Ka Pa Nungsangah Hong Kitutpihnate – 3 ~ Hau Za Cin

Ka Pa Nungsangah Hong Kitutpihnate – 3 ~ Hau Za Cin

Tedim pan ka ciahsuk uh ciangin Kawlpi pan ka khua vuah ka U Thang ka phone a, mipi lasak leh khuanggingte, Upa Pawl in kum 60 tungsiah a sih cianga a tum den uh Zampi kitumte ka za zuaizuai a, ka khasiat hong suak in ka khitui ka kidekzo kei hi. Tu-a khuangging leh lasate lah ka pa luang gei a tute lasak hizen mawk a maw ciin mulkimhuaisa liangin ka khasiat hong suak lua mahmah hi. I pianna pa sihna hanga khuang kitum, la kisa, zam kitum leh mite kahna aw zak aw… na mahmah sam ei leitung!

Ka u Suan Lian Thang in, “I Pa hampha mahmah ahi maw, khuaveng pan a thei masasa in hong delh in, Champhai leh Aizawl pek pan zong mi tampi in a zanzan in hong delh uh a, mawtaw lampi buannawi mah leh hong hanciam in khe nangawn tawh hong pai tampi tak om hi. Tua banga hong itsak, hong itpihte hangin hampha mahmah hihang. Na kikhasiasak het ken aw nau,” hong cih hangin ka bil in za a, ka mitkha in ka inn lim tualzang uh, innsung teng leh khuasung khempeuh mu ahih manin kipasalsak haksa ka sa mai hi. Cikmah cianga kimu nawnlo dinga ka pa in tuni hanmual na tang ta ding cih ka ngaihsut ciang ka ngaihsun ngam kei mai hi. Leitung a gik in gik mahmah hi, ka ci mai hi.

Kawlpi pan Zangkong zuan dingin ka kithawi uh a, vanlengtual ah ka vanteng uh ka ap khit ciangin Dr. Thuam Khan Suan in niangtui hong dawnpih a tua mun ah Sia Job Thawngno, Sia Khampi te nupa, ka sunghte Pa Cin Lian Thang leh Pa Thang Cin Khupte ban ah lawm leh gual tampi in hong delh in vanleng sung lut dongin hong khutlet om toto hi.

3. Zangkong Ah:

Cidam a vanlengsung lut in Kawlpi pan nai nih sung ka len khit uh ciangin Zangkong ka tungsuk uh hi. Mandalay ah minit 15 sung vanlengtui thun, a tuak ding teng tuak, a kah dingteng kah cih bang bek hi a, sawt ka khawl kei uh hi. Zangkong ka tun ma deuh uh guah phin seuhseuh a, ka vei lam limlang pan ka khuadak leh meisuum ka mu hi. Meipi pat kap banga paak viatvuat kawmlak ah meisuum ka muh ciangin maan zaih in video ka la a, ka pa in zong hong zui suksuk hiding ciin ka deihbawl hi.

Amah vantungah omta a, ama adingin meipi tungte, leitung khempeuh pen baih takin vak kawikawi thei lel dinguh hi cih ka um hi. Vantunggam a tungsate adingin vantung lam nate pen a lianlua, a gollua hilo ding hi cih ka um hi; banghang hiam cih leh amau Pasian tawh kikhawl in vangam ah nuamtakin a lengkhawmta uh ahi hi. Tua manin ka veilam a meisuum tawh ka vanleng uh hong zui pen ka pa in hong ompih, hong zui hiding ciin ka khamuang mahmah a, lamdang sa, lungdam si in ka lung hong nuamsak tuam mahmah hi.

Zangkong vanlengtual ka tuk uh ciangin lawmpa Pa Vungh Suan Mang leh Sia Zambawi (Rev. Dr. Go Chin Zam), National Director, Operation Mobilization, Myanmar in hong na dawn pah in, ka van teng hong liksak a, ama mawtaw sungah guang in hong khutlet pah uh hi. Zosuan Tuailai Kawmpi pan ciah ka hih manun ko Singapore pan pai teng vanleng khat ah a tuangkhawm ka hi uh hi. Kei leh ka zi Vung Deih Cing lawm Suan mawtaw ah tuang in lawmte (Pa Hang Khan Lian, Pa Khup Khawm Mung, Dr. Chin Khan Lun, Sianu Ciin) Tg. Pau Mun Khai leh Sia Zambawi mawtaw ah a tuang uh hi.

Vanlengtual pan tai pah vangvang in ka pa hong nusiatna hanga hong tutpih dingin Pa Tuan leh Nu Lun (Prof. C. Thang Za Tuan leh Sianu Cin Khan Lun) te inn ka delh pah vingveng uh hi. Khua hong zing huaihuai a, lampi ah mawtaw hong tam deuhdeuh in Zangkong khuasung lamgei khempeuh meivak tang zihziah hi. Pa Tuan leh Nu Lun te kiang ka tun uh ciangin amau innkuan ban ah ka tun ding uh ngak a hong tutpih, hong hehnem dingin Siate – Rev. Khoi Lam Thang, Rev. Thang Cin Lian leh Pa Cin Suan Mang, Pa Cin Go Lam Thang, Lia Lun Dim, Pa Thang Sian Khai (Banzal Khaipi) te nupa ban ah Zozum pute – Pu Lengtong Kam Khen, Pu Khup Mung leh Full Gospel a khangnote na om uh a, khut kilen in hong na dawn uh hi. Ka nuphal Ko Naing leh Sianu Don San Cing te innkuan in zong hong delh in hong tutpih uh hi. Khuasung khat ahih hang ki gamla thei mahmah ahih manin hih bang itna ka tan uh hampha ka kisa uh hi.

A mawtaw tawh hong dawn lawm Suan leh Sia Zambawi leh hong vaidawn khempeuh tungah ka lungdam mahmah hi. Hong dawn khempeuh nek dingin Pa Cin Suan Mang in aksa leh ngasa meh na lei in inntek Nu Lun leh Pa Tuan te innkuan in limtak in hong huansak uh a, Zomi te Vaphual ki itna ka tan manin ka angtanga, ka lungdam mahmah hi.

Sia Khoi Lam Thang hong dingin TUTKHOPNA HUN khat hong makaih a, hong nusia ka pa tawh kisai phawkna, dahpihna, itna leh khamuanna thu cih bangin a gen ut khempeuh in gen in hun hoih mahmah khat hong zatpih hi. Amah adingin ka pa pen a ‘pu’ khat ahih manin a itna leh a phawkna gen a, Murlen hong zin lai a a theih leh a phawklai thu pawlkhat gen hi. Hun sawtpi hi khin zo a, a theihte bang koh adingin thuthak hong suak kik bilbel a, tangthu ciamtehna khat hong suakkik hi.

Sia Thang Cin Lian, Sia Zambawi te in pa hong nusiat hanga hong dahpihna uh leh Christian i hih manin lametna i neihte hong gen uh a, khamuanna i neihte tawh hong hehnem uh hi. Pa Tuan leh Nu Lun in zong hong thuakpihna uh hong gen ban ah, ka pa kum 74 pha pan pen mihing upa hinailo a, it huai, pammaih mahmah hi cih hong pulak uh hi.

Ka tun ding uh a theih uh cianga hong delhpah, khuavak lai pek pan sawtpi hong ngak khin Zozum pute zong a banban in thu hong gen uh hi. Pu Lengtong Kam Khen pen February 2015 in ka khua uh Murlen ah Gospel va pai in ka pa tawh va kimu a, maan kizaih in kei zong tua maan hong khak hi. Tua maan pen ka pa maan a damlai a kilak tawp hi dingin ka um mai hi. Tua manin Pu Kam Khen tungah ka lungdam mahmah hi.

Amau Zozum cihdan mah (kuamah heh theih hilote tawh gen a), “Ka va zin lai in vantung gam nopna va lim gen lua ka hih manin ngaklah lua kha hi inteh, kinawh deuh sa ing,” ci bilbel hi. A Zozumpu pih Pu Khup Mung leuleu in, “Lengtong Kam Khen gospel paina peuhmah a nungsang hoihlo hi, vantung lampi tawh kinai lua deuh hi,” ciin ka nui ngeingai bilbel uh hi!

Siate, Pate, Nute leh lawm leh gual in ka pa hong itpihna uh leh hong nusiat khit ciang ka dahna uh hong thuakpihna uh a gen khit uh ciangin Siampi thungetna leh Christian te kingakna, lametna leh khamuanna thute pulak a thungetna tawh hun kiman hi.

Tua khit ciangin Full Gospel Khangnote in inn thunget a neih uh tawh kituak ahih manin inn thungetna ah ka pa hong nusiatna thu tawh kisai tampi kigen zaw, dahpihna lasak, thungetsakna, hehnepna leh khamuanna thute genna tawh hun kizanga, a tawpna ah vekpi thungetna hong neihsak lailai uh hi.

Hih bangin ka dah ka thanem laitak un Topa in hong uap ding, hong tutpih a hong khamuan ding Ama mi siangthote hong sawl ahih manin ka lungdamna ka gen zo kei uh hi.

Hong pai ut mahmah ta leh hong pai theilo ka Pu Thang Khan Dal, Township Education Officer (TEO) (Rtd), Ciingpikot khua, Dalah ka phawk mahmah hi. Amah hong tutpih dinga hong pai pen Bus station ah Ui in pet kha a zato a zuat ciangin hong pai thei nawnlo hi. Rev. Nang Lyan Kap, EBC Pastor, Tedim in zong phone tawh hong hopih a ka pa hong itpihna thu leh hong nusiat mana hong dahpihna thu hong gen hi.

Mite na navak mahmah uh a, koh kuamah ka hilh man hetloh uh hangin na thei pah zangzang in a thei masasa hong delh manlote in zong hong phone, lai hong khak, mite tungtawn in hong gensawnsak cih bangin itna leh phawkna ka ngah uh a, hampha kisa in ka angtang mahmah uh hi. Ka hilh khak loh uh, ka ciah khit uh cianga hih thu a za pan a hong phulkikte kiangah zong nong theihsiamna uh kong ngen a, kuamah hong hilh khin manlo mah ka hi uh hi. (zop lai ding) Hau Za Cin