Thupi Ihsak Kibang Lo

Thupi Ihsak Kibang Lo

A tam zaw ih tupna leh ih ngimna a kibang phialzongin Thupi Ihsak Kibang Lo sese hi.

“No Pawlpi tebek Vantung gam tungding hileh Van tunggam neu sinteh” cih Tuimang Khua a Pa Go Ngaih Pau in ciamnuih genna ah agen pen ka ngaihsut kik ciangin Pawlpi thupi sak lualiang mitawh kilemloh pih cihzong mi om thei hi. Tuapen Thupi Ihsak a kibanglo na hilel tak hi. Mikhat thupitsak zong gensiatpha dingleh langbawl pahding hihetlo aa, ei thupit sakzong ki liatsakna in neihloh ding zong thupi zaw lai hi.

Africa (Mivom) te HL Electric Centre ah Sangkah a tuahteh hong pai-in van hong enen aa, a vandeih pen a ma ngaihsutna sang’ in hong tamzaw aa, ka pu kiangah aniam theipen bangzah cihhong dongin a niampen a genhangin a ma ngaihsutna tawh ki tuaklo ahih manin hong khiamlai in ci-in ngen aa, atawpna ah Africa mivom pa in kei Sangnau pang hi’ng sumzong neihlo hi’ng hong hehpih in cihdongin ka pu tungah a nget hangin ka pu in kei Sangnau pang ka hikei hi cih na dawng ziau hi.

Ei Zomite zong ih neihlohna, ih pillohna, ih hauna le ih pil luatna te pen mite in hong Thupi ngaihsut kha dinghi cih ih ngaihsut hangin midangte in hong hawlmawh hetlo na hilel tak hi. Ih neulai pekpanin a gentheih ih hiphal zongin mite lak leh minamdang te lak ah ih pholak hangin hong laina ding omtuan lo hi.

Zomite pen khangto taleng, nekding muta leng a thumnuam phadiakte ih hihi. Lungkimloh cihpen Zomite sungah khanglian sakkha hihang. Tuabang ngaihsutna pen Pasian thutawh na kilehbulh mahmah hi. Pasianin a piangna khempeuh te tungah lungkim un, nuamsa un cih hong vaikhak thu zaza napi hangin ih thu-upna te Biak innsung ciangbek ih huamsak nuam hi.

Zomite’ sungah a pilte ih zahtaak siamkei aa, ih Pastor te minphatna ih neihsak nuamkei aa, ih maikai te minsiatna tawh ih kidimsak nuam hi. A sem taktak te adingin thu ih ngetsak kha hetkei aa, ei ma ading bekbek in thulela ih vaihawm thapaai hi.

Mite adingin sepsak, thuphabawl cihpen ih pianpih lungsim tawh ki lehngat taphial mah leh nang lungpen kuamah in hong hei theilo ahih manin nang lungsim thu om zia te na lungngaih ding kong deihsak hi. Ni khat in khatvei beek na dinnamun leh nasepkhiatsa te ngaihsut hunzong na pia zel in. Pasian tungah lungdam kohding nisim in ihneih tawntung hi. A thum tawntung dingte ih hisam kei hi.

Thupha ngahta leng, lungdam cinuamlo Zomite ihihi. Ih thanemna leh ih lungkhamna te kuamah in hong laina hetlo, hong panpih theilo napi hong laina le hong panpih thei ahi Pasian tungah ih ko nuamkei hi. Tuabang ngaihsutna pen Pasian thutawh ki lehngat na hizel hi.

Thupi ih sak thutampi te pen ei thupitsak hilel aa kuamah in hong laina hetlo cihphawk huai aa, mikhat thupit sakzong ih simmawhsakloh ding thupi zaw lai hi.

Thawn Tuang
Zomi Angvaan