China nupi khatin sangnaupangno 14 temta tawh dawtliamgawp

China nupi khatin sangnaupangno 14 temta tawh dawtliamgawp

China, Sichuan Province sungah nupi khatin Kindergarten (Mukyu) sangnaupang 14 tak temta tawh dawtliamgawp cih AFP pan kiza hi. Tuni Friday ni in China’s Southwestern Sichuan Province sungah thupiang hi ci’n Sen kumpi thuneite’nzong genkhia uhhi.

Tuabangin sangnaupangno te temta tawh adawtgawp nupinu pen kum 39 aphakhin khat ahihi. Anhuanbuk sungah akizang Kitchen Knife temta khattawh sangnaupangno te abanban in adawtgawp cimawk hi.

Tua sangnaupangno tepen zingsang Morning Exercise bawlin laisinna Classroom apualam ah apusuakkhia uh hi a, amankhit uhciangin Classroom sungah alutkiksawm laitak un nupinu in temta tawh abanban in adawtgawp hi ci’n Chongqing City aom Banan District Public Security Bureau te’n Social Media tungtawn in genkhia uhhi.

Tuabangin naupangno 14 tak akidawtliam ciangin sileh naaitawh kidim zihziah in, pawlkhat pen amai aliamgawp tawh, apuan sisan tawh akidiahcip tawh hehpihhuaithei mahmah uhhi.

Asawtlo in Police te aphual ah tungpah uh a, tua sangnaupangno aliamte pen zatui zaha akibawlding in amanlang in ki hemkhiapah hi. Tua temta tawh adawtgawp nupinu zong kimansuakpah in, banghang in hihbangin gamta cihte kumpi thunei te’n thudotna leh thusitna neihding in kemsuakpah uhhi.

Chinna kumpi thunei te genna ah hih tuahsiatna apianhun pen zingsanglam 9:30am hunpawl ci uhhi. China gamsung ah sangnaupang te ngimbawl in temta tawh ki phengdawtgawpna pen nidangin omngei khollo himahleh tunai ciangin buaina hongtam tektek hi.

More: Pasal khatin sangnaupang 7 temtawh dawtlum, adangzong mi 19 liamgawp

Tukum April khasung inzong kum 28 aphakhin pasal khatin Middle School khatah sangnaupang 9 tak temtawh dawtlum hi. Amah asangkahlai in kisimmawh mahmah ahih manin, tuateng thuaklah in amah agol ciangin aneulai in akisimmawhna sanginn ah sangkah sangnaupang te aciah uhciang in lamkal ah pangin temtawh ana dawtgawp cimawk hi. Sawltak #zomidaily