Tulaai Leitung Thutthang Tuamtuam te Update (Oct 16)

Tulaai Leitung Thutthang Tuamtuam te Update (Oct 16)

US leh North Korea Ki Ngik leuleu
North Korea ten kamkhum tach kihoding alungulh leh konghonsa in om a tua akingah kei leh namuding uhhi US Ready ta ci in US President Turmp in October 15,2017 ni in ABC thukante kiang ah gen a, Secretary Of State Tillerson in amasapeen Bomb akikhiat masiah North Korea kamtawh kizolzol laibek ding ci in Ocotber 16,2017 ni in genkhia hi.

Ahizong in North Korea ten Kangimna bulpi uhpeen US gamkee te leh US leitang mahmah akaapkhamding thautang akimtak a neiding cih hi a kangimna uh katun masiah uh kam kikup cihte kasangzo naaikei phot tadih uh cihsan ziau uhhi. Akizom in US leh South Korea ten Tuilam Gaaldo khupna nasiatak October 16, 2017 ni in kipanziahziah ta uhhi. CNN

Kawl Gaalkaap Bu te kigawnggaak kik
Kawlgam Gaalkaap Lubok Lianpi pi ten Europe gam tawh kizopna khaktan ding leh Kawlgam gaalkaap tetawh kizopna etphat ding in EU in October 16, 2017 ni in khentat uhhi. Tuaban ah Rakhaing gampan a kihawlkhia Kala te hoihtak adon kei leh gaalseemseem in adon leh adon hunhun ah kihongkik ding ci uhhi. Hih Kala te huhding akisam aom keh EU mintawh kicingtak in apanpih nopna thu uh zong genbeh uhhi.VOA

Austria gam kiteelna
Austria gam kiteelna ah Austria’s conservative people’s party in gualzawhna ngah hi ci in Election Committee ten October 16, 2017 ni in taangkokhia uha, Party Makaaipi Sebastian Kurz in makaaipi ongsemding hita hi. Kurz peen kum-31 phapan a leitung ah anuapang pen a kigen Kim Jong Un sang nauzawlaai ahihman in Leitung Makai lak ah akumtawm peen khat ongsuak hi.BBC

Spain gam buaina
Spain gam pan kapaikhia ding uha gamkhat in kading nuam uh ci a akitomkeei amau le amau kituam ukna nei Catalonia te in paikhia ding maw khawlding cih adawnkikding hun uh October 16, 2017 ni hi a ahizong in abangmah thugingnaailo hi. Azenzen in gamkhat in kading ding uh cin ataangko uhleh Spain in thukhuntawh kizui in amau le amau ki ukna apiak lakikding a Direct in ukcipding cih akigingsa hi ci in Spain thunei te gen uhhi.BBC

Somalia gam misi kibehlap
Somalia gam Mogadishu khuapi sung mitam mahmahna munkhat ah October 14,2017 ni in Bomb puakkham a October 16, 2017 ni ciangciang mi 302 si in 429 liam uhhi. Aliam 429 te lakpan 30 lam etna beipianpian ci uhhi. Taangthu sung ah lomsihna anasiapawl in kumpi thuneiten gen uha, President pan mipi ten misite ni-3 sung zahtaakna.dahpihna piakhun a zangding in taangkokhia hi. Al-Shabab misok ten komau mission hi cin pulaakkhia hi.VOA

Spain leh Portugal gam mekaang
Spain gam leh Portugal gam ah October 14, 2017 ni pan gamkatna nasiatak in piang a mi-31 si in 50 liam a 15 naak kat mahmah a, inn le lo tampi akattum ban ah mi atultampi inn le lo nusia in taaikeek uhhi.BBC

Southeast Asia gam sung a IS makaaipi pa kithat ta
Southeast Asia gam sung teng ah IS Makaaipi a kiciamteh Isnilon Hapilon peen Philippine gam nuai lam Marawi ah kathat uha amahbek hilo in Migilo Makaaipi khat mah ahi Omar Maute tawh kathat uhhi ci in Phillipine gaalkaap ten October 16, 2017 ni in taangkokhia uhhi.Hih Isnilon peen US ten athatzo amanzo aom leh $5 million piading ci a ataangko uh mikhat zong ahihi.BBC

More: Malaysia MRT Consturction puahkhapna pan aliam mi 3 te lakah khat sita

AirAsia Vanleeng tuahsia dektak
Australia gam Perth Khuapi pan Indonesia gam Bali tuikulh atuding mi 151 apua AirAsia company te neihsa Airbus A-320 Flight QZ535 October 15,2017 ni Leipan alenkhiat zawh minute 25 ciang engine buaina om ahihman in thakhat in kiasuak mawk a Vanleeng nasemten Oxygen hawmpah ziahziah in Vanleeng tuang mipi te khat leh khat mangpha kikhak in kapziahziah in aom kawm un leidong vanleeng kiasuaksamlo in cidamtak in alenkhiat na mun tukik thei hi.BBC Lungdam, Khawm Pau