Cingno tawh lenna gam – 10
Cingno tawh kihona
Theihmasak ding: Hih pen a video hilo ahih manin Cingno ci loin Lulun cih ka zang hi. Interview hilo ahih manin kihona pawlkhat kong suaksak hizaw hi.
1. HZC Dotna (H): Nang maw Cingno? [kimuh tungna]
Lulun Dawnna (L) : Heih, hi ing ei [Japan te in ‘he’ cih pen ‘heih’ ciin a kiza pha mahmah in gen uh hi. Tua pen Japan a om Zomi khempeuh in a zatdan uh hita hi].
2. H: Na min taktak pen Lulun hi ven maw? Bang na lunglut a le?
L: Heih, ka minpi pen Go Deih Lun hi. Fashion lam ka lunglut a, tuin Fashion designing sangkah ing. Kum 3 sung ding hi a, kum 2 omlai.
3. H: Nang pen a minthang mahmah hi mai teh. Kong pai ding ciangin ka hopih khak pakte in zong (Lia Sangbawi leh Lia Zuzuun, Shillong leh Rev. Gin Lam Thang, Champhai) ‘mangpha’ na khaksak in hong ci [Zomi ngeina ah mangpha kikhak pen kiphawkna, kideihsakna, ki itna lahna hi].
L: Aw, hi maw, lungdam si e (kiniamkhiat takin gen hi). Topa hang bekbek hi. Tua ciang Sia Do Khup hanciamna hang hi. A kuhkal luatna Topa in thupha a pia hi sa ing. [A tunga mi 3 teng autograph foto a khak hi].
4. H: Video na zaih sung un bang haksa nasa pen, koi mun?
L: Hun kineilo, zansawt zawh vive a kizaih ahih manin tua pen haksa. “Ka pa Tonzang pai… Khuado sim ding ci hiven…. ” cihna mun pen haksa sa pen ung, 20 vei val hih kikkik ung.
5. H: Zomi bek hilo minam dang a enkha te in zong hoihsa in, no pen Superstar zah a minthang hi uteh. Na thei uh hia?
L: Thei kei ung.
6. H: Zomite tenna Lamka, Aizawl, Champhai, Tedim, leh mundang i mi i sate omna lamah khatvei beek hong zin lo ding maw. Hong mu nuam zong tam ding hiven?
L: Zin utlua ing. Ka laisim ka zawh ciang khatvei peuhmah hanciam sawm ing.
7. H: Koi khua na pai masa pen dia leh?
L: Tua bel nang hong guide lecin hilo dia…. [ciin hong ciammuih hi cih ka thei a..].
8. H: Takpi maw, takkkkpi…?
L: Hmm….. (a lu su’ in, bangmah genlo in nui, a video sunga mah bangin)
9. H: Na nasep uh hong phawkkha khawng a om hiam?
L: Phawk khak ding cih zong a kilamen hi kei, Topa nasepna in ka ngaihsut uh hi. Ahi zongin ZOMUS in hong pahtawi uh a, “LENGTONG AWARD 2006” hong pia uh. Ka lungdam mahmah. [Lengtong Award a common room vua kitung hit-hiat ka en uh a,… I gam i lei ah letsong kipia a kipahtawi ziahziah ding kimlai, a thu leh a van kikhak a kul ciang hong khasiat huai phial hi… ]. Hih banga hong pahtawi i mi i sate kiangah lungdam ko in khatvei ka zin nuam hi.
10. H: Eh, mangngilh dektak ing ei. ZONET ah mi khat in, a min thei nawn keng, “Cingno kiang zin ding na hih leh na u Thang in mangpha hong khak..” cih dan khat hong vaikhak ei.
L: (Hong en a, bangmah genlo in nui ziau hi, bang cihna hiam thei keng..)
Tua banga holim a nop hangin hun in hong ngak lo a,
Taikhua a val nop leh val hen,
Buh al a khuan nop leh khuang hen
i ci nuam ta teu zong zingciang vai tuamtuam nei, tawldam ding a kisam mihing aki hih manin, “zingsang ciang tawldam in tho in aw” ciin aksi nelkai, zozam nelkai mangpha ka kikhak khit uh ciangin ka kikhen uh hi.
Topa thupha mawle!!
Dr. Hau Za Cin
Phuitong Liim
Comment piaknop aomleh...