Hurricane Irma kici huihpi khauhmahmah in Caribbean sungteng nawkding
Caribbean kuamsungteng ah “Hurricane Irma” akici huihpi akhauh mahmah in nawkding kici ahih manin tuasung ah ateengkha te patau mahmah in, ki nakginkholh mahmah uh cih BBC pan kiza hi. Tua Hurricane Irma pen Atlantic tuipitung ah abeisa kum 10 sungin akhauhpenpen huihpi hiding kiciliang hi.
Hurricane huihpi pen Category in kikhen a, hih Hurricane Irma pen Category 5 in kiciamteh hi. Category 5 pen Hurricane lakah akhauhpenpen hi a, huihnun akhauhna pen naikhatsung in 295km/h (185mph) kiciliang hi.
Caribbean kuamsung aom Leeward Islands ah Hurricane Irma in nawkkhinta a, tuapan in Puerto Rico leh Dominican Republic nawkpheiding kici hi.
US gamsung aom Florida’s Key West sung aom khempeuhzong kihemkhia hamtangding in thunei te’n sawlkhin uhhi.
Florida, Monroe County aom Emergency Operations Center Director asemlaitak ahi Martin Senterfitt in agenna ah mikhempeuh aki hepkhiatding in akisawl hi. Hongtungding, hongnawkding Hurricane Irma pen Category 5 himawk ahih manin, kuamah omkhuan kipiatheilo dinghi ci’n genkhia hi.
Key West aom khuasung mipite zong kihemkhia in, tui leh nektawmding Emergency Supplies cihte zong kiging ngeingai uhhi.
Airports zong tampi kikhakcip a, vanleng atung alengkhia bangmah kiphalloding cihi.
US National Hurricane Centre (NHC) te genkhiatna ah hih hongnawkding Hurricane Irma pen tulaitak naikhat 24km/h (15mph) tawh anawk laitak hi a, hih huihpi pen khauh mahmahding “catastrophic” hi ci’n genkhia hi.
Video: Hurricane Irma grows to powerful Category 5 storm
Tulaitak Hurricane Warning pen anuai a munteng ah kipiakhin hi:
- Antigua, Barbuda, Anguilla, Montserrat, St Kitts and Nevis
- Saba, St Eustatius and Sint Maarten
- Saint Martin and Saint Barthelemy
- The British Virgin Islands
- The US Virgin Islands
- Puerto Rico, Vieques and Culebra
- Dominican Republic, for the northern region
- Guadeloupe
Haiti gam, Turks and Caicos Islands, South-eastern Bahamas te ahihleh Hurricane Watch dinmun hilai cih kiza hi.
Related: Hurricane Matthew hangin Haiti gamah mi 283 sikhin
Nungdiak in US gamsung Texas leh Louisiana State sungteng ah Hurricane Harvey in nawkgawp in mitampitak cimawh dongtuak in om uh a, tudongmah abuaibuailai uh ahihi. Tua kawmkal ah tu’n Hurricane Irma in US Mainland nawkding kicileuleu mawk hi. USA, Florida State sung aom Key West khuasung ah Zomi te ih omkhahiam? Sawltak #zomidaily
Comment piaknop aomleh...