Aki lekkim tate etzia/bawlzia
Nu leh pa tampi takin i tate ki deidan kha thei zel a, eilam mintapte ahih kei leh i thu hong mang zawdeuhte a pil/siam zawdeuhte kituam it, kituam bawl kha thei zel hi. Khatveivei ciangin i tate’ sung pan hong lungdamsak deuh, hong lungkimsak deuh leh i thu hong mang zawdeuh cih bang om thei ahih main nu leh pate’ lampan in ahi thei ding mah ahi hi. Ahi zongin i tate’ lampan in tua danin na mulo uh a, ki deidanna ki tuam it/pahtak na leh ki tuam et/bawlna in na la uh ahih manin na khasia thei uh hi.
Joseph zong apa Jacob in, a sanggam dang teng sangin na tuam itzaw a, na lim et/bawl zaw kha ahih manin Joseph’ sanggamte’ in tua pen san’ hak nasa mahmah uh a, naza nuam hetlo uh hi. Tua bang teng hang mah tawh unau sanggam kikal-ah ki hazatna, kilangpanna leh ki muhdahna cihte hong piang bektham loin unau sanggam kikal-ah hih dinga kilawm hetzo zah dongin hong gamta khial uh hi.
Nu leh pate in i tate’ sung panin hong lungkim/lungdam sak zawdeuhte leh a thumang zawdeuhte ki tuam it/pahtak deuh mah hi, ici kha thei dinga, amaan mah zong hipian lel hi. Ahi zongin i tuam itna, i tuam pahtakna cihte i ta dangte’ mai-ah kilangsak lua loin a ki lekkim in pilvang takin i bawltheih ding kisam hi. Thumang zawdeuh, a siam zawdeuh leh hong lungkimmsak zawdeuhte pahtakna i neih ciangin, “na sanggamnu/sanggampa uh hici, tuaci ahih manin hidan in kibawl hi, hidan in kihihsak hi, no zong hidan na ut uh leh hanciam un,” cih danin ahun zui-in bawlzia/etzia ineih theih ding bel phawk gige ni.
Nu leh pate in tate khat ading suahni(birthday) limtak bawlsakin, adang khat ading gina bawlsak lo cihte a kipan, khat ading hun pia zawdeuh, adang khat ading hun pia mello, khat ading van-le-na, silh leh teen leisak adang khat ading leisak mello cihte i kidop mahmah ding ahi hi. Nu leh pate in, i tate’ a kikekkim in i etkim, i bawlkim theih kei leh tate khat leh khat kikal-ah ki hazatna leh ki muhdahna cihte hong om dinga, nu leh pate’ tungah tate hong khasia ding uh hi.
Tate hong khasia in a lungsim uh hong naa leh Joseph ii sanggam dang teng mah bangin seploh bawlloh ding teng hong sem/bawl kha ding uh a, siatna sungah hong nungta ding uh ahih main hibang danin i tate hong om loh nadingun nu leh pate’ lampan, “AKI LEKKIM TATE ETZIA/BAWLZIA” ikisam mahmah hi.
Topa’n nu leh pa leh tate’ kizopna hong cidamsak kim ciat ta hen . Amen 🙏.
Lungsim thusuak, ngaihsutna kiukhat pan,
Khazih sungah, ✍️ David Tuang
Comment piaknop aomleh...