Kha Pumpi (Spiritual body)
Pawlkhat in kha pumpi pen a kilawng thei lo pumpi “nonphysical” hi ding hi ci-in um uh hi. A thokik Jesuh pumpi pen tua bang hi lo-in a taktakin a kilawng thei pumpi hi tawntung ta a, a utut-in thankik bangin a mel kikhel kawikawi tua transformer dante pawl hi lo hi. Jesuh pen a thawhkik zawh ciangh mangvat vat thei hi ci-in Luke 24: 31na bangah na gen hi. Mang (disappear) cih le kilaih (transformed) cih thu kilamdang hi. Jesuh pen mihing a na muhna panin banglo khatin kilaih ziauin khuambul khawngin piang ziau cih bang hi lo zawin a vangliatna tawh kiseel ziau thei-in mihing’ muh theihna pan mang ziau thei hi bek hi. Ih muh theihna ih mit hong kibum sak leh ih muh ding pa ih mu nawn kei ding hi. Jesuh pen a kikhel kawikawi hi nawn lo hi. Amah pen Pasian-Mihing ‘the God-Man’ hi tawntung ta hi. A ut peuhpeuh a piang kawikawi hi lo hi. Ahi zongin a kiciangtan mihing muhna panin bel mang thei hi.
Jesuh pen a thawhkik zawh nungzuite’ muhna pan mang thei zel hi (disappeared from sight) ci-in a gen ciangin bangmah lo-in piang (became emmaterial) ahih manin a kimu thei lo (invisible) ahi hi cih thu pen maan lo hi. Mihingte’ muh theihna panin kihemkhia-in kisel thei hi cih bangdan hi zaw hi. Sawltak 8: 39na ah “Topa’ Kha Siangtho in Philip paikhiatpih a, Ethiopia Mangpa in mu nawn lo hi,” a cih mah bangin, Jesuh pen nungzuite’ muhna panin a vangliatna in seel ahi manin a kimu thei lo hi zaw hi. The sense is not “immaterial” but “hidden from sight, not visible”. Pasian in a selcip thusimte Amah mah in ong pholak lo hi leh a kimuh theih lohna thu Hebrews 1: 1-3na ah na gen hi. Thawhkik zawh a kimu thei Jesuh’ pumpi pen a kimu thei lo suak ta hi, cih bang hi lo-in, ih kimu kik nai kei hi, cih ding hi zaw hi. The resurrected Jesus’ physical body never became nonphysical. John 20: 19na ah kong kikhaknelh uh hi napi-in Jesuh ong pai-in amaute’ lakah ong ding hi, na ci mah hi.
Sawltak 5: 19, 23na te ih sim ciangh hih thu tawh kisai ih theihtheih nading thu khat om hi. Banghiam cih leh, sawltakte pen thong kongkhak tawnin paikhia uh ci lo a, Topa’ vantung mi khat in thong kongkhakte hong a, sawltakte a paikhiat pih hi, na ci hi. Tua mah bangin nungzuite zong a khaan (room) sungah kikhaknelh in a om laitakun kongkhak pen a lamdangtakin kihong dinga, Jesuh tua zui-in a lut phei laitaka thupiang pen nungzuite muh theihna mit panin tawmvei sung kisel hi zaw ding hi. Peter zong thong sungah a kikhihna kolte panin a suahtak theihna pen thankik khawng piang pak, a khut a khete khawng neu sak thei pak ahih mana a kikhihna kol pan a suakta hi lo a, a kolte a sutkhiat sak khat om hi zaw hi (Sawltak 12: 7).
Tua mah bangin John 20: 19, 26na a, ih Topa Jesuh zong a pai nading kongkhak a kihon sak laitakin amah pen a kilawng thei pumpi nei pa mah hi veve hi. Lai Siangtho in Jesuh in kongkhak kikhak pen pailetin ong tumphei hi, na ci lo hi. Nungzuite mit tawh muh theih loh dingin kongkhak kihongin tua zui-in Jesuh a lamdang takin a vangliatna tawh ong pai-in nungzuite’ lakah ong ding ziau hi zaw ding hi. Jesuh Khrih pen zanni tuni a tawntung in a kibang ngitnget hi (Heb. 13: 8). Jesuh pen a kilawng thei zel (could materialize) a kilawng thei lo zel (dematerialize) bangin a piang kawikawi hi lo hi. A kilawng thei ahihna thu pen Pasian in Piancil lai-in a kilawng thei mi a bawlin hoih mahmah hi ‘it was very good’ na ci hi (Piancilna 1: 31). Jesuh zong eite mah bangin a kilawng thei pumpi a nei tawntung pa ahi hi ‘Emmanuel God with us”.
A thokik Jesuh: Jesuh pen Lazarus bangin a kitho kiksak hi lo-in a thokik pa hi zaw hi. Hih Lai Siangtho munte ah Pa in Khrih thokik sak hi ci hi (Sawltak 2: 24; Rom 6: 4; 1Cor 6: 14; Gal. 1: 1; Eph. 1: 20). Ahi zongin Jesuh mahmah in zong “Ka nuntakna piak khiat theih nading le lakkik theih nading thu ka Pa in kei tungah ahong piak ahi hi,” ci hi. Bektham lo-in “hih biakinnpi susia lecin uh ni thum sungin ka dingsak kik ding hi,” ci lai hi (John 10: 17-18-2: 19-21).
Thawhkikna pen Pa, Ta, Kha nasep ahi hi. Jesuh pen a kithosak hi lo-in a thokikpa hizaw hi. Jesuh mahmah in “Keimah in thawhkikna le nuntakna ka hi hi. I am the resurrection and the life” na ci hi (John 11: 25; Heb. 7: 16).
Evan. Suang Dal
Comment piaknop aomleh...