Meiteigun la ~ Lengtong Pauno
Kei’kiangpan paikhianawn ke’n. Hihla zong 1978,Tonzang leitangtung maha kaphuah la hi. Hihla tungtawna kasaan’, ka khuanungphawk, Pasian thupha khat honggen nuam ing.
Tuahunlai khawngpen, Githa khattawh lasakawma vakvakin, kalasak azadinga kadeih nungakte’ innkiim tenga kilehsuk kilehto cihkhawng ka nasep thupi penpawl ahi hi.😁
Khataan’ nitakkhat ka lawmpa Paulek (phamsa)second voice zuisakin, ka Meiteigun lasa a kavak hialhialvua leh, ka vakphei nading uh lampitung kamaivua (Innpi kongsak pheiteng) mi honkhat nakilai, nakisat ziahziah mawk. Nawkphei dihdih mawkdinglah hilo, kilehkik maiding kacih laitakvua, khatpa pau zakzakin, “Lawm Pau, Meiteigun lasa in hongvak ve leh, na kilai uh khawl vevua” ci a hong ot leh, akilaiteng hongdai takpi ahihcianga kozong lasa a paiphei suakin, laam 20 taang ding kakhenkhit uhciang, amauteng kilaikik leuleu mawk.
Tua hunlai a ka ngaihsutkhak kholhetloh tu’n ka ngaihsut khakkik leh, Meiteigun la pen Pasianin thuphapia a, sathau hong nilhsak ahihna ka phawkkik saansaan hi. Meigun la tungtawna nupa pumkhatsuaka lungdamthu honggen zong koptampi om ahih gigelam ka khuanungphawkkik saansaan hi. Ka lungdam, Munkhai’pa (Siansikpu)
Video: Meitei Gun ~ Dalpi (Phuak: Lengtong Pauno)
ZOMI IN KEI KAPIANG, ZOMI IN KA SIDING HI.
Hihla pen, kum 16.mi kahih, 1978, SHS Tonzang ah tan 9. kasin laitak a kaphuah la hi a, ka khua Tuithang ka lawhna in, “Mualdawn vangkhua” cih thulu apia kahi hi.
Kum 12.kahih 1974 in, RASU panin ka UThawng Za Kim ka khua uh hongciah a, Radio Zohun(BBS)a alakhumthakkhat honghilh hi. Tua lamal pen, “Zomi bang kapiang, Zomi bang ka nungta, Zomi bang la kasa, Zomi bang kasi ding hi”cihteng nasiatakin ka ciamteh sim khinkhian hi. (Amahpen, kum 13. aphakin, Pu ThualZen galkap, Zampi khua pan kiman, Monywa gilbeem kum3. akiakhinsa ahi hi.)
Tuazawh kum4. khit, Tonzang sang ka vakahcianga ka U’ theihlohkal a ka ciaptehsim lamalpen, 1978 teh, kei’ laphuah sungah guang ziau in, athuthei masa hong kineih kahi hi.
Amah’n hong nusiatkhit hangin, ka guksak lamal nungta a, kei mahmah inzong anuntakpih ngiatngiat kahi hi. Sih akul lezong, aki gingsa kahi hi. Ka U’ khaici akepcingsak zong kahi hi.
ZOMI IN KEI KAPIANG, ZOMI IN KASI DING HI. Ka lungdam, Munkhai’pa (Siansikpu).
Comment piaknop aomleh...