Inn luah ding kua? ~ Thawn Tuang

Inn luah ding kua? ~ Thawn Tuang

Mi gilo khat in Tapa khat a neih uh thatsak mawk hi. A thah zia uh hih bang ahihi. Zingsang khat a Pa khualak vak in, a Nu leh a Tapa bek inn ah om in a Nu in, zing An huan hi. A meh tuihuan ding a huan sung uh ah tawm khat lo dingin paipak hi. Tua kal in a Tapa bek inn sungah Topa hoih hi, Topa lian hi cih video onsak in koih hi. Tua kal in mi gilo khat innluh dingin na lut thei-in tua inn sungah a Tapa uh video en in aom mu aa, thau tawh kap dingin ki thoi hi.

Thau tawh kap leng venglehpaam in thau ging za ding uh ahih manin cih ngiahsun kik in Namsau tawh bang mah a theilo naupang, mawhna a bawllo naupang mi gilo pa in that hi. Tua khitteh a vanteng uh tawk gawp in a deih teng la in pai khia hi. Innteek pa zong a vakna panin a ciah tawh ki tuak in mi gilo ahih lam theilo hi. Innteek nu zong huan sung panin a inn sung a et leh a Tapa na ki thahsak hi. A muh bek na sa lua in sibup in thuk pah hi. Innteek pa zong a inn sung hong lut in a Tapa, a zi te om dan a muhteh na sa mahmah hi.

Den a ka ki tuahpih migi lo pa aive maw ci-in Palik te phone tawh samin Palik te kiangah a thu paizia gen hi. Palik tenzong delh pah uh aa, mi gilo pa man kha uh hi. Inn teek pa phone set pah uh aa, na Tapa a that mi gilo pa tu-in mankha ta ung. Bang cih ding ka hihuh hiam? Na ut ut in na bawl nopleh bawl thei hiteh, nang thupiakna bangbang tawh a kalsuan ding hi ung cihthu migi lo pa zakteek mah in hopih hi. Innteek pa in ka Tapa mawh neih vetlo, mawhna a bawllo khat hong thatsak mi pa ka kiangah hong paipih un cih Palikte vai khak hi.

Mi gilo pa zong lung khamlua, inn tek pa kiang tung leng aman hong that hamtang ding aive maw. Mawh neilo a Tapa ka that khak mahmah ki siklua ing ci-in kap kawmin inntekpa kiang hong tungta hi. Inntekpa in nang maw ka Tapa khat bekbek ka neih uh hong thahsak, ka innluah ding uh om nawnlo aa, ko hong vak ding leh ka neih ka lamteng uh a luah ding om nawnlo hi cihi. Na ki sik hiam cih mi gilo pa kiangah a dotleh ki sik lua ing inntekpa aw na ut ut in hong bawl in, nong thah nopleh hong that in kei mimawhpi hi-ing ci-in lungsim ki tam khamin ki ap hi.

Innteekpa in ki siktakpi na hihleh kei hong thupiak bangbang na zui ding hiam cih a dotleh zuih mah ning ka sih tan dongin ci hi. Tua ahihleh hih ka Tapa mawhna a bawllo hong thahsak na hih manin ka innluah ding uh om nawnlo ahih manin, ka neih ka lamteng uhleh ko Nupa tawh teng khawmin nong om ding hi. Innluah ding nang hong hi pah in ci hi. Inntekpa zong Pasian thu um mahmah mi khat ahihi. Mawh mai sak zawhna icih hih bangte hi. Eite in mi mawhna ih maisakloh te ngaihsun leng…aman tua hong ci hiven…amah tua ci se hiven cih lel lel tawh mawhna ih maisak zawhloh zia tawh ki khai mahmah hi.

Tua Tapa a that mipa ngaihsun taktak leng..nang leh kei hihang. Ki sikna takpi tawh mawh neih pipi mah in Jesus kiang ih zotleh aman’ hong sang lua hi. Hong tel khiallo hi. Kham innpi a luah dingin nang leh kei hong bawl pha nuam hi. Amah tawh nungta khawm dingin hong samin hong pom hi. Mawh neihlo hileh inntekpa in sam khalo ding hi. Tua mah bangin kei mimawh adingin Singlamteh tungah Jesus in ka mawhna teng tui suaksak khinta hi cih ih um ding leh ih san ding hong deih hi.

Amah a zuan mi khempeuh in lungsim takpi tawh bia bek hilo in mawhna teng ki sikkik in, ei tungah mi hong mawhte zong maisak zawhna hi Jesus in a deih sanggam. Mawhna neih ing i cihleh Jesus ki sam den, Jesus i pom ngiat ding ahihi. Jesus sungah a nunta mi khempeuh si ngei nawnlo in nuntak tawn tung na, na ngah ding hi cihi.

Theih ding: Hih lai na simteh minute 5 zong na sim kei khamah ding hi. Tangthu ka ngaihsut vatteh minute 5 in mu zolo hi-ing. Ka gelh leuleu teh ngaihsun tawmtawmsa in ka gelh ahih manin minute 5 in zo baihlo hi-ing. Cih nopna ah a diakdiak in Jesus hoihna thu ih gente hong simsak, a thangahte tungah lungdam hong ko nuam hizaw ing. Lungdam.

Thawn Tuang
April 26,2015