Ka up Pa kathei hi

Ka up Pa kathei hi

1990 kiim pawl in Singapore ah mobile phone te ban tantan sau heha aa, mobile phone pau lai khat gal et hilehang bawng ngaltaak guh kheuh mahmah bang liang aa, molhtum aa zattheih ding zah aa muanhuai ahihi. Mal tawm mahmah lai ahihman in tua tawi kha te mihaute ahihkei leh company aa thunei te bek hi-in kisa thei peuhmah uhhi. Tua hun laitak in public phone mun khempeuh ah kikoih kawikawi ahihman in kizopna alemtaang mahmah khuapi aa kingaihsun ahihi.

Tuazawh kum 20 ong cin 2010 ciang mikhempeuh in mobile phone neita aa, sangnaupangte nangawn in neihloh aphamawh hun ong hiziauhi. Aneu ciuciau, puan-ip sung aa puaktheih, kihona bek hilo, camera, video nangawn siangtak in kilathei dinmun ong hito pakhi. Public phone aa pau omleh alamdang ong hiziau in muhhak tahi.

Internet tawh kizom in Zomi teng Zonet ciangtawh thukizaakna nasia mahmah kasak kawmkal ah, khangno khempeuh in facebook, facebook ciden uh ahihman in, amau hanthotsa mahtawh 2010 kum July 17 ni-in Face Book kaluthi. Kalaisai! khangno teng kuun ngelhngah, a phone uh tawh nitum, thapaai, khoihkhoih kacihleh, iPhone zang aa leitung bup tawh akizom uh nahi zen aa, nidang aa kihona bek kasak tu’n leitung tawh tatsatlo aa kizom nahizen uhhi.

Leitung khantohna manlang lua in, mitphiat kal sung nangawn aa kikhel, kilaih (change) cih ahi den hun sung aa alut ihihi.

Hih kikhel, kilaih hun sung ah Zomite zong ut in, ut takei lehang kihelkhaakloh aphamawh ong suak aa, midangte adingin kilaih, kikhelna theihthamlo ahiphial zongin, Japan gal lai aa kinusia Chevrolette, Jeepte mah hoihpen, hatpen, to-pen asa, Japan gallai aa siik temah khauhpen asa Zomite adingin lungzin huai, lung-ap huai peuhmahhi. Ihmang hiam ihtak hiam cih dinmun ihihi.

Tua kawmkal ah, omna mun kician mel zong omlo kikhinsuk, kikhinto, kituahsuk kituahto, leitung gam tuamtuam ah kithehthang sawnsawn ihihman in, koi ah om ing aa, kua kahiam, ihmin, ihpuam nangawn theizo nawnlo, lu mel taw mel theih nawnloh hun sung ihlut laitak ahihi.

Leitung ah akip, akho, akikhel ngeilo cihding khat mahmah zong omlo aa, kumpi gam nangawn akilaihlaih ahihi.

Hunkhat lai aa gamkeek, nitum ngeilo Mangkang gam icih tu’n hinawnlo hi. Hun khat lai aa sila khawi gam te Thupha puak gam suakta hi. Hun khat lai aa galphuang den gamte tu’n gu neilo gul bangliang uhhi. Pilna siamna lah kilaih, kikhel, thu leh la luanzia zong kikhel, avek, avek aa kikhel, kilaihto ahihi.

Hun khat lai aa gammial, pu’sa pa’sa biakna, dawi leh kau tenna khuazing gam ah anungta Pasian khuavak taang tahi. Kikhelna lian mahmah, lamdang mahmahhi.

Tua ahihleh hih kikhel,kilaihna in, Zomite sukha dinghiam? Ong sukkhaak loh phamawh dinghi. Ih kiim, ihpaam kikhelna zui in kikhel, kilaih loh ong phamawh ding aa, ihihna lui khempeuh ong mangthang ding, ong bei loh ong phamawh dinghi. Adangteng kikhel in Zomite kikhello, a om ngei aa omden cihbang omthei tuanlo hi.

Tua ahihman in tuni aa Zomi leh zingciang aa Zomi ong kibangnawnlo dinghi. Zan ni aa Zomi leh tuni aa Zomi ih kibang nawn keihi. Ih nikten puansilh kibang nawnlo, kizep, kizuun zia kibang nawnlo, kiim leh paam tenna kilaih, omdan khawl dan kilaih, ihngeina, ihzia ihtong, annek tuidawn, ihgawl, pau leh ham, ihmel ihpuam, ihthapuak zia, ih mangmat zia dongin avek, avek in akilaih, akikhel ding ahihi. Tuabek zong hilo, mite’ kilaih, kikhel sang ei’ kilaih, kikhel lianzaw laidinghi.

Pasian Thupha kasang uh aa July2010, 25 ni-in kaPa kum 85 cingtahi. Tusawn mu in atusawn USA ah om aa kum 13 ahihi. Ka neulai un kaPa ading sun sang tuah sim in vaimim su in khutme golh liangin nitaak lam sang kapai uhhi. Tuni dong ka Pa’n vaimim leh ga leh zasan kilim gawi ahihnak leh agil vah nuam sapen hi. Ko unau teng inbel kipawl theih napeuh tawh neekpih hibek in buh leh mehlim sim, zohuan, ahihkei leh kitui huan leh gilvah dan gik kasa uhhi. Ka tate a ulam teng in meh pen nel sim mah leh lim sa uh aa, aneu lamteng ahihleh ham burger cihpeuh, pizza cihpeuh hileh maitai zaw uhhi. Singapore aa khang aneu tegel bel USA om ka tute uh (kaPa’ tusawn, ka U pii’ tute) tawh kigual ahihman in inn ah an aneek lam uhzong muhkhaak mel hinawnlohi. Bangmah ne ngeilo cihding inlah thacing bilbel veve uhhi.

Tuam omtek hikei in a omkhawm hi le-ung abuaihuai mahmah ding ahihi. Khang khat leh khangkhat ihduhdan, ih gong kibang nawnlo kacih nopna ahihi.

Khang khat khit khangkhat gengen loh mitphiat kalsung aa akikhel, akilaih hih leitung ah ihgatam duhna, ihvaimim ciim neekna, ihniikten ihpuansilh, ihton, ihlaam, ihkipi, ih kitten, zu aih, sa aih nate kilaih loding in ih umhiam, kip den ding ih lam en hiam? Ih pau ihlaite mangthang loding iih lam en ngamhiam? Tuni aa Zomi ihihna alak khempeuh in zingciang lak nawnlo dinghi. Hihte Zomite hihna hi cihcip theihthu hinawnlo hi. Kikhel, kilaih, kizang nawnlo, mangthang, bei, leitung ngeina ahihi. Laisingtho siamte’n ong gelh uhciang Greek Laisiangtho (Septuagint) ong piankhiatna abulpi pen, Greek Kumpi Ptolemy I Soter (367-283 BCE) in Egypt gam a uk hunsung aa sal aa amat, Alexandria aa akoih Jew mi tampi leh ong peembeh Jew (diaspora Jews) te in kum sawtpi khit ciangin, Hebrew pau leh Hebrew lai thei nawnlo, Greek ngeina pom (Hellenistic Jews) ta uh ahihman in tuate’ ading ngimna tawh Greek Laisiangtho ong piang khia hi ci uhhi.

Tua ahihman in ei Zomi (diaspora Zomi) te zong hunkhat takteh Egypt gam atung Jews temah bangding hihang.

Tua niciang Zomi icih, Zomi ihihna bang akimu nawn diam? Angaihsut huai mahmah thu ahihi. Gal ngaihsut kha lehang lungzuan huai phial hi.

Hihding pen Topa Zeisu in natheikhol lua mahmah ahihman in savun lui leh lenggah zu thak, puanlui leh puanthak tawh gentehna napiahi.

Japan gal lai aa siik te mah to asa Zomite ading hih kikhelna zuihhak mahmah, laih hak mahmahhi. Kikhel ding hilehang polhtehna, palauna, kuhkal lohna, manthanna lam in laksawm lai hihang.

Tua ahihleh hun sawtpi, khang tampi khit ciang, Zomite koitak tung ding aa, koi ah kinga ding ihihiam? Zomite destination bang hiding hiam? Hihpen tuni aa ihngaihsut ding athupi pen ahihi. Leitung ah akikhel ngeilo bang om cih zong masa in tua mun ah ih minam hihna ihngak kei leh, akikhel dending mun ah nga kha lehang hun tomkha sung aa amangthang ding ihihi.

Tulaitak lian in Zomi akici khempeuh minam bup in Christian upna a um, Christian asuak khin cihtheih hiphialta hi. Zogam aa omteng lah Christian, apusuak, apaikhia tenglah Christian ihihi. Hunkhat takteh, ihngeina, ihkampau, ihlai, ih annek tuidawn, ihkizepna, ihpuansilh, ih gamtat zia te aa kipan, ihmel ihsa dongin Zomi ihihna lak nawnlo ding ahihleh, midangte in ong muh ciang hih Zomi hi ong cihtheih nading bang a om dinghiam? A omkei leh minam mangthang himawklo ding ihihiam?

Nungzuipi Paul in, “Ka Up Ppa katheihi” ci-in akingak nading na tel mahmah hi. Akikhel ngei hetlo tung na kinga ahihman in tuni dong mangthanglo ahihlam ei mahmah zong a teci (witness) ihihi.
Zomite’n ih Up Pa ihthei hiam? Ih theihleh, ih Up Pa’n bang sem ding in ong vaikhak aa, a Up Pa athei, atel Paul in bang sem hiam? Tuni aa Zomi hihna kici khatzong apua nawnloding, zingciang aa Zomi dingpa, midangte’n Zomi suan leh khak hi acih theih nading in, ih Up Pa ihtheihtel ding thupi aa tua ih uppa ong sih vaikhakna sepna in Zomi suan leh khak ahihlam kilat sakna, midangte in, “Hihpa in hih nasep sem ahihteh, Zomi suan leh khak hidinghi” ong cihtheihna in, tuni Zomite tup leh kingakna ahihding lam en in kalsuan ding hihang.

Ih Up Pa theihna, ih Up Pa ong sawl sepna in, akikhel, akilaih ngeilo ding Zomite ngeina, Zomite lai, Zomite kampau, Zomite anneek, Zomite kizepna, Zomite nikten puansilh, Zomite zia leh tong hisak peuh lehang leitung beidong amangthang nawnlo minam, apiansak taak minam ihi dinghi. Zomite’n ih UP PA ihthei taktak mah hiam? “Note vaak kawikawi unla, acih khit ciang bang semding in ong sawl hiam?” Tu’n avaak kawikawi ihihi. Tua ahihleh bang semding?

Hang Khan Lian