Langnih a hiam namsau bang hiam? Langnih a hiam namsau in sia-le-pha theihna ahi hi.
1. Namsau i-cih in nasepna gam sunga kizang ahi hi.
2. Mihingte’ namsau in langkhat bek hiam-a, Pasian’ namsau in langnih a hiam hi.
3. Pasian in mi khempeuh a leenggah huan-a nasem dingin hong kuan sak hi. Pasian pen i-pa hi-a, leenggah huan zong i-pa a’ hi-a, i-pa a’ khempeuh ei a’ zong ahi hi. Tua ahihmanin eima’ nasem mah i-hipah pah hi. Tua in banghiam cihleh i-nisim nekzonna, i-nisim nuntaknate ahi hi.
4. Leenggah huan pen ei a’dingin koilai hi ding hiam? Ih mun, i-gam, eima’ tattheihna huam sung pen eima’ tanh, eima’ leenggah huan ahi hi.
5. Tua ahihleh na vanzat, langnih a hiam namsau, sia-le-pha theihna na koici zat hiam? Zatdan namthum i-gen ding hi.
KHAT: Mite tawh kikal:
(1) Pasian in sia-le-pha theihna hong pia hi.
(2) A pha ding i-theih mah bangin, a sia ding zong i-thei hi.
(3) A meetthei ding i-theih mah bangin, a kisumh thei ding zong i-thei hi.
(4) Mite thupha i-puaktheih mah bangin, thusia zong i-puak thei hi.
(5) Thuhoih i-gen theih mah bangin, thusia zong i-gen thei hi.
(6) Mite thupha i-piaktheih mah bangin, a ki hamsiat thei ahi hi.
(7) Ih kicin lohna a om’ theih mah bangin, i-val’luatna zong a om thei hi.
(8) Sat giapgiap a kul a om mah bangin, zol khiankhian a kul zong a om hi.
(9) Namsau zanga i-dianna pen nasep thupi ahih mah bangin, zang lo-a i-dinna zong nasep thupi ahihna om thei hi.
(10) Ih mailam honga i-kivaan-na lamah, i-zawhsa i-nunglama-te kiliamliam sak thei hi.
NIH: Eima’ tungtang:
(1) Ih duhduh a khum i-kisap mah bangin, i-duh lohloh a kha zong i-kisam hi.
(2) Phatna in tha hong hat sakin, gensiatna in lam hong hon sak hi.
(3) Lungdamna in thaza hi-a, lungkhamna in lungno thahna hi.
(4) Gil kial lualeh pumpi in a thuaklawh mang bangin, vah lua-lezong a thuak veve hi.
(5) Na sem lo-a thadahna in nekding a om loh mah bangin, sem lua-a ki thalelhna in zong i-neihsa ki ne zo lo zel hi.
(6) Ih mailam-ate i-phak theih mah bangin, i-nunglam-ate in zong hong pha thei ahi hi.
(7) Ih mailam-te’ hoih lohna i-muhtheih mah bangin, i-nunglam-ate in zong i-hoih lohna hong mu thei ahi hi.
(8) Hangsan ding a kisap mah bangin, meidawi ding zong a kisapna a om thei ahi hi.
(9) A hoihlam-a zongsatna inkhantohna ahih mah bangin, a sialam-a zongsatna in zong kiamsukna ahi hi.
(10) Minphatna, minsannate ei’ hanga piang ahih mah bangin, minsiatna, vangsel-nate zong ei’ hang’ mahin a piang thei ahi hi.
THUM: Pasian tawh kikal:
(1) Langnih a hiam namsau hong zang sak pen, Pasian hi-a, i-zat siam loh ding a patau den hi.
(2) Pasian’ deih dan-a i-zatleh ei-a kipanin mi tampi in phat tuampih dinga, ei’ deih dan-a i-zatleh, mitampite-a kipanin, ei mahmah in zong i-siat pih ding hi.
(3) Langnih a hiam namsau i-siat nading a paai pen i-kam sung hi-a, a tem pen i-leii ahi hi. Hong zangsak pen ngaihsutna hi-a, zatdan ding honghilh pen sia-le-pha ahi hi. Ih zatna tungtangah thu hong khen ding pen Pasian ahi hi.
(4) Tua namsau i-zatna lamah ei-le-ei zong kisu khial thei-in, i-lawmte zong i-liam sak thei kha mah hi. Ahizongin sawmlo pi-a kisukkhialhna pen, gu neilo-in, a Ni mahin a dam pahpah thei lel hi.
(5)) Nasep hun a bei ciangin lo pan i-ciah ta dinga, i-sepna gah a tawm atam-in i-mu ta ding hi.
(6) Ih bem, i-pang a dim phitphet dingin i-ngaihsut laitakin, a kim zong na pha lo thei thu ahi hi. Ih lawmte ii’ dip zawhlohnate nangawn ei’hang vive na hi thei mawk hi.(Mi hazatna, mi thanemsakna, upna neute puksakna, i-tunga hong kingate khiatkheh khakna, ei’hanga dingding pawlkhat taisanna).
(7) Tua ni ciangin i-namsau zatdan ding i-phawk pha san dinga, i-ki-en duamduam kha ding hi.
(8) Ih nasepna khempeuh hong kilang dinga, tampi sem khinin, pahtaknate zong ngahngah khin napi, i-theihloh kala i-sikkheh, i-vuknelh, i-mangngilh, i-donloh pawlkhatte in i-gim i-tawlna thaman honkhat na luankhiatpih kha ding hi. Pawlkhatte bang pen, “A pianin piang dah vetleh” cih khawng a om kha lai ding hi.
(9) Siate, makaite bek in hih vanzat a keng hi lo hi. Thukhunthak tate khempeuh hong ki-guan’ kim hi. Ih zat keileh nakpi thudotna i-thuak lai ding hi. Talent meetbawlna thu, Mate 25:14-30 sung i-phawk ding hi. Siate, makaite pen a zatdan ding hong hilhte leh tha hong pia dingte hibek hi.
(10) Na khat peuh in dan leh zia nei teka, a bawl Company-te in a zatdan ding kigelhna laibu no(Manuel book) tawh a thuah hi. Tua mah bangin langnih a hiam namsau bawlna Company panin zong ‘Manuel book’ mah tawh hong kithuah hi. A tomin gen leng, “Namsau a mawl’leh thungetna tawh taat ding; zatdan ding buaileh Lai Siangtho sim ding” cih thu ahi hi. Tdkhen
Comment piaknop aomleh...