Gamdang (USA) a zincil te leh atungthak te theihhuai thu pawlkhat
Mun dang, gam dang i tun ciangin a zat dan a nop mahmah ding kimlai, i theihloh i telloh manin buai a kuul hetlohna munte ah kibuai thei mahmah ahih manin deihsakna tawh theih huai kasak pawlkhat kong hawm sawn nuam hi. I theihloh pen zumhuai peuhmahlo-a i theihnoploh pen a zum huai hi zaw hi. Theilopipi a thei dana i om zong zumhuai zaw lai hi.
Eima-a gamdang a tung ciilte zong ei sangin a buai ngei zaw zong na om veve thei lai hi. Gamdang tualsuak kitam nai hetlo-a, hun khat lai-a gamdang ah a tungciil vivete i hi hi. Mite ii om dan khawl dante damdama a kitheitoto ahi hi. Tua ahih manin “Gamdang (USA) A Zin Ciilte le A Tung Thakte Theih Huai Thu Pawlkhat” cih thului tawh lai tawmkhat kong gelh hi.
Maitai, Nuihmai Ding:
Mipicing pawlkhat ii zia-le-tong hoih mahmah khat in kithei ngei kiuhkeuhlo himah lehang i kimuh ciilin hong nuihmai uh hi. Tua pen ngeina hoih mahmah khat ahi hi. Apau i siam nai kei zongin nuihmai phot lehang vai tampi hong siangsak thei hi. Vanleng tung panin a gim mahmahsa-in a tung i hi phial zongin i kimuh ciilpihte tawh i kinuihmai ding pen ngeina hoih mahmah khat ahi hi.
Annnek Tuidawn Dan:
USA pen Pasian thupha tawh ann-le-tui lamah lunghimawhna om khollo hi. Tua ahih manin tuate duh ingh, tuate duh keng, tuate ne thei ingh, tua namte ne thei keng cih ngamna mun ahi hi. Tua bangin siangtaka gen theih zong thupi mahmah hi. I nek ngeiloh ann lamdang pawlkhat zong om thei ahih manin tampi tak la neinai pahloin tawmkhat thuk masa-in tua panin lim i sak leh lak thuah ding hi zaw hi.
Annhuan Mehhuan Dan:
Gamdanga annhuan mehhuan dan, annnek tuidawn dan pen i gamlama i zat dan tawh kibanglo thei ahih manin zintunna ding inntekte tawh kimuh khit ciangin theih huai i sak a om leh inntekte dottel pah lel ding ahi hi. Tui sosak dan, tuisuah/tuibut dan, niangtui/coffee bawl dan, annhuan dante, annthuk dante amau zat dana hih theih, ciin theih ding thupi mahmah hi. I zintunna inntekte pawlkhat pen a nasep uh tawh buai mahmah ahih manin “Nang-le-nangin na kibawl mai in” hong ci ziau thei hi.
A tuihon dan, a mei hon dan, annhuan dante thei kei lehang amau omloh kalin ann khawng kingawl ngingei thei hi. Gamdang (US) te in annbuk vanzat thupi deuh pawlkhat nei hi. Refrigerator/fridge/freezer (tuikhalbeem) pen inn lusik in kinei hi. Nek theih a tam zaw hihte ah kikoih hi. Hih refrigerator pen a tam zaw phelpi nih omin veilam pen vot zaw deuha sa (meat) tuamtuam koihna-in kizangh hi. Ni tampi aitang nek theih kilei khola saseh tuamtuam bang pen hih tengah kikhalsakin sawtpi kikoih thei hi. I huan ding ciangin kinemsakkika kihuan hi.
Hih sasehte khal ahih manin tuikhal teng a bei theihna dingin a pua ah tawmkhat kikoih ahihkeh tuilum tawh tawmkhat kidiahin tua panin kihuan pan hi. Tuikhal (ice) zong hih a veilam phelpi panin kila hi. Tuikhalbeem taklam pen a votlo zaw deuh dingin kibawla tua sungah mehteh, mehgah tuamtuamte kikoih hi. Dawn theih tuamtuam zong kikoih hi.
Rice cooker, Oven, Microwave, Washing/Dryer Machine Zat Dan:
US ah buh a kihuan ciangin a tam zaw in rice cooker a kici annhuanna sette kizangh hi. Tua ahih manin tuate zat dan zong theih huai mahmah ahih manin dot theih ding a om ciangin dot pah ding ahi hi. Oven ii a tunglam pen thukh bangin kizangha a nuai lam pen sa-emna-in kizangh hi.
Oven a tunglam pen meh tuamtuam huanna dingin kizangha a zat dan, a hon dante dot theih ding a om ciangin dot pah ding ahi hi. Microwave kici leuleu khat oma hih pen ann khing, meh khing tuamtuamte satsuahna dingin kizangh hi. Washing machine pen puansawpna hi-a tua i sawpsate a keusakna pen dryer kici hi. Tuate zong a zat dan thei lehang hoih mahmah hi.
Tuihon Dan, Tuibuk le Dailenbuk Zat Dan:
USA ah deih hunhunin tui kihong ziauziau thei hi. Tua bek thamlo tui a lum le a sa kingah den hi. Tua ahih manin a lum a sa hon dan zong i theih keileh a theite tungah donghtel pah lehang kibuailo zaw deuh pah hi. Tua hi kei leh phalbi khuadam mahmah laitak khawngin tuivot mahmah tawh kisil cih bang om thei hi. Tuamah bangin khua-ul mahmah laitaka tuisapi tawh kisil cih zong om thei veve hi.
Tuibuk ah kisil ciangin hoihtaka kongkhak kalha guaktanga kisil ding ahi hi. Kisil ciangin a pualam ah tui a kithehlohna dingin a dal (curtain) om hi. Tua a dal pen dal nih a phak leh a nuailam a kaai pen kisilna kuang (bathtub) sungah kiatsuksak ding hi-a a khat lam pen a pualamah kiatsuksak ding ahi hi. Tua banga i hih keileh i kisilna tui in kisilna room teng kawtsak mang ding hi. A dalna (curtain) khat bek a om leh zong a tunga banga hih ding ahi hi.
Kisil ciangin tui tawh kikapsakna a hon dan zong khat-le-khat kibanglo thei ahih manin inntekte kiangah hoihtak dot pah ding ahi hi. Kisilkhit ciangin bathtub sungah hoihtak kinul siang sitsetin tua panin a sual tung sik pat ding ahi hi. Tua hi keileh a sual tung le khenulnate kawt gawp thei hi. Dailenbuk zat dan zong theih ding kisam mahmah hi. Dailenbuk pen a siin taktak (a khuhcipna) le i tutsuk ciangin a dalna cihte om hi.
Pasal ten dinsa-in zun a thak ding leh a tutna dinga kikoih pen lemto-in tuakhit ciangin zunthak ding ahi hi. Tua bangin lemto kei lehang a tutna dinga kikoih a dalna pen zun baang nengnang thei hi. Daileng ciangin tua a dalna pen khiasukin dailen ding ahi hi. US ah dailen ciangin tui tawh taw kisawplo-in laidal tawh siak zaw uh hi. Tua a siakna laidal pen dailenna tui sungah khiatsuk ding ahi hi.
Room (Khan) Zat Dan:
US a omte a tam zawin mimal vai (privacy) kithupisak mahmah hi. Ei khan (room) tekah ki-oma kuamah kinawngkaisak khollo uh hi. Inn sung khan khat peuhpeuh ah na lutma-in kiuh (knock) masak hamtang ding ahi hi. Mi pawlkhat in inn khatpeuh ah a hawh uh ciangin a inn uh hoihsa lua, kipahpih lua ahih manin room khempeuh ban et kawikawi thei hi.
Zan nasema a tawlnga, a ihmu khawng a sungah om thei ahih lam mangngilh hetloh ding ahi hi. Tua dana a ban et kawikawi nuam ngiat i hihleh a kongkhak beek kiuh masak ding kilawm mahmah hi. Amau innkuan ahilo midang khawng in a room saapsawn cih zong om thei ahih lam mangngilhloh ding ahi hi.
Nasep Dan:
US pen nasep mahmah na gam ahih manin ni khat nai 24 pen nasep hun nam thum bangin khen uh hi. Zingtunga a kuante 1st shift kici hi. 1st shift-a nasemte pen zingtung lol mahmaha nitak lam zong nasep hong ciah baih zaw deuh pah uh hi. 1st shift nasemte pen thawhbaih kul ahih manin nitaak zong lumbaih nuam cih zong theihpih huai hi. Sun khit deuha a kuante pen 2nd shift kici hi. 2nd shift a nasemte pen kuan hak ahih manin zankima hong tungkikzo pan hi. Hong tung hak ahih manin zingsang thawh zong baihsalo pah uh hi.
Zingsang a thawhhak pen a kizenlo cih bang hipah samlo-a a nasep tawh kizui-a ihmu hi mai hi. Zin siate in hun i zat ciangin pulpit tung khawng panin “Ka zinte zinglol kei lua” cih zong hoih hetlo thei hi. Zan nasemte om leuleu-a tuate pen night shift ahihkeh 3rd shift kici hi. 3rd shift nasemte pen zan sung teng na semin sun ciangin ihmu zaw uh hi. Tua ahih manin 3rd shift nasemte kiangah suun khawngin vahawh ahihkeh phone khawng tawh hopih themthum lehang kisuan huai mahmah hi.
Phone Zat Dan:
Nasep hun kibanglo, man hun kibanglo ahih manin phone pen a thupi lua ahih kei leh message khak masa photin i hopih nopna thu gen masa lehang hoih zaw hi. Lup hun le thawh hun kibang khollo ahih manin phone hona ah zong pilvan huai mahmah hi. Kikhopna, meeting neihna sung khawngah phone hong kisap leh kisanglo-a, sanloh theihloh vai thupi mahmah ahih leh a pualam ah pai-in kisang pan hi.
Mipi laka phone ging vangvang khawng zumhuai kisa ahih manin ahih theih leh phone pen silence (a ginglo) ahihkeh vibrate (a lok) dingin kikoih zaw hi. Tua bek thamloin mi khat peuh phone i sap ciangin a let theih kei uh leh zong voice mail (kam khumh) ahihkeh text message (lai-at) tawh i sapna a hang theihsak zong ngeina hoih mahmah khat ahi hi.
More: Naungek suakcil ending in napai ciang theihhuai pawlkhat
Nikten Puansilh Dan le Hunzat Dan:
USA pen suahtakna gam ahih manin nikten puansilh lamah suakta mahmah lel uh hi. Ahi zongin a kilawm a kituak cih om thei veve hi. I kikhopnate khawngah amau om dan, kizep dan, nikten puansilh danin om thei lehang hoih mahmah hi. Tua bek thamloin hunzatna, teci panna khawngah pilvan huai mahmah hi. Banghang hiam cihleh i hunzatnate live khawng pana a kikhah na hi thei-a record zong na kibawl sitset thei hi.
Kammal Kilawmlo Pawlkhat:
Crusade cih kammal tangin revival, khawmpi, biakpiakna cih bangin kammal a kilawm a kituakte zat ding hoih zaw hi. Mivomte pen Negro/ Nigero/ Niger cihloh ding ahi hi. Banghang hiam cihleh tua min pen tualniam min ahihkeh sila min dan khatin ngaihsun uh ahih manin amau zakna ah kammal kha mahmah khat ahi hi. Dal Lam Mang (Logos Life)
Comment piaknop aomleh...