Hill Tracts-a Zobawm/Bawmzo akici minamte, Asam leh Tripura-a minamte-in Zomi zangei khollo dinghi. Aza zong-in laaina vangvang lodinghi. Kigawmding genna cihthadah Kikaapna nangawn-tawh tuzawh kum 100 inzong piang loding cih kitel-hi.

Manipur State huambit leuleu dingpen Meitei (Kate) gaal mahmah lelhtaak-a neipah-phot, thamlo-in Milipphung (Majority) hi-a, akiim-ah Zomi apom Paite, Simte, Vaaiphei cihte leh Kuki leh Thado omteei napi-in hihteng pangkhawm taleh Milipphung zawhkhumding baihlo cihpen Manipur-a Zomite mahmah-in atheihsa ahihi.

Nagaland State: genvet keimai-ni. Zomi cihpen amau’ veeng-a minam khat-in hongseh khaakleh ahampha hihang. India-ah State aneih thamlo-in Kachin State tumlam Hongmaleen kiimteng-ah dim zihziah uh-a, Kawlte’ sang-inbel hong itbawl zawdeuh cihciang hilel-hi.

Mizoram State: “Zo Nahtrak” cihkhat-tawh politics hong kimawl uh-a, bangbang hitaleh Zomi Movement zong tha hongpia (Pu Zoramthanga, Pu Lalthahawla: diplomatic level ahiliankei zong-in, ZORO personnel Pu R. Thangmawia) cihciang hi-a, minam khat gam khat saatkhawm theihding ahihlohlam kitelmuh-hi. Taangthu tuanthu suut nawnkei photni.

Guunkhawm Khuapiseh leh Minhla, Pakhoko, Mimbu, Pohpa Mual cihte-ah mihing ateengte Milipphung Kawlte hi-a, Zomi cih aza ngeilo, “Chin Soh” hong cite ahihman-in Kaapna-tawh ahihkeileh political kimawlna peuhmah-tawh genvetloh ahihi. Intermarriage system-tawh pang mahmah talehang tuzawh kum 100 ciang-inzong lamet omlo dinghi, banghanghiam cihleh Zomite teeng ngiatlo ahihman ahihi.

Current Chin State: Chin State’ Chief Minister dingpen District ciat-a MP teng’ vote-tawh akiteelding ahihlam I-thei tek-hi. Tedim leh Tonzaang longal lamet valval omlo-hi. Matupi, Mindat, Paletwa, Kanpetlet, Hakha, Falam, Thantlang hihteng-ah Lai MP-te Chin minpua-in amapan mahbang-in amau Chin State buppi tungkim uh-a, Zomite’ Party neihsunsun-in ahihleh Falam nangawn tungzo naailo-hi. Politics-pen kihoho, kimuhmuh, kimeeltheihna-in naakpi-in thugen ahihlam I-theihsa ahihi. Chin minpua party te-in “Laimi” cihkhat-tawh naakpi-in campaign bawlzaw uhhi. Tua ahihteh hih Laimite-pen Zomi cih-tawh thuzawhkhum peuhmahding-pen a-sepsuahtheih (practical) vetlo thu ahihi.

Tu mahmah-a Chin State sung-ah thuneihna abulpipen-ah Zomi khat/nih atuzo phial zong-in, thu-pen thu bang-in hongpai ding-a, “Ko Chin State-a mite Zomi kahi uhhi” ci-in Kawl Gamukte’ kiang-ah gending ci-ni:::: Hakha, Thantlang amasapen-ah hong pangpah dinghi. Chin-mah hong prove dinghi. Ei-pen I-ciakciak kaal-in amau tua political war’ ading-in siamsinna lam-ah naakpi-in kiging-uh ahihlambeek I-phawk uhhiam? “Chin” peuhmah “Zomi” laihding sang-in “Tualgaal” kipan nuamzawding ahihlam I-phawk uhhiam? Politics siam kisa-in “Zomi kici-ni” hong ci-phialmah lehzong meetna I-mu dinghiam? Kawlgam buppi Zomi kici lehzong President tutphah tu-a Zomite-in I-tuhzo tuandinghiam? Minam-in gui nei-a, agui-ah gah-hi.

Amasa Leitang Sehna Sehsuahtheih Hilo:

Zomi pasal khempeuh-in thau tawi-in kipan-mah lehangzong alianpen Chin State I-ngahleh tuaciang atawpna ahihi. Chin Dwin nangawn Tui Kaangpi-a akheel zolo minam khat-in Chin Dwin saksiah, Mizoram, Manipur, Tripura, Chittagong, Asam, aniamlam pan-in Minhla, Pakhohko cihte peuhmah cikmah hun-in ngah ngeiloding kitel-hi, banghanghiam cihleh Zomite akhan-tawh kiton-in midangte-zong khangding angeina ahihi.

Chin State-pen Zomi State-a lading-pen Zomi thautawi athahaat mahmahleh State-mipihte thaumuuk ngat-in, “lungkim-ung” cisak lehang-a, tuateh Kawl Gamukte’ kiang-ah ngetding hong hilaai dinghi. Tualo lampi omlo dinmun ahihi, banghanghiam cihleh Zomite vote-zong ding-in ahihkeileh meekuangluui ding-in Hakha, Thatlang, Matupi…….. lam-ah naakpai lohding kitel silsel-hi. Sialnuh sing suan-in theipi hong gahding-in lamen keilehang pilvaai hi deknaailo-in “mihing ngeisa” hipan laai-hi.

Muhna Nam Nihna:

WZC Pu Zokhup (U Khup) hongcih mahbang-in, keileh Zomi pawlkhatte-in:

Zomi cihpen: Nambul-in suut lehang Beh-tawh kipan ding-a, “pau awkaih”-tawh kisuut theilo-hi. Ataangpi pau awkaih-ah:

Dim, Saaizaang, Sihzaang, Teizaang, Losau, Daapzaal, Phaileeng, Khuano, Zo, Paite, Simte, Vaaiphei, Gangte, Hualngo, Ngawn hihteng “Zomite’ awkaih kidangteng” ahihi. Tua baan-ah, Zogam-ah piang, khang-in ateeng minam tuamtuamte-zong Nationality-pen Zomi ahihi. Zomi aphatuamsak, Zomi-tawh leitang zil-a ankuang umkhawm-a mapangkhawm khempeuh huam-hi. Lahpakding, Seen minam pan-a apiang Tedim-a ateeng, Zomi-tawh avaaihawm tawntung Habawlpa-a kipan……

Leitang Sehna Nihna:

Hih muhlehsaanna nihna-in Zogam leitang-pen Kawlgam lamkaai-ah, Tedim leh Tonzaang Khuapiseh huamteng, Kawlpi leh Tamu Khuapiseh huamteng leh Cikha ciang huam-hi.

Sepsuahtheih (Practical) etna-tawh:

Hih-pen minam khat hihna-tawh sep masak theihding huamna hi-a, tua nangawn Kawlpi leh Tamu Khuapiseh te-nih zawhkhum nading politics siamzek kisam dinghi, banghanghiam cihleh Kawlgam thuneite-in hih te-nihpen Saigaing Division-ah guang khinzo ahihman-in tawlpi khatmah kisual khopding ahihi.

Sepsuahtheih penpending-ah, Tedim, Tonzaang, Cikha huamteng kigawm-a aneupen Autonomous District I-vaatkhiat theih ahihi. State khat-a dinding cihleuleu-pen kal nihna honghi dinghi. AD I-ngah nungciang-in Development Budget/Fund pawlkhat-pen Zomite mah-in hih Zomite’ munlahmual’ ading Central Govt.-ah direct-in I-phuut theih takciang-in State’ ading kiginkholhna (preparation) hoihtak kinei theipan dinghi. AD ngah ciang-in Khuapiseh (Township) ding-a milip leh innlu akicing Laaitui, Kaapteel, Tuithang, Thuklaai, Khuasak cihte Khuapiseh-in bawlding, Khuapiseh hong khangding, tuateng maaiguan-a “State cingta ung-ei” ci-a Zomi State lamkhia theiding ahihi.

Muhna Nihte Etkaakna:

Muhna masa-pen zaii mahmah-a, tua huamsung-a mite peuhmah Zomi akicihding mualmong et sang-in gamla zawtham-hi. Sepsuahthei ziadaan hilo-a, “Mang/Mumang (Dream)” lianpi khat ahihi. Tawmi-in, “Ka’ liim-in khi ok singseng, kenlah bangmah tawhlawh keng” acih-tawh kibang-hi. Aliim avaang lian-hi, thupi-hi, ahizong-in sehsuahtheih hilo-hi. Piang lodinghi, banghanghiam cihleh ei’ sang-a aniamzaw nau bang-a avazolding lah hilo, mi akisa mahmah khinta, ahongki piicingsak phiinpheen khinta thamlo-in Zomi agaalneih mahmahte Zomi-ah thuzawhsawm cihpen practical lo-hi. Hihbang I-suut ciang-in mimal muhdahna, minam huatna peuhmah upmawh lohding ahihi. Kei mimal mahmah-in ka’ lawm Laimite’ hong cihtakna ka’ genzeel ciang-in Pa Nang (Rev Go Nang) bang-in, “Chin Khai cita-ou” hong cihsan zahdong-a amimal-a a-it mi khat kahihi. Minam-vaai agen I-hihman-in mimal vaai upmawh hau pahpah kei-ni. Deihna bulpi-ah, aki sepsuah theilo geelnate lian taleh athu bekmah ahihi. Chin

Muhna Nihna-pen adiak-in Dr. Vumson’ Zo History laaibu-in athuzawh mite-in toii sa mahmahding-a, agam-zong neu sa mahmah khading uhhi. Ahizong-in toiina leh zaiina vaai hilo-in minam leh gamlei thu akisuut ahihi. Hih atoii mahmah khawk neuno khatbeek I-phuutkhiat loh-in, thuneihna akilawm ciangbeek I-neih loh-in alianzaw azaiizaw geelgeel dingpen hunbei, lungsim na, khuakgim longal kilawhtaak loding cihthu ahihi. Tedim, Tonzaang, Cikha tenggawm-in AD ngah nading haanciamna cihpen sisan luan ngangngang kuullo-a kipattheih ahihi. Ngah lehang State’ ading kiginkholh nading-in Khuapiseh khantheih ahihi. Tua ciang-in Zomi State kingah thei-hi. (Zomi State cihbang kilawmkei cise kei-hi. Mizoram acihteh Mizote’ gam acihna hikhin napi, Mizote’ Gam Gamseh – Mizoram State kici veve lel). Piangthei-hi, lampi omhi. Apiangtheilo thute-tawh I’ kuaikuut denkeei sang-in apiangthei leh lampi a-om thute neu taleh bawhzuui masa lehang damdam-in khang-in hong paakpalh ding-a, honggah dinghi.

Muhna Masa thapiaklohna leh Muhna Nihna Thapiakna:

Tuhun-in, bangbang hitaleh Chin State sung-ah Zomi akici vilvelte-in thuneihna nengcikzong neilo laaitak sese hihang. 2014 Census nangawn-ah, “Zomi” kicihding leh “Tedim Chin/Chin/Zomi Chin” kicihding ciang nangawn akinialnial laaite, thutuam kaai-a, thutangpeek kipilsak I-tam mahmah saan laaitak hi sawnsawn-hi. Tuabang-a, a-Zomi akici zawdeuhteng nangawn I-kitukalh gawp hunpi sung-ah “Zomi” hong kicihpihlo luading kisa-a biakna-lam nangawn-ah Pasian’ Maaitang nangawn khual lo-a Z-pan-C alaihgiap mite “Zomi kici sakding, C khempeuh Z-a laihding” cihbel I’ suunmang himah, I’ lunggulh himah, I’ lungdeih himah, ahitazong-in amau lamte bang-in zaleh ciamnuihna-a hongnei lelding ahihteh tawmvei sungbang suunmang sung-ah koihlaai lehang ahoihzaw khadiam!

Bangbang hileh Kawlpi, Mandalay, Yangon nuntaakna nipi kaal 1 beek sinkha ngeilo-a Ciimnuai pan-a Malay or India or Thailand, tua pan-a nunna gualbaan mahmah gamlianpite-ah atungvat khuata mite-pen kona hilo-in tualsung vaaihawmna-ah adongkholh mahmah tampi a-omlam I-theih mahbang-in, muhna masa sung-a bang-a aniampen kahlei tawnlo-a Chin State min kheel giapding-pen kahlei cial tampi kikaan ahihi. Kahlei cial tampi akikaan ciang-in I-tukna lemlian lehbel poilo, kitungbaih, ahizong-in tuto zo deuhlo tak khat-a I’ ngaltaak I-tahtan khaakding lauhuai-hi. Tua ahihman-in, kiniamkhiatna maantak-tawh aniampen pan-in kahtohding kipan lehang, ahun acin ciang-in adawntuai kitung dinghi. I’ kipat kei-a, zaalmang I-‘matmat laailaai mawkleh I’ mangmat-pen Vaantung Gam, I’ omna-pen Ciimnuai-a bii-inn khat’ sung- cihdaan hilel dinghi. I’ muhna hih nam nihte a practical zawzaw encian-in kipan lehang muhna nam-nih akihual hongsuak ding-a, muiibunh mahmah dinghi.

Zomi Pasian’ Thupha!

Zokhai
T. Zokhai ITNA-IN GUABANG HINNA-HI

60 Narr-Maen Drive

Croydon Hills VIC 3136

Melbourne, AU

Tel: +61 39723 0460

Mob: +61 420 800 560