Ahi bangin san theihding kisam ~ Lia Cing Van Kim
COVID natna pan kidal theih nading le a phatuam kibawlna (effective treatment) i ngah theih nadingin kal masa in COVID om takpi banah kizeel ta, cih sang masak ding ahi hi. A banah laugawp ding a hih loh hangin COVID pen mikim in ngah thei, ei mahmah in zong ngah thei, cih sang ding ahi hi. “Natna nei ing” cih amah le a mah kiphawkna (self-awareness) omlo pi-in a thuak natna tawh kituak ding zatui/kibawlna le kidal kholhna dingte kipia thei, kizuisak thei ngeilo hi.
COVID ngah khak zumhuai lo
COVID ngah khak pen zumhuai lo hi. Kidal zawhloh man le pelh theihloh a hang tuamtuam tawh kingah thei himah leh, mi’ neihsa a laak sak guta bangin zum ding hi peuhmah lo hi. Ahi bangin kipulak ding zong kisam hi. Tua hileh i kiim i paam te a khual siam i hi a, tualsung mawhpuak (Societal responsibility) zong ahi hi. (Zum ding cileng kei zong cidamna nasem khat ka hih banah COVID huhna ngah theih nading hanciam mahmah khat himah leng, keimah zong COVID ngah bek thamlo, ka pianna pa in zong hong nusia lai ahi hi.)
More: Genloh a phamawh ta thu ~ Cing Van Kim
Ahi zongin ahi banga sang siamna in a nung sang ah lungsim cidamna hong ngah kik sak baih zaw tham hi. I ipcipna in i lungsim pumpi hong kiam sak zaw hi.
Victim blaming hih lo ding
Mipi te in zong COVID a thuak kha/a sihlawh te le innkuan pihte zong mawhnei bangin galbawl ding hilo a, a thuak kha te mawhsiat ko bawlna (Victim blaming) zong i bawl khak hetloh ding kisam hi. Khentuam bawl loding i cih ciangin va neek gawp ding cihna hilo a, lungsim a na sak thei ding a tuamtuam te bawlloh na cihna ahi hi. A kisukhalo lampi tuamtuam tawh tha kipia thei lua hi. Lia Cing Van Kim
Comment piaknop aomleh...