China ah numeino kum 15 aphapan khatin apa temta tawh dawtlum

China ah numeino kum 15 aphapan khatin apa temta tawh dawtlum

China gamsung ah numeino kum 15 aphakhinpan khatin apa temta tawh dawtlum ahih manin palik te’n man uh cih SCMP pan kiza hi.

Hunan Province, Dongkou khuasung ah abeisa kalsung in thupiang hi a, sangkah laisinna vaitawh innkuansung buaina piangin, sangnaupang ahi atanu in apa temta tawh adawtlum cimawk hi.

ThePaper te genkhiatna ah hihvaitawh kisai in Police Statement khatzong ki khahkhiakhin cihi. Athupiangzia ahihleh sangnaupang numeino kum 15 aphapan khatpen apa in sanglai “Schoolwork” te hoihtak abawlding thuhilh in satkawm cihi. Anu inzong asatloh nadingin phelhphei a, ahi zongin apa’n anuzong na satkhawm hi.

Tuaciangin atanu pen alungsim kikem zonawnlo in apa pen temta tawh adawtlum kici hi.

Tua numeino pen apa in lai apilding, midang sangnaupang te sangin apilzawkding deihsak mahmah cihi. Sang laisinna “academic performance” ah atanu adingin alametna sangsak luakha in, adeihbang in atanu in azawhloh ciangin sattawh thuahthei khazel cihi.

Apa pen kum 44 aphakhin khat hi a, abeisa Sunday nitak in sanglai vaitawh kisai in numeino leh apa kam kinial in kitawng uhhi. Anu in akhending in delhphei a, ahi zongin amahzong apapi in nasat, nabeng sawnsawn hi.

Apa in anupen lupna tungah nencip in atungpan in abetlaitak, atanu inzong temta khattawh apa adawtphei hi ci’n Police te’n genkhia uhhi. Amasa in apa ii alu temta tawh satpheisak hi. Tuaciangin apa pen taikhia in, tualaitak in a awmsung temta tawh dawtsak leuleu hi.

Tuabangteng khitciangin atanu mahin Ambulance sampah a, Police tezong zasakpah hi. Apa pen Hospital khatah kipuak himahleh asawtlo in sisuak hi.

More: China, Beijing aom Shopping Mall sungah temtawh mi 1 kidawtlum, adang mi 12 liam

Amelthei te genna ah tua sangnaupang numeino pen laizong apil, ahanciam mahmahkhat ci uhhi. Ahi zongin apa pen Maths Teacher khat hi a, atanu pen tha ngahzolo in lai hoihtak asimding in sawlden cihi. Nungkhasung inzong lai hoihtak zuizolo ahih manin, apa’n atanu pen satgawp cihi. February khasung inzong apa in sanglaivai tawh bawlsia ahih manin, innpan in ni 3 sungbang ataikhia ngei cimawk hi. Ki deihsak mahmah hangin, thapiak zong ihsiamding…. Sawltak #zomidaily