88 leh Kei ~ Pu Thangboi

88 leh Kei ~ Pu Thangboi

1988 kum University sangnaupangte’ patkhiat kawlgambup buaina pen “88 Buaina” kici ziau a pawlkhat in 8888 (giat mal li) zong ci hi. Tu’n kum 30 hong cingpak ahih man in tua hunlai a katheihkhak kamuhkhak leh kazakkhak pawlkhat suut nuam ing.

Tuahun Lai Siamsinte

1988 kum lai khawng in University sangnaupangte pen ki eng mahmah in vang nei mahmah uh hi. Zangkong leh Mandalay bek ah akikah thei ahih man in ong ciah ciang bang un kidawn in ki uum ngeingai a athugente uh kingai dimdem hi. Tualai tak in ka upipen ahi ka U Thang Len Piang (a) Heavy Piang zong Mandalay ah akah laitak ahih man in ka kisialhpih mahmah hi. Kei bel 1988 kum in kum 11 kapha pan hi.

88 Buaina

88 buaina pen RIT (Ragoon Institute of Technology) sangnaupangte niangtuisai ah ala ngaih nop uh akituhna uh pan hong kipan ahi hi. Ataktak in bel kum tampi kithawi kholhna a om khit ciang a hong puakkham hizaw hi. 1988 kum March kha 13 ni in RIT sangnaupang Phone Maw kawl galkapte’ khutlum tawh hong si hi. Tua huhau in buaina hong sosang in gambup ah kizeel hi. Kumpi te’n sang teng khak mang ahih man in Zangkong leh Mandalay a sangkah Zomi siamsinte zong hong ciahtek uh hi.

Siamsinte’n Uk

Buaina hong nasia luata ahih man in July 23 ni in kawlgam kum 26 sung a uk Newin in a kumpi tokhom nusia in tuaksukta hi. July 26 ni in Sein Lwin kahto hi. Ahi zong in nitam ukzo lo a Siamsin te’n kumpi zum teng leh thuneihna teng lata uh hi.

Tonzang Ah

Tulai dan in thu kizakna baihlo ahih man in kei’ muhkhak lian Tonzang thu kagen ding hi. Tonzang ah zong Siamsin (University student) te kizuizui uh a thu kikumkum uh hi. Ani lian ka theih nawnloh hang Tedim te’n zong mipi lungphona nei khin ahih teh ei Tonzang te’n zong mipi lungphona nei ni ci’n ko inn tektek ah meeting tu in khentat uh hi. Mipi lungphona pen sangpi pan in kipan hi. Khuasung a mawtaw om teng kisam in mawtaw (Jeep) 4 amai ah damdam in pai in mipite in anung ah kizui in lungphona kinei ziahziah hi. Sangpi pan Sahang Mual ah kahto, lamnuai lam zuiphei in Mualpi pan in ki kawito a Buzung nuai (Tu a chin shwe pyi hall mun) ah kikhawl in tua lai ah thugenna kinei hi. Tualai a thugen siam mahmah bel Pi Ceih Lun leh Pu Sitni Kham Khan Thang tepawl ahi hi.

Siamsinte mah in Tonzang a kumpi zumteng lakhin uh a thuneihna zong lapah uh hi. Ka U Heavy Piang bang transportation lam lensak uh a tawlkhat bang zum vakah man dep hi. Khatvei bang nipi ni kikhawm ding a kapai uh leh Innpi han ah palikte honkhat tawh kituak in “Kawh pai ding?” acih leh apalik te’n “Tedim pai ding” ci uh a, “Na thau uh kidawm un aw hong matsak kha le uh” ci dep hi.

8888 Ni

Kawl Siamsin kipawlna te’n ni 8 kha 8, 88 kum (August 8, 1988) ni in gambup lungphona nei ding cih thu hong thang mahmah hi. Ahi zong in tua ni ma in Tonzang ah vial tampi lungphona ah kihel khin kahih man in ka lawp lua nawn kei hi. Adiak in tuani pen kasen vangngaihnote gamlak ah asingtomna vuah zui ka hih man in nuam kasa mahmah lel hi. Tua ni in ka sen vangngaihnote tawh tuilim lui tung ah singtom in kabuai laitak un mipi lungphote Pu Pum Thang te’ kong ah hong suak phei uh a, a ot ziahziah uh bel ka bilkha ah om lai hi.

Tua ni tak in kapu (Bo Neng Za Suan) te’ inn ah kapai leh RC te’n zong tua ni lian mah in Tonu Maria buk khat alam ni uh hi citciat hi. Khua mial nailo deuh ahih man in kava en phei a abuk tung ah 8.8.88 cih lai agelh laitak uh ka tuak hi.

Galkap Ukna

September 18 ni in Saw Maung makai in kawl galkap te’n thuneihna khempeuh lakik ta uh hi. Thaumuk ngat in hong uk uh a tua ni a kipan in tuni leimong dong ah Zomite ih ki thehthangna thu hong kipan ahi hi.

88 Khit

88 buai khit teh Tonsim a Zomi Khawmpi (The First World Zomi Convention) zong hong minthang mahmah hi. Galkap te’n zong khualzin gamvakte’ min sazian lasak ahih man in tualaitak a hausa upa lak a kihel Pu Thuam Khaw Kam te pawl buai peuhmah uh hi.

Ka U Heavy Piang in Lamka lam pan hong puaksuk ahi ZOROte’ lai ahi “Gunkhawm Sak Siah Zogam” cih lai pen Tonzang ah alawm Pu Thawn Khen Mung (L) tawh zan in mun tuamtuam ah suangsim uh a, khuavak ciang in khuabup linglawng sak mahmah hi. Tualai tak in Cikha ah India gam dialkhaipi kikhai cih khawng hong thang in Zogam akingah pah ding bang kek khat in kilawp thei mahmah hi.

Party Kiphuan

Party tuamtuam hong kiphuat ciang in ZNC zong kiphuan cih bel kiza hi. Ahi zong in tuahun lai in India ZNC minthang mahmah ahih man in tua India a pen ding mah in ki ngaihsun hi. ZNC te Tonzang ah hong tung cih akizak ciang in kilawp mahmah hi. Ahi zong in zin ngah zolo uh ci vetse hi. Aciah kik sawm uh ciang un ka Pu Thang Lam Pau tawh kimu kha uh a ka Pu te’ inn ah tung uh hi. U Cing San te Unau leh TSKhai te bang in la sa ziahziah uh hi. Pu Vungh Za Pau (L) zong kitel mahmah lai hi. Ka Pu te’ inn a tung uh ahih man un kei bang ka aituam lak mahmah hi.

Khat vei kaveng vuah Pu Thang Lian Pau (Tu’n ZRO President) in thugen ding ci ahih man in ka lawmpa Cin Theih Tuang (L) tawh lawp tak in atutna ding khawng uh kawm in kapua tantan uh hi. Ka Pu Thawng Khen Thang te’ inn ah thugenna nei hi. Kipatna ding Sia Ngul Khan Khai in thungetna nei hi. Athugente zaknop kasa mahmah hi.

88 Huzap

88 khanlawhna in CNF piangsak hi. Tua CNF sung a ki deidanna tuamtuam te’n adang kipawlna tuamtuam piangsak hi. ZRO zong 1993 kum in Kachin gam pan in ki phutkhia hi.

88 Khangthak

88 huzap nuai a khangkhia khangthakte’ sung ah zong khanlawhna meikuang kizom hi. Kawlpi ah siamsin sung Kawl leh Zo kikal buaina hong om sawnsawn ahih man in khanlawhna nasia tektek hi. 1998 kum ciang in Zomi siamsin mi 20 te in sisan tawh kiciam ngiat in Zogam Zolei a ding hunbit nasem ding in hong kipia khia ta uh hi. Zoheisa Unit min tawh hong kipan uh hi. Asawtlo in ZRO tawh kizom to uh a tudong asem lai zong om hi. Asawtlo in amauteng mah in Zomi sung ah khanlawhna lianpi khat hong piangsak lai ding un ih um hi.

Mailam ah ahun zui in suutto zeel ni, Lungdam (Mung Laan Thang) Tawmvei USA