I khentatna thupi mahmah

I khentatna thupi mahmah

Hun khat lai-in tangval khat a lawm ngaihnu tawh kikhen ahih manin naa sa lua in amah leh amah hong kisihbawl sawm hi. Meileng lampi-ah meileng kigawilumsak ding ci-in a pai leh putek khutdawhngen khat mu-a, “pu aw, hibang a khutdawh ngen a, haksa pipi-a na nuntak sangin hih meileng kigawi lumsak in si ziau lecin, haksatna thuak nawnlo ding, vaisiang zaw lo ding hiam, kei zong leitung nuntak haksa sa ka hih manin a kisih bawl dinga, hih meileng lampi-ah hong pai hiveng,” ci-in gen hi.

Putekpa in nui kawm hiuhiau sa-in, “tangvalpa aw, sih ding ut mahmah na hih leh hilai munah meileng na kitaih lupsak zawzen sa’ng, zato ah pai in la, zato a damlo mite’ tungah na pumpi van teng khempeuh amau kisapna bang ciat in va hawmsak in, na sih veve midangte adingin phattuamna a bawl zong hipah ding hiteh,” a cih leh tangvalpa in ngaihsutna thak khat hong nei-a, mi tampitak si nuam loin dam nuam in zato sungah kikem kikhoi in sum tampipi bei-in a kibawl laitak in, kei cidam sitset khat banghangin hibang in kisihbawl zenzen ding ka hi hiam, cih hong kiphawk a, kisihbawl nawnlo dingin khentat in a inn ah hong ciahkik hi.

I nuntakna sungah lungkham haksat luat ciangin, cidam sitset khat kisihbawl ding cih pen ahi thei thu ahih hangin, a hi thei vetlo thu in koih a, i nuntakna ei leh ei pammaih i kisak ding thupi mahmah hi. Nuntakna buppi-ah lungkham haksatna a nei vetlo, a thuak vetlo om lo ding hi. Na khempeuh Pasian’ khut sungah om hi, i ci phial zongin Pasian in asia, a pha khentat theihna ding khuak hong pia ahih manin i mailam nuntak khuasakzia ding, a sia, a pha pen eima’ khentatna tungah kinga hi, cih phawk a, khentatna kician i neih theih ding pen thupi mahmah hi.

Topa’n hong telsiamsak ta hen. Amen 🙏

Ngaihsutna kiukhat pan,
Khazih sungah, ✍️ David Tuang