Na Nung Sang Ah

Na Nung Sang Ah

Ih sih zawhteh ih nung sang a ki neih nawnlo dingin ih ngaihsun hi. Na dam lai-in na tapa, a tupa, na minam ading thumanpha ngo manpha na nusiat zawhleh na sih hangin na nung sang hing kil kel hi. Khangkhat kheng manlo in na tu pa ten na min hong manggilhta in, na minam pihten phawk in hong neih nawnlo uh hi. A hangin na damlai-in na tate ading, a tute ading, na minam ading amanpha thute ngaihsunlo in nang ading takpi zong na muban kei hi.

Na tapa te, na tupa te, na minam pihte it ing, vei ing na cih takpi aleh na damlai-in thusaupi ngaihsun in na gamtat kul hi. Bang cih gamtat ding-

Laibu lei tangtang in, Bawl zawh sawm in:

Zolai sim hatlo, Zolai sim thei keng, Lai sim hat keng ci dihdih ken. Na tate a pil ding, thu a thei dinguh na deih taktak leh nang mahmah lai na simzo kei phail zongin na tapa ading, na tupa ading Laibu lei tangtang in. Tua-in thu saupi muhna hi. Na tate na tute apil ding, thu akan ding na deihleh Zolai Laibu ki bawlte lei hamtang in.

Ka tate ka tuten Buhsih leh Meh khen thei peuhleh phamawh kei na cihleh Zolai Bu te lei sese kullo hi. Thu saupi ngaihsut kullo anne ihmu tho hilel hi. Tua bang mite Zomite thupil ah, ” Lung nuntak”, ni ci hi. Lung cihpen gan hing min hi a, nungta maimai lel cihna zong ahihi.

Mipil ten a theina uh laitawh ciamteh uhhi. Zolai ih neih manin ThangHo leh LianDo, Penglam tangthu, Cing Khup leh Ngambawm cih a ki panin ih tangthute a khang a khangin ki theitoto hi. Zolai thei masasa in minam pihte ading thumanpha, ngeina, tangthu, thucin cihte a Bu in tampi bawlzo leng minam itna, veina, khualna na hi gige hi.

Laibu Zolus, Leivui panin, Hauhna leh Khangsauna thusim, Ka Lai Kung Pan In, Na Pasal Theisak ken, Laitai, Tangko cihte a ki pan Laibu tuamtuam ka pa Nang Za Kam ( Kamngaih ) in na lei tangtang a, ka nop tuampih mahmah hi. Kapa in a sim khitteh Laibu koihna ah koih a, ken tuateng ka bansim theizel hi. Laibu cih pen a maimang theilo ding thucin taktak ahih manin Zomi Siamsin a zo khinsa ten Bu khat ciat hong bawl henla, a bawl khialo ten neihding leiding hanciam tangtang leng tate tute minam pihte khualna ban-ah thu muhna ahihi. Na nung sang ahing kilkel ding na hi gige hi.

Na sepna ah: hanciam in, cihtak in, thuman in, zuau ken

Minam ading na hoih asem abawl mi khat aminam pihten cik mah in manggilh lo aa, laitheih mikhat leh thumu mikhat in ciamteh vilvel hi. Lawhcinna pen thutuam hi. Minam ading sepna pen ahi ding mah abat hangin a thubaih ding hi peuh mah lo hi.

Makai te a zuautat, a citaklo, a thumanlo dingin ki ngaihsutlo na pi a zuau mi, a thumanlo mi, a citaklo mi na om thei veve hi. Tua bang gam tatna pen a nung sangah ki thei kik veve hi. Gamtatna khempeuh in nungsang neih hi. Nungsang aneihlam i tel ding thupi hi. Kum sawtpi ki damlo ahih manin mikhat ading, na mipihte ading na hoih sep ding hanciam huai hi. Ih damlai-in awlmawh neih sese lo in makai pan mun na ngah phial zongin a nung sang ding thute a limcii hiam? cih ki sit huai hi.

Pasian ading, minam ading na hoih a sem mikhat in thaman ngah bek hilo a nung sang thute namtui ahih manin a tu ata a minam pihten nop tuam pih in, phawk tawntung hi. Mi nop tuampih ding na asep a gel thei peuh mahin hanciam huai mahmah hi.

Na maban ding na geel siamna pen na nungsang ading thuhoih ageel na hihi. A thuman a hoih tawh Zomite ki lawm hi. Pasian in Zomi Nam in hong bawl manin ka nuam mahmah hi. Ih nungsang na nungsang ding ngaihsut huai hi.

Thawn Tuang
Zomi Angvaan