Philippines, Marawi ah thautawi migilo te makaipi 2 kithatlum

Philippines, Marawi ah thautawi migilo te makaipi 2 kithatlum

Philippines, Marawi khuasung ah gal kidona buaina apiangsak thautawi migilo amakaipi te ki thatlum khinta hi ci’n Philippines Defence Secretary Delfin Lorenzana in tuni Monday ni in genkhia hi. Hih Marawi City buaina pen khatampi hikhinta a, Philippines galkap te’nzong galdo in abuaipih mahmah ahihi.

Tua aki thatlum makaipi 2 tepen Isnilon Hapilon leh Omar Maute kici a, hih migilo makaipi 2 te aki thatlupzia pen akician in Media te tungah pulakkhiatna omnailo hi. Hih amakaipi 2 tepen IS kici Islamic State migilo tetawhzong akizom uh ahihi.

Hih migilo te makai lakah Universiti Malaya panin sangsia asem professor-turned-militant Dr Mahmud Ahmad zong akihel hi a, tuapa pen asihlam kizanailo ahih manin, anungtalai hiding in ki ummawh hi.

Tua Professor papen Philippines, Marawi City sungah abeisa May 23 ni in migilo te’n asimgawp hunlai inzong makai, avaihawmpi khatin kigen a, aki thatlumkhin akici makaipi 2 tetawh vaihawmkhawm in South-East Asia gamsung ah buaina apiangsak te ahi uhhi.

Aki thatlum makai 2 te lakah Isnilon Hapilon pen Basilan phualsa in aom Abu Sayyaf kici migilo te ii makaipi ahihi. South-East Asia gamsung ah IS makai khatzong ahihi.

Adang khatpa pen ahi Omar Maute pen Maute terrorist group kici migilo kipawlna te ii makaikhat ahihi.

Philippines kumpi galkap te’n Isnilon Hapilon pen amatsawm ciangin buaina kipan a, Philippines kump galkap te leh migilo thautawi te May 23 ni akipan akikap ngekngek uh ahihi.

Related: Malaysia ah Security asepkawm migilo tetawh akizom Philippines 7 kiman

Hih thautawi migilo kipawlna te’n Philippines, Marawi City sungah IS Province khat patkhiatdawm, dinsaksawm in ahanciam uh cih kiza hi. Philippines President Rodrigo Duterte zong aki gitlohsak mahmah hangin, IS khutzatte agamsung panin siansuah khiazonai mahmahlo hi. Sawltak #zomidaily