Zuapa Itna ~ Thawnpu

Zuapa Itna ~ Thawnpu

Zuapa itna’n Khentuam neilo
Hoih man genloh tuisik bekin
Mimbang kapian hongtheih cilin
Hong itna lian mabang pan maw…

Zuapa itna’n zu ham ci lo
Zingni suah sial vai lo kuanin
Gilkial dangtak gimpi tawlpi’n
Kei’ din tukawl paakbang tawi maw…

Zuapa itna’n pham nat sial lo
Tongsan theihloh singta gamah
Zing le nitak, zu ham nuaiah
Kei din sesum lambang zong maw…

Zuapa itna’n gim tawl omlo
Lungdeih thaikawi vontawi adin
Nat le sat thuak hatsak tuakin
Cintuiguh kang liang in sem maw…

Zuapa itna’n muanlah omlo
Thaikawi, von le limbelh zuapa
Lailung khaubang hualin muangnaa
Bangkua itna phuhbang kho maw…

Zuapa itna’n lampial pihlo
Sinthu dik tawh nunzia lamlak
Etteh pha bel gamtat in lak
Vontawi nunzia lambang sial maw…

Zuapa itna’n tel zawh baihlo
Nuntak thugui lambang lak ee
Khangcing sem leng tel nuam sem ee
Zuapa mah in thei siam ei maw…

By: TP Thawnpu