A manpha i hunhoih ~ Dal Sian Hung

A manpha i hunhoih ~ Dal Sian Hung

Mihing ten khang khat sungah lamka bom 3 vei ki tuak kha ciat hi. I tot nading lampi thum vei i teel khialh ngei ngei leh khangual pha zolo dinmun kitung hita hi.

Sente’ paunak khat ah Game pen mihing khat a kilumlet sak lampi hi. Game na zawh leh na nuntakna kilumlet ding. Ahih keileh zi hau or pasal hau ngah sawm in ci uh hi.

Zomi Dinmun

Mihing khat nuntak khuasakzia pen hun zatzia in thu gen hi. Kum 18 nuaisiah pen khangno hun hi a, kum 18 pan 45 kikal pen khanglai hun ahi hi. Kum 45 panin a tungsiah pen khangham hun sungah lut ta hi.

Lamka bom 3 pen khangno hun ah 1 kiphukha hamtang ciat a, khanglai hun ah 1 kiphu kha in, khangham hun ah 1 ki phukha hi.

Leitungbup huamin mi lawhcingte i et ciangin hun zatsiamte nahi zaw hamtang uh hi. A hun zatna uh khantohna a piangsak vive in na zang uh ahih manin mi lawhcing hong suak uh hi.

I. Khangno Hun

Khangno hun pen kum 18 nuaisiah hi a, hih hunsung pen a pualam thu tuamtuam ah lut huai nailo, lut kul nailo in pilna sin hun ngiat ahi hi.

Hih hun sungin High School-Tan 10 peuhmah ong ding hi. Hih hun sungah Tan 10 a ong khia zolo peuhmah lamka bom masa pen a tawnkhial hita hi.

II. Khanglai hun

Khangno hunah tan 10 ong khin khat in khanglai hun sungin PhD zawhsawm hamtang ding hi. A zenzen sum haksatna tawh a zopzawh keileh nuntakna a piangsak zo ding siamna khat sin ding hi.

Tan 10 zolo mi khat ading inzong hih hun sungah nuntak zawhna a piangsak thei siamna khat teitei sin ding hi.

Gentehna:

• Ansaipite ah mehkangpi suahzawh sawm ding.
• Car/Cycle workshop pilnate tawh kivak thei.
• Moh bawlna saipite ah Cake Chef khat suah zawhna.
• Numeite hileh puankhui, sam met siamnate.

Pilna tawh ankuang um ding khat nahih leh pil kuitung (specialist, doctorate) ciang dongmah zawhsuak sawm in. Tua ciangbek in na pilna zat tel pan ding hi.

Hih khanglai sungin zi/pasal hoih neihzawh sawm in. Hih hun sungah pasal/zi hoih na neih khak keileh lamka bom nihna ah lampi a teelkhial na hita hi.

III. Khangham Hun

Khangham hun ah lamka bom thumna kiphukha leuleu a, tua pen i tate pattah zia ding ahi hi. Hih lamka bom thumna pen i tate pattah zia ding leh i tate maban ahi hi.

I tate i pattah siam, i pattah zawh leh i teeksih phial zongin i tate in hong vakzo ding a, vaang hong pia thei ding uh hi. Tapil na deih leh na tate pattah siam in.

A diakin khangno lai hun ah hong pantah ding pen nulepa vaipuak hi a, khanglai hunah maban zop ding pen ei mimal ngaihsut khentel siamna tungah kinga hi.

Thukhupna:

A teek, a khangin i panmun tel in i vaipuak i tel kul hi. Tua i vaipuak tel tak in mai i nawt nak leh i mimal, innkuan, khualetui, minambup adingin lametna ni tum nailo ahih manin i maban limci giabang zun ciat ni.

Kiukhat pan,
Dal Sian Hung
Kuala Lumpur, Malaysia.
12 October 2017