Kua aa ding sem, bangci sep – 1

Kua aa ding sem, bangci sep – 1

(Hih anuai aa thute khempeuh Kipawlna ii deihzia hikimlo thei aa, mimal lunggulhna pan cile’ng khiallo hi.) Buaipih khat peuhpeuh hang tawh, lametna khatpeuh hang tawh, sum leh pai nektawm ding hang tawh, lung himawhnakhat peuhpeuh tawh, veina khat peuhpeuh hang tawh, ahih kei leh seploh phamawhna hang tawh cih bangin mihing aneu, alian mikimin nasep pen neu, gol, thupi, thupilo cilo-in nisim ih buaipih khatta omngel hi.

Hun leh thatang ih beina nasep khat lian bek khan’tawn a semsuak cihbang a omtheih ding muhhak mahmah ding hi. Ahi zongin, sepding aa ih kipatsa, ahih kei leh ih san’sa, ahih kei leh hong ki-ap nasep khat pen, ei hangin khan’tohna a om hamtang ding leh hih nasep a kipsak semsem tutzawh ding pen mihing’ lunggulh leh a ngimhuai thu khat hi.

Malaysia gamah, lungsim puakzia tul tampi apha, panpihna kisam tul tampi a pha, thu muh zia nam tampi tawh a om Zomi-te mai aa mapang ding, a panpih ding, ahih kei leh hih tul tampi ii sawltak (sawl tangzang) ding pen, a pil, a tei tampi ih omna sung pan anuai aa nasep zia (pawlkhat) a nuntak pih zo tampi ahi kei zongin pawlkhat a omloh phamawh hi;

Banghang ki piakhia

Malaysia gam sung aa volunteer nasep tawh nuntak ziate a kilawm ciang telkul hi. Banghangin hih Malaysia gamah Zomi Kipawlna kisam ahi hiam, cih a zai theithei-in telhuai hi. Tuma kum (5) lai aa kipan Malaysia gamah, banghangin Zomi Kipawlna na ki pankhia aa, banghangin tuciang dong a sem toto palai khempeuh in hanciam tentan uh hiam, cih ahang a kicing simsimin telhuai hi. Kipawlna ii tup leh ngimnate theihloh theih hilo hi.

Koici ki pulak

Zomi ahihna angtangin a kisap ciang a pulakthei kisam hi. A kisap ciang bek aa pulak ding cihna hilo hi. Hih ki pulakna cih pen, a deuhdeuhin Malaysia ah kisam phadiak hi, cih zong a tel sinsen kisam hi. A hilhsawn zo kisam hi. Nophun, dahhun, guallelh hun, maimial hun, maipha ngah hun, nauzaw mai -ah, zahtak ul ian mai-ah, namdangte laizang ah, mipihte lak cilo-in, Zomi cih aki pulak tawntung hihzawh ding kisam hi. A pulak thei nailote a hilhzo hihding kisam hi.

Hih bangin ki pulak tak ciang, politician (gam ukna vai nasem) khat bang kisak khialhna a neilo ding, politic (gamthu vai) nasep hilo-in mihing in ih hihna khat aki pulak, cih a tel sinsen kisam hi. (Gam ukna vai cihte zai mahmah hi.) Tuaban ah, namdangte langdo nopna, demnopna leh neumuhna ding peuh tawh minam min ki pulak tangtang ahihlohna telkul hi.

Ei leh ei lai kikhakna, kihonate, kikhopna, ki kaihkhopna, kikupna, pawlpi vai, khua kipawlna vai cihte-ah, thungetna ah Zomi kici bek hi lo-in, namdang, gamdangte tawh kizopna khat peuhpeuh ah Zomi ci aa ki pulakna leh a za ngeinailote kiangah angtang tak aa ki pulakna a neiding kisam hi.

Koici bangin thu khinkhai takpi

Atung aa ki pulakna vai pen a tomthei pen aa ih etpak hi aa, koici ki pulak ihiam cih dotna pen a dawngthei ding leh hong kitel zahdong aa ki pulak theihding kisam hi. Hong kitel, hong ki ciamteh cihtak ciang ei leh ei kitel hilo-in, namdang, gamdangte-in hong koici ciapteh uh aa, hong koici tel uh hiam cih a awlmawh leh a khinkhai thei, a khinkhai ding kisam hi.

Namdang, gamdangte banah, Zogam sung mahmah panin kampau kibat pihlo sanggamte ii hong ciaptehna leh hong telna a thupi ngaihsut zong kisam hi. Khat veivei Zomi sung veve, ei leh ei sung zong ihihna pulak a kisap ciang a lungduai kisam hi.

Koici bangin hong ki ciamteh

Mipihte aa ding ka sepna khat peuhpeuh leh mimalvai khat peuhpeuh ah zong, mipih ahilote ii hong ciapteh dan pen Zomi mah hi hamtang ding, ci aa a hanciam tawntung kisam hi. Ih sepkhiatna, ih supna, ih gimna khat peuhpeuh pen Zomi min mah tawh a gah kilo tangtang a suaksak zo ding kisam hi. Zomi min mah tawh hong ki pahtawi ding a lunggulh kisam hi.

Ulian, uham mai leh zahtak cing khatpeuh mai-ah, hamphatna khatpeuh leh mimal maban, mimal noptuamna a sumh ngam tampi kisam hi. Cihnopna-ah, hamphatna ding ahih nak leh mite hong ciaptehna min khat peuhpeuh tawh a sanglel, a delhlel a hikhalo tampi kisam hi.

Tuahsiatna, daupai lohna khatpeuh ah zong, mite ii hong ciapteh bangbang cilo-in, Zomi khat tuahsia, Zomi te tuahsia ci-in Malaysia bek hilo, leitungbup thusuah tuamtuam, kipawlna tuamtuam in hong ciaptehna ding a pulak thei leh pulak ding thupi asa tampi kisam hi. Ka za/panmun kiptheihna ding, ka nasepna-ah ka pute maipha ngahkei kha le’ng cih bangin, minam min takpi zong a pulak ngamlo, a pulak theilo ih omleh a hilhzo ding, lam a lakzo ding kisam hi.

Hong ki ciapteh zia ih genteh, thu ngaihsun theikhinte bek hi lo, tangval, nungak, naupang vekpi-in hong ki ciaptehna bangci banghiam cih a lung himawh kisam hi. Siamna, kivakna khat peuhpeuh tawh, mimal ahi zong mihon tawh ahi zongin ih lut/kihel zawhnate-ah, mite ii hong ciaptehna pen Zomi mah a hisak nuam leh a hisak theiding, a hisak zo ding kisam hi. Min siatna, min phatna khat peuhpeuh ah, Zomi mahin hong ki ciapteh sakding aa ma apang tantan kisam hi. (zoplai ding) Tg. Kham [iNFO]