Video: Taiwan Hot Pot Restaurant khatah Gas bung puakkham in, mi 7 liam
Taiwan, Changhua County sung aom ansai khatah Gas bung puakkham in mi 7 tak liamgawp cih kiza hi. Tua ansai pen Hot Pot Restaurant khat hi a, Table nuai ah akikoih Gas bung panin apuakkham ahihi.
Taiwan English News te pulak khiatna ah Thursday (November 09) nitaklam in Changhua County sungah thupiang cihi. CCTV panin Video Record akibawlkha panin aki etkik ciangin nitaklam 6pm hunpawl in Gas bung apuakkham ahihi.
CCTV sungah Restaurant nasem khatin Table nuai aom Gas bung alaihsak laitak kimuthei hi. Tualaitak in Gas pen kehkhiagawp in, nasempa zong pataugawp hi. Tua Gas bung pen Table nuai ah akikoih hi a, tua Table ah atu pasal nihte’nzong lauhuaituak ei cih atheih uhciang in ki hemkhiapah uhhi. Ageinai ah atu te’nzong Gas akeh ciangin agimnam khawngtawh patau in, ataikhiading in dingto uh a, Restaurant sung aomteng patau ngeingai uhhi.
Midang te ataikhiat ngeingaitheih hangin, nasempa ii anunglian aom Table ah atu innkuan khatpen kiliahcip in taikhiapak theilo uhhi. Tua innkuan tepen naupang kum 3 khattawh atukhawm uh ahihi. Tualaitak in thakhatthu in Gas bungpen puakkhamzai in, meikuang lengkhia ziahziah hi.
Nasempa nunglian ah atu naupang kum 3 tawh akithuah innkuante pen avek un liampah uhhi. Apa in ata pen taikhia in, atutna anunglam ah kankhiatpih hi. Ahi zongin atanu ii apumpi pen 20% bang meikanggawp veve hi. Apa leh anu zong avek un 10% panin 30% bang apumpi uh meikanggawp uh a, Second Degree Burn kici hi.
Taiwan’s Chinese language press te genkhiatna ah tuahun laitak in hih Hot Pot Restaurant sungah anne Customers akigawm in mi 30 bang aomlaitak cihi. Gas bung apuakkhapna tawh akinaipen aomkha mi 7 tepen liamgawp uh a, atamzaw pen Second & Third Degree Burn vive hi uh cihi. Tualo adangte pen meikhu dikngawhkha in thuaklah mahmah uhhi.
Tua aliam khempeuh lakah nasempa, Gas bung alaihsawmpa pen kinai penpen ahih manin, nakliam penpen hi. Ahi zongin sihlawhliang nading “life threatening” in aliamgawplua bel kuamah omsamlo uhhi.
Aliamteng lakah nasempa leh naupang kumthum tawh akithuah innkuanteng, akigawm in mi 4 tengpen liamngawhpen uh ahih manin, Changhua Christian Hospital aom ICU (Intensive Care Unit) ah kikem uhhi.
Video: 7 injured after hotpot gas explosion in Taiwan restaurant
Changhua County Fire Bureau te’nzong meiphelhding in Fire Engine akigawm in 11 leh Ambulance mawtaw 4, Firefigher bekbek akigawm in mi 30 paisakpah uhhi. Firefighter te atun ciangin Windows teng sakkham uh a, asungah a awkcip te ahunlap in honkhiathei uhhi.
Liberty Times Network te genkhiatna ah ageinai ah amukha te’n Gas akeh ciangin kiphitkhia in, gingsausau a, tuaciang in taivou, taivou ci’n ki awng ngeingai in aki taikhiapah hi ci’n genkhia hi.
More: Malaysia Subang Gas puakkham lakah ah Myanmar 6 kihel, mi 2 sikhin
Changhua County Fire Bureau spokesperson khat ii genkhiatna ah tuciangciang aki kankhiatna panin nasempa in Gas bung laihciang in zuiding SOP (Standard Operating Procedure) pen hoihtak zuilo hi. Gas Pipe pen alakkhiatma in akhakcipna Valve pen hoihtak khakcip masalo ahih manin, hihbang in meikuang in apuakkham hi ci’n genkhia hi. Sawltak #zomidaily
Comment piaknop aomleh...