Zomi sungah Kipawlkhop Dingzia

Zomi sungah Kipawlkhop Dingzia

I minam sungah kipawlkhopzia kisam kasak luat manin thu pawlkhat kong sungkhia dinga, mailam ah network tungtawn in thu suah, thu sun cihte zong kong zat sawm nawn kei mai lel hi. Hih pen ka gelhtawpna hikha mai ding ahih manin, nong thupi simsak mahmah lel un. Sia Dokham a nuntak lai in “Aisa lungtang” cih thulu tawh thu gentehna nei ngei hi. Aisa pen lawh sung, ciang sung khawngah koih lehang pusuak dingin kahto diamdiam uh a, pusuak khiazo ding dinmun a tung khat aom ciangin a nuai panin Aisa dang ten lehkaih khiat kik zel a, a suakta zo khatzong om vetlo mawk uh hi.

Building khat i lam ding ciangin Engeering ten kum bangzah ciang kimang ding cih tuat khol in tua tawh kizui in budget kigel a, that/dawl bangzah ciang kilam thei ding cih foundation khuambul kiphut hi. Leitung ah khangkhat le khangkhat, hunpaipi khat le hunpaipi khat penkhuahekzia, nekledawn, silhleten, omzia, khawlzia, pilna le siamna, theihna le muhna cihte kilamdangto hiaihiai in, khuahun zui-a ki khuasa toto ahi hi. Tua ziakin hunlui-a i zat, i nek, i dawn, i ngeina, i thukhun, i muhzia, i sepzia cihte zong khuahun zui-a khel toh huaite khelto thei-a puahtuakte puahphat toh ding ahi hi.

Ta gina hangin Pa minpha:

Pa pen teekta a, lenggahzu kham in hong om hi. Tangguak in hong lum a, Ta ginalo in zahko in selpho hi. Ta gina in en zong en ngamlo in a PA’ zummawhna khempeuh puanza tawh khuh in mindaina teng humbit hi. Ta ginalo in bel selpho, zahko in min daisak nuam hi. Hih tangthu i et ciangin PA a kici pen minam MAKAI te hi a, makaite’ gitnat lohna selpho mi peuhmah khuasuaklo hi. Makai khat cih pen Pasian’ phalna omlo in a mawk din theih hilo hi. Tua Pasian sathaunilh makai khat na selpho ciangin Pasian zahtaklo nahi hi. I hun hongtun mateng ngaksiam a, makai peuh kituh ding hilo hi.

Zinkhak le Thalloh:

I ngeina ah Zinkhak le Thalloh i neih mah bangin minam vai ah zong kipawlna khatlekhat i ki-enkik in kua ka Zinkhak hi-a kua ka Thalloh hiam nakpitak in ngaihsun dih ni. I minam sunga i buaipih tawntung thu pen Zomi sungah kua in Thallohpi hi a, kuateng tanu hiam? Kua in Zinkhak ahi hiam, cihte kingaihsun khalo in, a munmun pan kipawlna nengneng kiphuan in ei tumtek in Zomi makaipi i kisa kha pahpah tek hi. Ei tungah Ni le Kha, Aksi bek tuanglai bangin i kingaihsun pahpah tek mawk hi. Tuni in i kipawlnate kisit cianin Zinkhak le Thalloh, tanu kigualhzia enpha in puahpha ngiat dih ni.

Kipumkhatna in Kibatna Hilo:

I kibat lohna khempeuh gawmkhop theih pen i kizepna hong suak a, etlawm zaw hi. I kipawlna tuamtuam tekin by-law (Doctrine) neitek mah ding hi. A hiteita zongin Zomite koimuh ah kigawmtuah ding? I kigawmtuahna munah Zinkhak le Thalloh, Tanubul, Tanudawn, Tanu/Tapa khempeuh hongkim hiam? I tupna koilai hi a, kuateng tawh i tun sawm hiam? Kuateng paisan in kuateng i nusia hiam? I kibatpih loh teng nusia in eiteng bek in vaihawm, mainawt ding ihi hiam? I lungtupna mun tuntheihna dingin i mi, i sa khempeuh i huaizo hiam? I huai sawm hiam? I tupna bangtan kipai ding hiam?

Naumin phuak cil zi/pasal guat sawm mi kitam simsim a, nau min phuak nailo min-apna neihsawm ki tam simsim hi. Tua dinmun tawh Zomite’ lungdeih libang cinghak mahmah lai ding hi. Leitungbup a om kipawlna khempeuh hong kizoptuah photphot unla, Zinkhak, Thalloh, Thusapi, Tanu gualhzia deihphatak in hong gelpha dih un. Innsung vaihawmpi i PA kua hiam? Innsung thuzeekpi i NU kua hiam? Kiteltak in hong kipholaak dih un. Bubu nawnkei unla, na vaihawm dingteng uh hong hawm un. Na tanu/tapa ten PA’ vaihawmna ngak in kamka hikhek hi. PA’ vaihawmloh in kisemlo ding hi.

Veina bekmah tawh,

Dal Sian Hung
Kuala Lumpur, Malaysia.
30 September 2015