Kuala Lumpur khuasung aom Construction khat ah akizang Crane tuksuk, numeikhat liam

Kuala Lumpur khuasung aom Construction khat ah akizang Crane tuksuk, numeikhat liam

Malaysia, Kuala Lumpur sung aom inn kilamthakna Construction Site khatah akizang vangik doptohna Crane mungpi tuksuk in mi tampi liam a, mawtaw zong honkhat kisia cih theStar pan kiza hi. Kuala Lumpur, Kampung Baru vengsung ah tuni Thursday (November 09) sunlam in thupiang ahihi.

Hih Construction Site ah mawhpuak anei ahi Developer UDA Holdings Bhd te’n Website tungah agelhkhiatna ah hih tuahsiatna pen tuni Thursday 12:30pm hunpawl in apiang ci uhhi.

Vangik doptohna Crane mungpi pen atuksuk ciangin vanthemnen akia te’n anuai aom numeikhat dengkha cihi. Tua numeinu ii aliang adengkha kici a, Kuala Lumpur Hospital ah zatui kibawlding in kipuak hi.

Tualo adangzong mipawlkhat liamna tuamtuam angah om kici a, ahi zongin asi leh aliamngawhlua cihbang kuamah omlo bilbel hi. Ahi zongin mawtaw tampitak dengkha in limsiat mahmah kici hi.

Developer UDA Holdings Bhd te’n hih tuahsiatna apianna munteng pen khakcip sakpah uh a, hihvai tawh akisai Parties te zasakpah uhhi.

Banghang in hihbang in tuahsiatna piangtheihiam cihpen thunei te’n hoihtak kancianding uh ci a, athu kancianna Investigation amansiang khitciang in theihhuai Information te ki pulakkhia kikding hi ci’n genkhia uhhi.

Video: Crane collapses at Kampung Baru construction site

Tuaban ah hihbang in tuahsiatna Incident apianpen ka lunghimawh, kadah mahmah uhhi ci’n Developer UDA Holdings Bhd te’n pulakkhia uh a, mailam ah hihbangdan tuahsiatna aomkik nawnloh nadingin ka hanciam mahmahding uhhi ci’n genkhia uhhi.

Hih vangik doptohna Crane pen atunga Photo sungah ihmuhtheih mahbangin sautuak diatduat zawzen hi. Construction Building ii atung sawndawnpi pekpan in atuksuk hi a, anuai ageinai aom mipi tampi adenkhakloh phadawmlai cihding ahihi.

More: Mawtaw tailai khat atungpan Crane kiasuk in dengkha, mi 7 si

Malaysia, Kuala Lumpur khuasung aom Construction Site te ah hihbangdan tuahsiatna pen abeisa hunsung inzong tamveipi kiza zelzel hi. Ahihtheih liamliam nakleh Construction Site geinai khawngah nawkkhak lohding pe hoihzaw, Safety omzaw khading hi. Sawltak #zomidaily