Ki thanem sak ken ~ Dong Mung

Ki thanem sak ken ~ Dong Mung

Leitung ngeina khat pen a kilehbulh vive tawh kidim ahi hi. Gentehna in akhum-akha, asau-atom, asang-aniam, a it-a mudah, a deih-a deihlo… atuam tuam tampi om hi. Tua mah bangin mihing ihihna kibangin khut nih, khe nih, mit nih, bil nih, lungtang, khuak, lungsim cihbangin i neih kim tek hangin i kalsuanpih zia kibang lo hi.

• Nang hong paakta honpi khat om dinga, nang hong pakta hiaulo honpi mang khat mah om ding hi.
• Nang hong it honpi khat om dinga, hong mudah honpi mang khat mah om ding hi.
• Nang hong deihsak honpi khat om dinga, hong haza mahmah honpi mang khat om ding hi.
• Hong ngai honpi khat om dinga, hong hua mahmah honpi mang khat om ding hi.

Hong it a om bangin hong mudah zong om dinga, hong ngai a om bangin hong hua zong om ding hi. Hong pakta a om mah bangin hong pakta hetlo zong om dinga, hong deihsak a om bangin hong haza zong om ding hi. Hihte in leitung ngeina khat ahi hi.

Tua ahih manin langbawlna thuakin, pampaih nawlkhinna, hazatna, huatna, elna, langdona na tuah ciangin nang lam ah zong hong panpih nuam, hong huh nuam, hong kalsuanpih nuam mi om veve hi, cih phawk inla, kithanem sak kei in..

Tua ahih manin na gualzawh, na lawhcin nadingin nang hongit, nang hong ngai, hong paktate tawh kalsuan khawm ziau lel in..

Nang tungah mikim lungdam kipak khinlo ding ahih manin na hihna ciangciang tawh hong lungdampih, hong kipahpih mite tawh maizawt lel in..

Na nuntakna sungah bangbang hong piang zongin kilungneusak kenla, mainawt in. Thanem lungkia, lamet bei, lungneu na om khak zenzen leh zong nang hongit hong deihsak hong panpih nuam mite’ hong itna phawk inla, mainawt teitei lel in…

Tua bangin kalsuan teitei lecin ni khat ni ciang na lungdamna hong kicing dinga, na maitai in a lawhcing, a gualzo mi khat na suak ding hi. KITHANEM SAK LUA KEI IN Lungdam, Dong Mung