Minam na it leh Democracy it masa in ~ Pau Sian Lian
Leitung ki-ukna nam tuamtuam om-a a tomin democracy, monarchy, comunisim le dictatorship cih bangin kikhen khia thei diakhi. Tua te lak-ah democracy mah ki deihpen, kizang pen ki-ukna hi-in Freedom House te’ ciapteh na-ah 2019 kumin leitung bup gam 195 lak pan thangah huai tawh, tha nem lai tawh ahih hangin gam 145 in democracy ngeina tawh ki-uk in a dang 50 te pen party khat ki-ukna, galkap ki-ukna, biakna bulphuh ki-ukna le ukpi ngeina tawh ki-ukna cih te ahi hi.
England te makai lui Winston Churchil kamciin khat-ah, “Democracy ki-ukna cih pen a hoih hiau lo ki-ukna nam khat hi. Ahi zongin ki-ukna nam dangte suk sia zawlai hi.” na cihi. Gam ki-ukna tawh kisai mihing te phuahtawm, geeltawm lak-ah kicing hiaukei tase mah leh democracy mah bel a lungkim huai pen ahi hi.
Ki-ukna lam-ah democracy tawh a tonkhawm theipen sumbawl zia-in capitalism ahihi. Hih luanzia te geel-in a neihkhop, a kisam pelmawh laigil (essence) khatin suakta tak-a luansakna cih “a ki mutham lo khut (invisible hand)” ahi hi. Maipha piak tuam neilo, deidan na omlo in politic a uk, a ki piakhia nuamte le summet a bawl nuamte suakta tak a ki helsak, gamtang sakin kidemsakna thupi sakhi.
A pualam pan thatang puah, a pua lampan ki lai helin sawkgawpna (coercion, intervention) tawh democracy leh capitalism pen cidam thei lohi. Hih luanzia tegeel tungpan kingah hamphatna nam khatin a siam, a muahhuai, mipi deih pen-te a ma thu-in ki haih khiakhia (self-detect) lelin, a hoih lo van (product, party, business) te a kipuah man keileh ama thu in beina ahi hi.
Tua ahih manin kidemna khat peuhah a lut mimal, kipawlna (players) teng ading a kikim theithei kidemna phual (level playing field) bawlsakna le a kikhung sa thukhun (rule of the game) te kizuih nading vaihawmna thupi diak-a, tua thukhun sungah mipi te suakta takin khentatsakna kisam hi. Mipi te(citizen, voter, consumer) in lungkim takin a deih, a muan a paaktat teeltheihna, deih keileh nial theihna om ahih manin ki etcik theihna (accountability) om zawhi.
Teelkhialh khak a om zenzen leh zong kuamah mawhsak thei tuanlo pah uhhi. Kidemna-ah a lut te lampan zong kidem pih dangte sang paktat huai zaw, muanhuai zaw ngiat dinmun (competitive advantage) tun zawh nading hanciam kul denhi.
Democracy mah it masak huaina a hang tuamtuam lak-ah a a hang masa-in, democracy thuluan zia a nuntak lohna mun-ah kidemna kician (competition) om thei mahmah lo-in, gam le minam ading mihoih mi muanhuai zong ki haih khia theilo pah hi. Party khat peuhin, “Hih khua teng bel emsa, ollua ding”, cihna dinmun pan “Na sep taktak keh mee kingah lo thei lua himawk ei,” cih dinmun hong tun taktak teh mipi te hampha thei pan dinghi. Kidemna thupit luat manin party khat ki-ukna a zang China na nangawn-in amau Communist party sung-ah kiteelna omsak veve uhhi.
A hang nihna-in, democracy ngeina ah kiteelna tawh kidemna, kikhenna (divisive) tam mahmah ahih manin democracy luanzia a ne zolo gamte, minam te pen kisia zaw, thanem zaw theihi. Iraq gam, Afghanistan gam te le Africa gam te-ah kiteelna om napi gam daih theihna a om tuanloh na hangin democracy paizia ne zo taktak lo-in, beh le phung ultun sak luatna, pau le ham nam khat bek ultun sak luatna cih a kipan mipi in deih-a deih takei leh panmun thatang tuhsawmna cihte hangin kiteelna nei le uh kitapkhapna khauh zawlai hi. Minam bup, gambup in suplawh zaw uhhi.
Ahi zongin party gup tuam nei kilkel lo ding cihna hi hetlo hi. Party deih I neih leh panpih lua kisa limtak puah ding hizawhi. Kiteelkuan teh thatang gup gawp sangin a hun omlai tak party kipawlna mungpi (institution) te puah ding thupi hi.
Party tawh kisai ngaihsut huai pawlkhat-ah, (1) Party makai muanhuai leh kiteelna lut ding mi muanhuai neihna (capacity development), (2) Party kilamzia vaipuakzia muanhuai theih semsem nading geelna (structural development), (3) Gam le minam ading sepsawm thu te leh sepzia dingte kiciat sakna (policy & strategy development) le (4) Belhtak party hihlam sepna tawh lahna (performance indication), (5) Tupna geelna te tangpi tangta teltheih dingin pulak siamna (public relations) cihte le (6) Kipawlpih, bel pawlpih ngamhuai lawmhoih zon siamna (alliance) cihte kisam diakhi.
Tua ahih manin gam le minam ading sepna ah hunsau vaiding i etteh invisible hand zia tawnin rule of the game zuihna tawh kidem ziahziahna kanin a hoihzaw dang omlo hi. 2020 kiteelna naih kikta hi. Mipi-te in, “Galkap ki-ukna liangsang nuam zaw tham ei”, cih theih nading dinmun tun nading pen politician te vaipuak a hi hi. Pau Sian Lian
Comment piaknop aomleh...