Hotel khatah mopawi bawllaitak Gas bung puakkham in asi mi 18 phata

India gamsung Hotel khatah mopawi bawllaitak Gas bung puakkham in asi mi 18 phata

India gamsung mopawi kibawlna Hotel khatah apuakkham omin, asi bekbek mi 18 phatota cih AFP pan kiza hi. India, Rajasthan State sung aom Beawar City sungah abeisa Friday ni in mopawi kibawllaitak Hotel khat apuakkham ahihi.

Tua apuakkhamsak pen Gas Cylinder bungpan kici a, Hotel Building innpi pen asiakcip bekthamlo, mei kanggawpsak sawnsawn hi.

Tuasiahna apianni akipan Rescue Team te’n asungah aawkcip, aki vulhnelhkha te azon akipanpah ngeingai uh hi a, Saturday nitaklam ciangciang misi akigawm in luang 9 ki mukhia hi.

Tuni Sunday ni in Rescue Team te’n Building kicimlak ah misiluang muhbeh leuleu uh a, tuciangciang misi akigawm in 18 tak phatota hi.

Sunday ni in Rescue Team tepen Indian Army te’n panpih, zonpih ahih manin, misi luang 9 tak ki muhbeh in, misi 18 tak aphatota ahihi ci’n Senior Administrative Official Gaurav Goyal in genkhia hi. Hih tuahsiatna apianna khuapen State Capital Jaipur City panin 200km khawng agamla ahihi.

Asi banah aliamzong mitampi om uhhi. Aliam lakah mi 5 tepen nakliam phadiak mahmah uh a, tuatepen zato ah kikem in zatui kibawl cihi.

Hih apuakkham Hotel pen dawlthum apha “three-storey hotel” khat hi a, hih Hotel sungah mopawi akibawl laitak in apuakkham ahihi.

Hih Gas Cylinder puakkhamvai tawh kisai in amukha Eyewitness te’n Local Broadcaster NDTV te tungah agenna ah anhuanbuk sungah anhuan Chef khatin Gas gung “Cooking Canister” khat Refill abawlsawm laitak in apuakkham akipan cihi.

Rajasthan Chief Minister Vasundhara Raje zong Saturday nitaklam in aliamte akikepna Hospital ah vahawh hi. Asi innkuante zong siatvatna mikhat ciangin 200,000 rupees (RM12,094) ciat a innkuanpihte piakding in genkhia hi.

More: Malaysia Subang Gas puakkham lakah ah Myanmar 6 kihel, mi 2 sikhin

India gamsung ah Gas bung puakkham, Gas Cylinder Explosion cihpen kinawhzak simpian hi. Banghanghiam cih akikan ciangin Safety Standards hoihtak omlo ahihman kici hi. Sawltak #zomidaily