Naungek kha 14 aphapan khatin khitang honkhat valhkha in Operation bawlkul

Naungek kha 14 aphapan khatin khitang honkhat valhkha in Operation bawlkul

Naungek naupang tawh akithuah te’n naupang kimawlna “Child’s Toy” tepen alauhuai aomkhadiam cih etcik gigehuai hi. Northern China gamsung aom naungek pasalno khatin sik hup tawh akibawl khitang (Magnetic Beads) valhkha ahih manin, amau omna panin 300km bang agamla Beijing City ah Operation bawldingin zuatkul cih Beijing Morning Post pan kiza hi.

Tua naungek pen kha 14 bek aphapan hi a, Hebei Province, Qinhuangdao City sungah ateeng uh ahihi. Akipatcil in tua naungek pen acisa in, lualua theizel hi.

Agil sungah Magnetic Beads valhkha cih Qinhuangdao City aom Doctor te’n atheih uhciangin amau septheih bawltheihding hilo ahih manin, anu apa te kiangah amanlang in Beijing Children’s Hospital ah puak un ci’n sawl uhhi.

Beijing Children’s Hospital atun uhciangin Emergency Surgery abawlding amakai Doctor khatin agenkhiatna ah tua Magnetic Beads pen agilsung ah aomzawh ni 5 bang phakhin khading ci a, tuahangin naungek in athuaklah mahmah cihi.

Emergency Surgery aki bawlsak ciangin naungek ii agilsung aom khitang teng ki lakkhiatsak theisam a, ahi zongin thuaklah mahmah hi. Surgeons te genna ah akigawm in khitang 21 ki mukhia in avekin ki hemkhiathei ci uhhi.

Kamsiat kawmkal panin ahuaisiasak sawnsawn ah, tua khitang tepen sik hup ahih manin, khatlehkhat kimat in akual bangdan in omsawnsawn uhhi. Tuahang tengtawh agilzang asunglamzong nasakgawp hiding kici hi.

Beijing Children’s Hospital ah kalkhatsung akikepkhit ciangin tua naungek pen adamsa in akhua ah ki ciahsaktheisam hi.

Beijing Children’s Hospital panin Surgeon pa ii genna ah hihbangdan Magnetic Bead avalhkha naupang pen tamsemsem a, tuate pen Operation bawlkul hamtang cihi.

More: Kha 8 bekbek aphapan buan athuak naungek ii asunglam ah liamna om

Tua naungek ii anu in agenna ah tua kimawlna Magnetic Toys tepen kum 13 aphakhin atapa ii akimawlna cihi. Ahi zongin atangek kha 14 aphapan in namukha in, akamsungah koihkha, avalhkha hiding cihi.

Naupang adiakdiak in naungek tepen kimawlna aneulua, kamsung ah avalhkhak theihding Child’s Toys tetawh kimawlsak hetlohding thupi mahmah hi. Sawltak #zomidaily